ఏపీ, బెంగళూరు మీదుగా వెళ్లే ఈ డైలీ ఎక్స్ ప్రెస్ స్పీడ్ పెంపు, టైమింగ్స్ మార్పు

తెలుగు రాష్ట్రాల నుంచి కర్ణాటకకు వెళ్లే వారికి దక్షిణ మధ్య రైల్వే తీపికబురు ఇచ్చింది. ప్రయాణికుల సౌకర్యాన్ని మరింతగా మెరుగుపరచడంలో భాగంగా ఈ మార్గంలో రాకపోకలు సాగించే ఎక్స్‌ప్రెస్ వేగాన్ని పెంచాలని నిర్ణయించింది. దీంతో కాచిగూడ- అశోకపురం (మైసూరు) మధ్య నడిచే డైలీ ఎక్స్‌ప్రెస్ ప్రయాణ సమయం దాదాపు గంట వరకు తగ్గుతుంది. ఈ మార్పులు ఆగస్టు 25 నుంచి అందుబాటులోకి వస్తాయి.కాచిగూడ- అశోకపురం (మైసూరు) మధ్య దూరం 763 కిలోమీటర్లు. ఈ దూరాన్ని అధిగమించడానికి ప్రస్తుతం నంబర్ 12785 కాచిగూడ - అశోకపురం ఎక్స్‌ప్రెస్ ప్రయాణ సమయం 14 గంటల 45 నిమిషాలు తీసుకుంటోంది. ఈ రైలు సగటు వేగం గంటకు 51.74 కిలోమీటర్లు. దీన్ని 13 గంటల 50 నిమిషాలకు తగ్గించేలా దక్షిణ మధ్య రైల్వే నిర్ణయం తీసుకుంది. రైలు సగటు వేగాన్ని గంటకు 55.17 కిలోమీటర్లకు పెంచింది దక్షిణ మధ్య రైల్వే.ఈ మార్పుల వల్ల ప్రయాణికులకు ఒక గంట సమయం ఆదా అవుతుంది. ఇది ఆగస్టు 25 నుంచి అమలులోకి వస్తుంది. నంబర్ 12785 ఎక్స్ ప్రెస్ కాచిగూడ నుంచి సాయంత్రం 7:05 నిమిషాలకు బదులుగా 7:45 నిమిషాలకు బయలుదేరుతుంది. మరుసటి రోజు ఉదయం 9:55 గంటల కంటే ముందే అంటే ఉదయం 09:35 నిమిషాలకే అశోకపురానికి చేరుకుంటుంది.అశోకపురం నుంచి కాచిగూడ వైపు వచ్చే నంబర్ 12786 ఎక్స్ ప్రెస్ వేగం కూడా గణనీయంగా పెరుగనుంది. ఈ రైలు ప్రస్తుతం తన ప్రయాణాన్ని పూర్తి చేయడానికి 14 గంటల 45 నిమిషాల సమయం తీసుకుంటుంది. సవరించిన వేగ పరిమితి నేపథ్యంలో 13 గంటల 50 నిమిషాల్లోనే గమ్యం చేరుకుంటుంది. 55 నిమిషాల సమయం రైల్వే ప్రయాణికులకు కలిసి రానుంది.ఈ రైలు అశోకపురం నుంచి మధ్యాహ్నం 2:55 నిమిషాలకు యథావిధిగా బయలుదేరుతుంది. మరుసటి రోజు తెల్లవారు జామున 5:40 గంటలకు బదులు తెల్లవారుజామున 4:45 నిమిషాలకే కాచిగూడ చేరుకుంటుంది.జడ్చర్ల, మహబూబ్ నగర్, గద్వాల, కర్నూలు సిటీ, డోన్, గుత్తి, అనంతపురం, ధర్మవరం, పెనుకొండ, హిందూపురం, గౌరిబిదనూరు, దొడ్డబళ్లాపుర, యలహంక, బెంగళూరు ఈస్ట్, బెంగళూరు కంటోన్మెంట్, కేఎస్ఆర్ బెంగళూరు, కెంగేరి, రామనగర, మండ్య, మైసూరు మీదుగా ఈ ఎక్స్ ప్రెస్ రాకపోకలు సాగిస్తుంది. రైలు వేగం పెరిగిన నేపథ్యంలో ఆయా స్టేషన్ల రాక/పోకల సమయంలో కూడా మార్పులు చోటు చేసుకున్నాయి.