పసిడి ప్రియులకు గుడ్ న్యూస్.. స్వల్పంగా దిగొచ్చిన బంగారం ధరలు

ధరలు తగ్గినప్పటికీ, గత వారం నమోదైన భారీ పెరుగుదలతో పోలిస్తే ఈ తగ్గుదల చాలా తక్కువగానే ఉండటంతో కొనుగోలుదారులకు పెద్దగా ఉపశమనం లభించలేదు.

బంగారం ధరలు ప్రతిరోజూ మారడానికి ఎన్నో అంతర్జాతీయ, దేశీయ కారణాలు ఉంటాయి. ముఖ్యంగా ప్రపంచ ఆర్థిక పరిస్థితులు, అమెరికా ఫెడరల్ రిజర్వ్ వడ్డీ రేట్లపై అంచనాలు, డాలర్ బలహీనత లేదా బలపడటం, అంతర్జాతీయంగా బంగారంపై పెట్టుబడుల ప్రవాహం వంటి అంశాలు ధరలను ప్రభావితం చేస్తుంటాయి. ప్రపంచంలో ఎక్కడైనా యుద్ధాలు, ఉద్రిక్త పరిస్థితులు లేదా ఆర్థిక అనిశ్చితి పెరిగితే.. పెట్టుబడిదారులు సురక్షిత పెట్టుబడిగా బంగారాన్ని ఎంచుకుంటారు. దీంతో డిమాండ్ పెరిగి ధరలు కూడా ఎగబాకుతాయి.

అయితే ఇవాళ పరిస్థితి కొంత మారింది. కొందరు పెట్టుబడిదారులు ఇప్పటికే వచ్చిన లాభాలను బుక్ చేసుకోవడం, అమెరికా డాలర్ స్వల్పంగా బలపడటం వల్ల అంతర్జాతీయ మార్కెట్‌లో బంగారం ధరలు కాస్త తగ్గాయి. దాని ప్రభావం దేశీయ మార్కెట్‌పైనా కనిపించింది. ఈరోజు 24 క్యారెట్ల బంగారం 10 గ్రాముల ధర రూ.270 తగ్గి రూ.1,46,730కు చేరింది. 22 క్యారెట్ల బంగారం ధర కూడా రూ.250 తగ్గి 10 గ్రాములకు రూ.1,34,500గా నమోదైంది. 18 క్యారెట్ల బంగారం ధర కూడా తగ్గింది. 10 గ్రాములకు రూ.200 తగ్గడంతో ప్రస్తుతం రూ.1,10,050గా ఉంది.

బులియన్ మార్కెట్‌లో ప్రకటించే ధరలే తుది ధరలు కావు. నగల దుకాణాల్లో జీఎస్టీ, మేకింగ్ ఛార్జీలు, వేస్టేజ్ వంటి అదనపు ఖర్చులు కలుస్తాయి. కాబట్టి ప్రాంతం మారేకొద్దీ ధరలు మారే అవకాశం ఉంది. మరోవైపు వెండి ధర మాత్రం ఎలాంటి మార్పు లేకుండా కొనసాగుతోంది. ప్రస్తుతం కిలో వెండి ధర రూ.2,60,000 వద్ద స్థిరంగా ఉంది. రానున్న రోజుల్లో బంగారం, వెండి ధరలు ఎలా ఉంటాయనేది అంతర్జాతీయ పరిస్థితుల బట్టి ఉంటుంది. ప్రతిరోజూ ధరలను గమనిస్తూ నిర్ణయం తీసుకోవడం ఉత్తమం.