తెలుగు ఫిల్మ్ అండ్ టీవీ డాన్సర్స్ అసోసియేషన్‌లో(TFTDDA) కొంతకాలంగా కొనసాగుతున్న వివాదంపై అసోసియేషన్ అధ్యక్షుడు జానే మాస్టర్ భార్య సుమలత స్పందించారు. తాజాగా నిర్వహించిన ప్రెస్‌మీట్‌లో ఆమె వివాదానికి సంబంధించిన పలు అంశాలను వెల్లడించారు. అసోసియేషన్ సభ్యుల్లో కొంతమంది బ్యాంకుకు ఫోర్జరీ లేఖలు సమర్పించారని, నకిలీ పత్రాల వ్యవహారంపై కోర్టు ఆదేశాలు కూడా ఉన్నాయని ఆమె పేర్కొన్నారు.
సుమలత మాట్లాడుతూ.. తమ అసోసియేషన్‌కు చెందిన కొంతమంది సభ్యులు బ్యాంకుకు ఫోర్జరీ లేఖలు పెట్టారని ఆరోపించారు. బ్యాంకు లావాదేవీలు, నకిలీ పత్రాల సృష్టికి సంబంధించిన అంశంపై కోర్టు ఆదేశాలు వచ్చాయని తెలిపారు. ప్రస్తుతం ఈ వివాదంపై ఫెడరేషన్‌తో చర్చలు కొనసాగుతున్నాయని చెప్పారు.
అలాగే కొత్త డాన్సర్లను తీసుకునే విషయంలో లేబర్ కమిషన్ నుంచి కూడా తమకు స్పష్టత వచ్చిందని సుమలత తెలిపారు. లేబర్ కమిషన్ సూచనల ప్రకారం కొత్త డాన్సర్లను తీసుకోవచ్చని చెప్పినట్లు వెల్లడించారు.
ప్రస్తుతం నెలకొన్న వివాదాలు త్వరలోనే సద్దుమణుగుతాయని ఆశిస్తున్నట్లు సుమలత అన్నారు. అందరినీ కలుపుకుని ముందుకు వెళ్లాలనే ఉద్దేశంతో ఉన్నామని చెప్పారు. అసోసియేషన్‌లో ఏవైనా తప్పులు జరిగి ఉంటే తాము భయపడాల్సిన అవసరం ఉండేదని, అయితే తమ వైపు నుంచి ఎలాంటి తప్పు జరగలేదని ఆమె స్పష్టం చేశారు.
మొత్తంగా డాన్సర్స్ అసోసియేషన్‌లో నెలకొన్న వివాదానికి చర్చల ద్వారా పరిష్కారం కనుగొనే ప్రయత్నాలు జరుగుతున్నాయని సుమలత వ్యాఖ్యల ద్వారా తెలుస్తోంది. రానున్న రోజుల్లో ఈ వ్యవహారం ఎలాంటి మలుపు తిరుగుతుందనేది ఆసక్తికరంగా మారింది.
