'పదో తరగతి కూడా పాస్‌ కాలేదు.. ఇప్పుడు భర్తతో సెల్యూట్ కొట్టించుకుంటుంది' IPSగా అంబిక విజయగాథ

తమిళనాడుకు చెందిన అంబిక చిన్న వయసులోనే వివాహం చేసుకుంది. ఆమెకు 14 ఏళ్ల వయసులోనే ఓ కానిస్టేబుల్‌తో పెళ్లి జరిగింది. 18 ఏళ్లు వచ్చేసరికి ఇద్దరు ఆడపిల్లలకు తల్లైంది. దీంతో చదువుకు దూరమై కుటుంబ బాధ్యతల్లో నిమగ్నమైంది. ఓ రిపబ్లిక్ డే సందర్భంగా అంబిక భర్త పోలీస్ పరేడ్‌లో పాల్గొనాల్సి వచ్చింది. అంబిక కూడా ఆయనతో కలిసి పరేడ్‌కు వెళ్లింది. అక్కడ ఐజీ, డీఐజీ స్థాయి అధికారులకు లభిస్తున్న గౌరవం, అధికార లాంఛనాలను ఆమె ఆసక్తిగా గమనించింది. ఆ దృశ్యం అంబికలో కొత్త ఆలోచనకు కారణమైంది. తాను కూడా ఒక రోజు అలాంటి స్థాయికి చేరుకోవాలని నిర్ణయించుకుంది. తన కోరికను భర్తతో చెప్పింది. అయితే పదో తరగతి కూడా చదవని తనకు అది అంత సులభం కాదని ఆయన వివరించాడు. అయినప్పటికీ అంబిక పట్టుదల చూసిన భర్త.. ముందుగా పదో తరగతి పూర్తి చేయాలని సూచించాడు.