కాసేపట్లో ఖమ్మంలో కేటీఆర్ పర్యటన

KTR Visit Khammam : భారత్ రాష్ట్ర సమితి (BRS) వర్కింగ్ ప్రెసిడెంట్, ఐటీ శాఖ మాజీ మంత్రి కల్వకుంట్ల తారక రామారావు (KTR) బుధవారం ఉమ్మడి ఖమ్మం జిల్లాలో పర్యటిస్తున్నారు. రాష్ట్రంలో మారిన రాజకీయ సమీకరణాల నేపథ్యంలో పార్టీ శ్రేణుల్లో సరికొత్త ఉత్సాహాన్ని నింపేందుకు మరియు రాబోయే స్థానిక సంస్థల ఎన్నికలకు కేడర్‌ను సమాయత్తం చేయడమే ధ్యేయంగా ఈ పర్యటన ఖరారైంది.

షెడ్యూల్ ప్రకారం, కేటీఆర్ హైదరాబాద్‌లోని బేగంపేట విమానాశ్రయం నుంచి ప్రత్యేక హెలికాప్టర్ ద్వారా బయలుదేరి ఖమ్మం రూరల్ మండలం పరిధిలోని తెల్దారుపల్లి నర్సింగ్ కాలేజీ వద్ద ఏర్పాటు చేసిన తాత్కాలిక హెలిప్యాడ్‌కు చేరుకుంటారు. అక్కడ పార్టీ ముఖ్య నేతలు, భారీ సంఖ్యలో తరలివచ్చిన గులాబీ దళం ఆయనకు ఘనస్వాగతం పలకనున్నారు.

అక్కడి నుంచి కేటీఆర్ నేరుగా రోడ్డు మార్గంలో ఖమ్మం నగరంలోని శ్రీ హర్ష కన్వెన్షన్ హాల్‌కు బయలుదేరుతారు. Read Also : రైతుల వడ్లు కొనే తెలివి కాంగ్రెస్ ప్రభుత్వానికి లేదు.. హరీశ్ రావు ఖమ్మం నగరంలోని శ్రీ హర్ష కన్వెన్షన్ హాల్ వేదికగా ఉదయం 11 గంటలకు ప్రతిష్టాత్మక పాలేరు నియోజకవర్గ బీఆర్ఎస్ పార్టీ జనరల్ బాడీ (సాధారణ మహాసభ) సమావేశం ప్రారంభం కానుంది.

ఈ ప్రాంతంలో పార్టీ పట్టును మరింత బలోపేతం చేసేందుకు నిర్వహిస్తున్న ఈ కీలక సదస్సుకు కేటీఆర్ ముఖ్య అతిథిగా హాజరై ప్రసంగించనున్నారు. ప్రస్తుత కాంగ్రెస్ ప్రభుత్వ వైఫల్యాలను, ప్రజా వ్యతిరేక విధానాలను క్షేత్రస్థాయిలో ప్రజల్లోకి ఎలా తీసుకెళ్లాలనే అంశంపై ఆయన నియోజకవర్గ స్థాయి నేతలు, కార్యకర్తలకు దిశా నిర్దేశం చేయనున్నారు.

ఈ జనరల్ బాడీ సమావేశంలో పాలేరు నియోజకవర్గ పరిధిలోని ముఖ్య నాయకులు, మండల అధ్యక్షులు, ఎంపీటీసీలు, సర్పంచులు (మాజీలు) మరియు అనుబంధ సంఘాల ప్రతినిధులు పెద్ద ఎత్తున పాల్గొంటున్నారు. కేటీఆర్ పర్యటన నేపథ్యంలో ఉమ్మడి ఖమ్మం జిల్లా వ్యాప్తంగా గులాబీ శ్రేణుల్లో భారీ హంగామా నెలకొంది.