వారణాసి’పై పృథ్వీరాజ్ సుకుమారన్

ఇందులో పృథ్వీరాజ్ కుంభ పాత్రలో విలన్‌గా కనిపించనున్నారు. తాజాగా ఓ హాలీవుడ్‌ మీడియాకు ఇచ్చిన ఇంటర్వ్యూలో ఆయన ఈ చిత్రం షూటింగ్‌, రాజమౌళి గురించి ఆసక్తికర విషయాలు పంచుకున్నారు. ఆయన (Prithviraj Sukumaran) మాటల్లోనే

గతంలో మోహన్‌లాల్ దర్శకత్వంలో వచ్చిన ‘బరోజ్’ సినిమాలో ఒక చిన్న పాత్ర కోసం నేను వారం రోజులు షూటింగ్‌లో పాల్గొన్నాను. ఆ తర్వాత కొన్ని కారణాల వల్ల ఆ ప్రాజెక్ట్ నుంచి వైదొలగాను. ఆయన తర్వాత నన్ను డైరెక్ట్‌ చేసిన గొప్ప నటుడు రాజమౌళి (SS Rajamouli) అని నిస్సందేహంగా చెప్పగలను. సెట్స్‌లో ఏదైనా సీన్ వివరించేటప్పుడు ఆ పాత్రలో రాజమౌళి లీనమవుతారు. ఆసీన్‌కు కావాల్సిన ఎమోషన్స్‌ అన్నీ స్వయంగా తన ముఖంలో పలికిస్తారు. ఆ సన్నివేశం ఎలా చేయాలో ఆ భావోద్వేగాలు ఎలా ఉండాలో యాక్టర్స్‌కు అర్థం కావడం కోసం ఆయన పాత్రలో జీవించి చూపిస్తారు.

ఒక్కోసారి రాజమౌళి చెప్పిన సన్నివేశాలు నాకు అర్థం అయ్యేవి కాదు. దాన్ని అర్థం చేసుకోవడానికి చాలా శ్రమించాను. ఆయన విజన్‌కు, నా నటనకు మధ్య సెట్స్‌లో చిన్నపాటి యుద్ధమే జరిగింది. కానీ ఆయనపై నమ్మకంతో ఆయన చెప్పిందే చేస్తాను. ఆ తర్వాత ఎడిటింగ్ టేబుల్ మీద అవుట్‌పుట్ చూసినప్పుడు ఆయన ఇంత గొప్పగా ఆలోచించి ఈ సీన్‌ తీశారా ఆశ్చర్యపోయేవాడిని. ఆయనతో పనిచేయడం వల్ల ఒక నటుడిగా, దర్శకుడిగా, వ్యక్తిగా నేను ఎంతో పరిణతి సాధించాను.

నేను ఇప్పటి వరకూ రాజమౌళిలా కష్టపడే దర్శకుడిని చూడలేదు. ఉదయం 7 గంటలకు మొదటి షాట్ ఉంటే ఆయన 5:15 గంటలకే సెట్స్‌కు చేరుకుంటారు (Varanasi Shooting). నేను, మహేశ్‌, ప్రియాంక సెట్స్‌కు వచ్చేసరికి ఆయన తన అసిస్టెంట్లతో కలిసి కనీసం 12 సార్లు రిహార్సల్స్ పూర్తి చేసి, కెమెరా క్రేన్‌లను సిద్ధంగా ఉంచుతారు. మమ్మల్ని కూడా ఉదయమే రమ్మంటారా అని అడిగితే వద్దు అని చెబుతారు. లంచ్‌ బ్రేక్‌ కూడా 20 నిమిషాలు మాత్రమే.

రాజమౌళి ప్రతి సినిమాను మొదటి చిత్రంలా భావించి కష్టపడతారు. తన మొదటి సినిమా అవకాశం కోసం 20, 30 ఏళ్లు వేచి చూసి, ఇప్పుడు ఆ ఛాన్స్ రావడంతో ఎంతో కసిగా సినిమా తీస్తున్న కొత్త దర్శకుడిలా కనిపిస్తారు. ఒక్కో సన్నివేశాన్ని 90 టేక్‌లకు పైగా తీసిన సందర్భాలు కూడా ఉన్నాయి. ఉదయం 5 గంటలకు మొదలు పెడితే రాత్రి వరకూ కొనసాగిస్తారు. ఆయన అనుకున్నట్లు రాకపోతే.. మరుసటి రోజు కూడా అదే సన్నివేశాన్ని షూట్‌ చేస్తారు.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.