గ్రీన్ టీ లేదా బ్లాక్ టీ, బరువు తగ్గడానికి ఏది బెస్ట్ ఛాయిస్? దేనికి ఎక్కువ మార్కులంటే

. మరికొందరు కఠినమైన డైట్ ఫాలో అవుతున్నారు. చాలా మంది డైట్‌లో గ్రీన్ టీ, బ్లాక్ టీని బరువు తగ్గేందుకు చేర్చుకుంటున్నారు. అయితే, బరువు తగ్గేందుకు రెండింటిలో ఏది బెస్ట్ అని చాలా మంది సందేహపడుతుంటారు. ఆరోగ్యకరమైన ఆహారం (డైట్), క్రమంతప్పకుండా వ్యాయామం చేయడంతో పాటు గ్రీన్ టీ లేదా బ్లాక్ టీలను తీసుకుంటే.. ఇవి బరువు తగ్గడానికి చక్కగా సాయపడతాయి. అయితే, బ్లాక్ టీతో పోలిస్తే గ్రీన్ టీ బరువు తగ్గడానికి కాస్త ఎక్కువ ఉపయోగపడుతుందని క్లినికల్ న్యూట్రిషనిస్ట్ ఎడ్వినా రాజ్ (హెడ్ ఆఫ్ సర్వీసెస్ - క్లినికల్ న్యూట్రిషన్ & డైటెటిక్స్, ఆస్టర్ సిఎమ్‌ఐ హాస్పిటల్, బెంగళూరు) తెలిపారు. పూర్తి వివరాలేంటో ఇప్పుడు తెలుసుకుందాం.గ్రీన్ టీ ఎందుకు ప్రత్యేకం? గ్రీన్ టీలో 'కాటెచిన్స్' (Catechins) అనే యాంటీఆక్సిడెంట్లు చాలా ఎక్కువగా ఉంటాయి. ముఖ్యంగా ఇందులో ఉండే EGCG (ఎపిగాల్లోకాటెచిన్ గాలెట్) అనే కాంపౌండ్ మన శరీర మెటబాలిజం (జీవక్రియ)ను వేగవంతం చేస్తుంది. దీనివల్ల శరీరం కొవ్వును కరిగించే సామర్థ్యం పెరుగుతుంది. తక్కువ ప్రాసెసింగ్: గ్రీన్ టీని తాజా ఆకుల నుంచి తయారు చేస్తారు. వీటికి ఎక్కువ ప్రాసెసింగ్ చేయకపోవడం వల్ల అందులోని సహజ సిద్ధమైన యాంటీఆక్సిడెంట్లు అలాగే ఉంటాయి. ఫ్యాట్ ఆక్సిడేషన్: ముఖ్యంగా వ్యాయామం చేసే సమయంలో గ్రీన్ టీ తాగడం వల్ల శరీరంలో కొవ్వు వేగంగా కరుగుతుందని అధ్యయనాలు చెబుతున్నాయి. ఆకలి నియంత్రణ: ఇది కొందరిలో ఆకలిని కూడా కాస్త తగ్గిస్తుంది (అయితే ఈ ప్రభావం అందరిలో ఒకేలా ఉండకపోవచ్చు).బ్లాక్ టీ ప్రత్యేకతలు ఏంటి? బ్లాక్ టీ కూడా గ్రీన్ టీ మొక్క (కెమిలియా సైనెన్సిస్) నుంచే వస్తుంది. కానీ, ఈ ఆకుల్ని ప్రాసెస్ చేసేటప్పుడు 'ఆక్సిడేషన్' (నల్లబడటం) ప్రక్రియకు గురిచేస్తారు. అందుకే దీనికి ఆ ముదురు రంగు, ఘాటైన రుచి వస్తాయి. జీర్ణక్రియకు మేలు: బ్లాక్ టీలో థియాఫ్లావిన్స్, థియారుబిగిన్స్ (Thearubigins) అనే కాంపౌండ్స్ ఉంటాయి. ఇవి జీర్ణక్రియను మెరుగుపరచడమే కాకుండా, రక్తంలో చక్కెర స్థాయిల్ని అదుపులో ఉంచుతూ బరువు పెరగకుండా చూస్తాయి. ఎక్కువ కెఫిన్: గ్రీన్ టీతో పోలిస్తే బ్లాక్ టీలో కెఫిన్ శాతం కొంచెం ఎక్కువ. ఇది శరీరానికి తక్షణ శక్తిని ఇవ్వడమే కాకుండా, కేలరీల్ని కరిగించడంలో సాయపడుతుంది.తెలుసుకోవాల్సిన విషయాలు తాగడానికి సరైన సమయం: పరగడుపున స్ట్రాంగ్ గ్రీన్ టీ తాగడం వల్ల కొందరిలో ఎసిడిటీ రావచ్చు. కాబట్టి ఉదయం బ్రేక్‌ఫాస్ట్ చేసిన గంట తర్వాత లేదా సాయంత్రం స్నాక్స్ టైమ్‌లో తాగడం మంచిది. వ్యాయామానికి ముందు: వర్కౌట్ చేయడానికి 30 నిమిషాల ముందు గ్రీన్ టీ తాగితే, అందులోని కెఫిన్, EGCG వల్ల వ్యాయామం చేసేటప్పుడు ఎక్కువ కొవ్వు కరుగుతుంది. నిమ్మరసం కలపండి: గ్రీన్ టీలో కొద్దిగా నిమ్మరసం పిండుకుంటే, నిమ్మకాయలోని విటమిన్-సి వల్ల గ్రీన్ టీలో ఉన్న యాంటీఆక్సిడెంట్లను మన శరీరం మరింత సులభంగా గ్రహిస్తుంది. రుచి కూడా బాగుంటుంది. రాత్రి వేళల్లో వద్దు: బ్లాక్ టీలో కెఫిన్ ఎక్కువ ఉంటుంది కాబట్టి, రాత్రి పడుకునే ముందు దీనిని తాగితే నిద్రలేమి సమస్య వచ్చే అవకాశం ఉంది.చివరగా ఏం తెలుసుకోవాలి? బరువు తగ్గే విషయంలో గ్రీన్ టీ, బ్లాక్ టీల మధ్య ఉన్న తేడా చాలా స్వల్పం. అయితే, చక్కెర లేదా పాలు, క్రీమ్ వంటివి కలపకుండా తాగినప్పుడే ఈ రెండు టీల వల్ల పూర్తి ప్రయోజనం ఉంటుంది. పండ్ల రసాలు, సాఫ్ట్ డ్రింక్స్‌కు బదులుగా ఈ టీలను అలవాటు చేసుకుంటే శరీరంలో కేలరీలు చేరకుండా ఉంటాయి.కేవలం టీ తాగడం వల్లే బరువు తగ్గిపోరు. సరైన ఆహార నియమాలు, వ్యాయామం చేస్తూ, వీటిని మీ లైఫ్‌స్టైల్‌లో ఒక భాగంగా చేసుకుంటేనే మంచి ఫలితం ఉంటుంది. యాంటీఆక్సిడెంట్ల పరంగా చూస్తే గ్రీన్ టీకి స్వల్పంగా ఎక్కువ మార్కులు పడతాయి.సమయం తెలుగు సంప్రదించిన వైద్య నిపుణులుఎడ్వినా రాజ్ హెడ్ ఆఫ్ సర్వీసెస్ - క్లినికల్ న్యూట్రిషన్ & డైటెటిక్స్, ఆస్టర్ సిఎమ్‌ఐ హాస్పిటల్, బెంగళూరు.