బిగ్ బాస్ మోజులో పోలీస్ బాస్

త్వరలో ప్రారంభం కానున్న బిగ్ బాస్ సీజన్-10లో తనకు కంటెస్టెంట్‌గా అవకాశం ఇవ్వాలంటూ ఒక పోలీస్ సబ్ ఇన్‌స్పెక్టర్ (ఎస్సై) స్వయంగా రంగంలోకి దిగారు. షో హోస్ట్, కింగ్ అక్కినేని నాగార్జునను(Akkineni Nagarjuna) ఉద్దేశించి “నాగార్జున గారూ.. ఒక్క ఛాన్స్ ప్లీజ్” అంటూ ఆయన చేసిన సెల్ఫ్ వీడియో ఇప్పుడు నెట్టింట తీవ్ర సంచలనంగా మారింది.

నంద్యాల(Nandyala) జిల్లా గడివేముల పోలీస్ స్టేషన్‌లో ఎస్సైగా బాధ్యతలు నిర్వహిస్తున్న నాగార్జున రెడ్డి ఈ వినూత్న ప్రయత్నానికి తెరలేపారు. తనకు బిగ్ బాస్ హౌస్‌లోకి వెళ్లాలని ఉందని, అక్కడ అడుగుపెట్టే అవకాశం కల్పిస్తే తన ఆట తీరు మరియు పెర్ఫార్మెన్స్‌తో ప్రేక్షకులను అదరగొడతానని ఆయన ధీమా వ్యక్తం చేశారు. ఖాకీ చొక్కా వెనుక ఉన్న తనలోని అసలైన కళాకారుడిని, ప్రతిభను ప్రపంచానికి పరిచయం చేయడానికి బిగ్ బాస్ సరైన వేదికని ఆయన భావిస్తున్నారు.

ఈ నిర్ణయం వెనుక తన పిల్లల చిరకాల కోరిక ఉందంటూ ఎస్సై నాగార్జున రెడ్డి ఆ వీడియోలో పేర్కొన్నారు. బిగ్ బాస్ షోను ఎంతో ఇష్టపడే తన పిల్లల ముచ్చట తీర్చడం కోసమే తాను ఈ అభ్యర్థన చేస్తున్నట్లు ఆయన వెల్లడించారు. ఒక బాధ్యతాయుతమైన పోలీస్ అధికారి ఇలా నేరుగా బిగ్ బాస్ హౌస్‌లోకి వెళ్తామంటూ వీడియో విడుదల చేయడం రెండు తెలుగు రాష్ట్రాల్లో హాట్ టాపిక్‌గా మారింది. ఈ అరుదైన అభ్యర్థనపై బిగ్ బాస్ నిర్వాహకులు మరియు కింగ్ నాగార్జున ఎలా స్పందిస్తారో చూడాలి.