బ్రేకప్ బాధను పోగొట్టాలంటే

ఇక వివిధ కారణాల వల్ల ఇద్దరూ విడిపోయినా.. పిల్లలు ఆ బాధ నుంచి బయటపడే క్రమంలో తల్లిదండ్రులు అండగా నిలవడం ముఖ్యమంటున్నారు నిపుణులు.

ప్రేమన్నా, బ్రేకప్‌ అన్నా.. చాలామంది తల్లిదండ్రులు ఈ విషయాన్ని జీర్ణించుకోలేరు.. అంగీకరించరు కూడా! పైగా ఈ క్రమంలో వాళ్లేదో తప్పు చేసినట్లుగా భావిస్తారు. అందుకే ప్రేమలో విఫలమయ్యారని తెలిసినా, పిల్లలే నోరు తెరిచి చెప్పినా చీవాట్లు పెడతారు. నిజానికి ఇలా చేయడం మంచిది కాదంటున్నారు నిపుణులు. ఇలాంటి సమయంలో పిల్లలతో ఎంత స్నేహంగా ఉంటే.. వాళ్లు తమ బాధను అంత సునాయాసంగా పంచుకోగలుగుతారని, తద్వారా ఆ మానసిక వేదన నుంచి త్వరగా బయటపడే అవకాశం ఉంటుందంటున్నారు. కాబట్టి పేరెంట్స్ ఇలాంటి పిల్లలతో ఓదార్పునిచ్చే మాటలు మాట్లాడాలి. తద్వారా బ్రేకప్‌ బాధ నుంచి త్వరగా బయటపడి తమ భవిష్యత్తుపై తిరిగి దృష్టి పెట్టగలుగుతారు.

మనసులోని బాధను పంచుకున్నప్పుడే గుండె భారం దిగుతుందంటారు. అయితే పిల్లలు తమ మనసులోని మాటలు చెబుతున్నప్పుడు చాలామంది తల్లిదండ్రులకు వినే ఓపిక ఉండదు. వాళ్ల మాటలు వినేదేంటన్న ఉద్దేశంతో మధ్యలోనే ఆ టాపిక్‌ కట్‌ చేయడం, లేనిపోని నియమాలన్నీ వారిపై రుద్దడం చేస్తుంటారు. అయితే అసలే బ్రేకప్‌ బాధలో ఉన్న పిల్లలతో ఇలాంటి ప్రవర్తన తగదంటున్నారు నిపుణులు. తమ ప్రేమ, బ్రేకప్‌కు దారి తీసిన కారణాల గురించి అసలు వాళ్లేం చెప్పాలనుకుంటున్నారో ముందు ఓపికతో వినడం మంచిది. తద్వారా వాళ్లు ఏదీ దాచుకోకుండా అన్ని విషయాలు మీతో పంచుకునే అవకాశం వారికి దొరుకుతుంది.

కొంతమంది తమ ప్రేమ, బ్రేకప్‌.. వంటి అంశాల గురించీ సోషల్‌ మీడియా వేదికగా పంచుకోవడానికి ఆసక్తి చూపుతుంటారు. ఈ పొరపాటును చేయకుండా తల్లిదండ్రులే తమ పిల్లల్ని అదుపు చేయాలంటున్నారు నిపుణులు.

కెరీర్‌, ఇతర బాధ్యతల రీత్యా చాలామంది తల్లిదండ్రులు పిల్లలతో ఎక్కువ సమయం గడపలేకపోతున్నారు. కానీ బ్రేకప్‌ బాధలో కూరుకుపోయిన టీనేజ్‌ పిల్లల విషయంలోనూ ఇలాంటి నిర్లక్ష్యం తగదంటున్నారు నిపుణులు. ఈ క్రమంలో వాళ్లకు మరింత సమయం కేటాయించి.. ఆ బాధ నుంచి వాళ్ల మనసు మళ్లించే ప్రయత్నం చేయడం మంచిది. ఇందులో భాగంగా.. వీలైతే కుటుంబమంతా కలిసి వెకేషన్‌కు వెళ్లడం, పిల్లల్ని తమకు నచ్చిన అంశాల్లో ప్రోత్సహించడం, యోగా-మెడిటేషన్‌కు సంబంధించిన తరగతుల్లో వారిని చేర్పించడం.. వంటివి చేయాలి. ఇవన్నీ వారికి మానసికోల్లాసాన్ని కలిగించేవే!

అయితే బ్రేకప్‌ బాధ నుంచి పిల్లలు త్వరగా బయటపడేందుకు వారికి అన్ని విషయాల్లో అండగా ఉన్నప్పటికీ.. వాళ్లు ఒంటరిగా, ముభావంగా కనిపించడం.. ఎవరితోనూ కలవడానికి ఆసక్తి చూపకపోవడం.. వంటి లక్షణాలు కనిపిస్తే మాత్రం మానసిక నిపుణుల వద్ద వారికి కౌన్సెలింగ్‌ ఇప్పించడం మంచిది. తద్వారా వారిలో సానుకూల మార్పులు తీసుకురావచ్చు.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

For digital advertisements Contact : 040 - 23318181 eMail: marketing@eenadu.in

This website follows the DNPA Code of Ethics.