ఏపీలో పోలీసింగ్ విప్లవం.. సర్కార్ కీలక నిర్ణయం

రాష్ట్రంలో కొత్తగా మరో మూడు పోలీస్ కమిషనరేట్లను ఏర్పాటు చేసేందుకు అధికారికంగా గ్రీన్ సిగ్నల్ ఇచ్చింది. ప్రస్తుతం జిల్లా ఎస్పీల పరిధిలో ఉన్న తిరుపతి(Tirupati), గుంటూరు(Guntur), రాజమండ్రి జిల్లాలను పూర్తి స్థాయి పోలీస్ కమిషనరేట్లుగా అప్‌గ్రేడ్ చేయాలని ప్రభుత్వం ప్రతిపాదించింది.

నగరాల శరవేగవంతమైన విస్తరణ, మారుతున్న నేరాల స్వరూపం, ట్రాఫిక్ సమస్యలను సమర్థవంతంగా అదుపు చేయడమే లక్ష్యంగా ఈ కీలక అడుగు పడింది. ఈ నూతన కమిషనరేట్ల ఏర్పాటు ప్రక్రియను వేగవంతం చేయాలంటూ రాష్ట్ర పోలీస్ బాస్ (డీజీపీ) హరీష్ కుమార్ గుప్తా రంగంలోకి దిగారు. తిరుపతి, గుంటూరు, రాజమండ్రి జిల్లాల ఎస్పీలకు ఆయన కీలక ఆదేశాలు జారీ చేశారు. ప్రతిపాదిత కమిషనరేట్లకు సంబంధించిన భౌగోళిక సరిహద్దులు, కొత్తగా ఏర్పాటు చేయాల్సిన ప్రత్యేక పోలీస్ వింగ్స్, శాంతిభద్రతల నిర్వహణకు కావలసిన సిబ్బంది సంఖ్య మరియు మౌలిక వసతుల లభ్యతపై సమగ్రమైన ప్రతిపాదనలు (Proposals) సిద్ధం చేయాలని స్పష్టం చేశారు.

ఈ పూర్తి స్థాయి నివేదికలను వీలైనంత త్వరగా మంగళగిరిలోని పోలీస్ ప్రధాన కార్యాలయానికి పంపాలని డీజీపీ ఆదేశించారు. ప్రస్తుతం ఆంధ్రప్రదేశ్‌లో విజయవాడ, విశాఖపట్నం వంటి ప్రధాన నగరాల్లో మాత్రమే కమిషనరేట్ వ్యవస్థ విజయవంతంగా కొనసాగుతోంది. ఇప్పుడు కొత్తగా తిరుపతి, గుంటూరు, రాజమండ్రి నగరాలు కూడా ఈ జాబితాలో చేరితే పట్టణ ప్రాంతాల్లో పర్యవేక్షణ మరింత సులభతరం కానుంది. కమిషనరేట్ వ్యవస్థ అమలులోకి వస్తే ఐపీఎస్ కేడర్ అధికారులు నేరుగా కమిషనర్‌గా బాధ్యతలు చేపడతారు, దీనివల్ల నిర్ణయాలు వేగంగా తీసుకోవడానికి, ఆధునిక సాంకేతికతతో నేరాలను అదుపు చేయడానికి వీలవుతుందని ప్రభుత్వం భావిస్తోంది.