మంగళగిరి అండర్ గ్రౌండ్ డ్రైనేజీ ప్రాజెక్ట్ కు మంత్రి లోకేష్ శంకుస్థాపన

రూ.1,167 కోట్ల వ్యయంతో ఎంటీఎంసీ పరిధిలో అండర్ గ్రౌండ్ డ్రైనేజీ వ్యవస్థ నిర్మాణం మంగళగిరి: మంగళగిరి నియోజకవర్గాన్ని దేశంలోనే ఆదర్శంగా తీర్చిదిద్దుతామని, ఎంటీఎంసీ పరిధిలో అండర్ గ్రౌండ్ డ్రేనేజీ వ్యవస్థ నిర్మించి మురుగు కనుమరుగయ్యేలా చేస్తామని ఎన్నికల సమయంలో మంత్రి నారా లోకేష్ ఇచ్చిన హామీ కార్యరూపం దాల్చింది. తాడేపల్లిలోని ప్రాతూరు రోడ్డులో మంగళగిరి, తాడేపల్లి నగర ప్రజల చిరకాల కోరిక అయిన అండర్ గ్రౌండ్ డ్రైనేజీ అభివృద్ధి పథకం మొదటి దశ పనులకు కేంద్ర గ్రామీణాభివృద్ధి, కమ్యూనికేషన్ల శాఖ సహాయ మంత్రి పెమ్మసాని చంద్రశేఖర్ తో కలిసి విద్య, ఐటీ శాఖల మంత్రి నారా లోకేష్ శంకుస్థాపన చేశారు.

ఈ సందర్భంగా ఏర్పాటుచేసిన శిలాఫలకాన్ని మంత్రి ఆవిష్కరించారు. అంతకుముందు తాడేపల్లిలోని ప్రాతూరు రోడ్డుకు చేరుకున్న మంత్రి లోకేష్ కు టీడీపీ నేతలు, కార్యకర్తలు, ప్రజలు ఘనస్వాగతం పలికారు. ప్రజా ప్రభుత్వంలో మంత్రి నారా లోకేష్ మంగళగిరి అభివృద్ధికి ప్రణాళికలు రూపొందించారు.

తొలి ప్రాధాన్యంగా భూగర్భ డ్రైనేజీ డీపీఆర్ లు రూపొందించారు. నిధులు మంజూరుతో పాటు పరిపాలన అనుమతులు తీసుకువచ్చారు. దీంతో దశాబ్దాలుగా ఈ ప్రాంత ప్రజలు ఎదుర్కొంటున్న మురుగునీటి సమస్యకు శాశ్వత పరిష్కారం లభించింది. రూ.1,167 కోట్ల వ్యయంతో అండర్ గ్రౌండ్ డ్రైనేజీ వ్యవస్థ నిర్మాణం మంగళగిరి-తాడేపల్లి మున్సిపల్ కార్పోరేషన్ పరిధిలో భూగర్భ మురుగునీటి పారుదల వ్యవస్థ(యూజీడీ)ను రూ.1,167.50 కోట్లతో నిర్మించనున్నారు.

రాజధాని గ్రామాలు బేతపూడి, నవులూరు, యర్రబాలెం, నిడమర్రు, పెనుమాక, ఉండవల్లి గ్రామాలు మినహా మొత్తం ఎంటీఎంసీ ప్రాంతంలో డీసెంట్రలైజేషన్ అండర్ గ్రౌండ్ డ్రైనేజీతో పాటు మురుగుశుద్ధి కేంద్రాలు నిర్మాణాన్ని హైబ్రిడ్ అన్యుటీ మోడ్ లో రెండు దశల్లో పనులు చేపట్టనున్నారు. యూజీడీ నెట్ వర్క్ ఫేజ్-1లో 300 కి.మీలు, ఫేజ్-2లో 231 కి.మీలు కలిపి మొత్తం 531 కి.మీలు నిర్మించనున్నారు.