అరుదైన గురు పుష్య యోగం వచ్చేసింది.. ఉద్యోగం, ధనం, ఆస్తి యోగం ఎవరికి
TV9 Telugu
జ్యోతిష్య శాస్త్రం ప్రకారం గ్రహాల సంచారం, దృష్టి, కలయికల వల్ల ఏర్పడే కొన్ని యోగాలు అత్యంత శుభప్రదమైనవిగా భావిస్తారు. అలాంటి అరుదైన యోగాల్లో గురు పుష్య మహాయోగం ఒకటి. 2026లో ఈ మహాయోగం ఏకంగా 61 రోజుల పాటు కొనసాగడం విశేషంగా చెప్పబడుతోంది.
జూన్ 18 గురువారం రాత్రి 9:32 గంటలకు ప్రారంభమై, ఆగస్టు 19 బుధవారం తెల్లవారుజామున 3:37 గంటలకు ముగియనుంది. ప్రముఖ జ్యోతిష్యుడు, వాస్తుశిల్పి డాక్టర్ బసవరాజ్ గురూజీ తన ఆధ్యాత్మిక కార్యక్రమంలో ఈ యోగం ప్రాముఖ్యతను వివరించారు. జ్యోతిష్య శాస్త్రంలో గురు గ్రహం ధర్మానికి, శని గ్రహం కర్మకు కారకులుగా పరిగణించబడతారు.
పుష్య నక్షత్రానికి అధిపతి శని కావడంతో, గురు-పుష్య కలయిక ధర్మం, కర్మల సమన్వయానికి ప్రతీకగా భావిస్తారు. ఈ కారణంగా ఈ యోగాన్ని న్యాయం, అదృష్టం, ఆధ్యాత్మిక పురోగతిని ప్రసాదించే మహాయోగంగా పేర్కొంటారు. శుభఫలితాలు పొందనున్న ఆరు రాశుల గురించి తెలుసుకుందాం.
తులా రాశి.. దశమ స్థానంలో గురు పుష్య యోగ ప్రభావం వల్ల ఉద్యోగంలో పురోగతి, పదోన్నతులు, వ్యాపార లాభాలు కనిపిస్తాయి. బాధ్యతలు పెరిగినా విజయాలు కూడా అదే స్థాయిలో ఉంటాయి. వృశ్చిక రాశి.. అదృష్ట స్థానంలో ఈ యోగం ఏర్పడటంతో ఆకస్మిక ధనలాభం, న్యాయపరమైన విజయాలు, ఇల్లు లేదా స్థలం కొనుగోలు యోగం ఏర్పడే అవకాశం ఉంది.
ధార్మిక కార్యక్రమాల్లో పాల్గొనడం శుభప్రదం. ధనుస్సు రాశి.. వృత్తి, ఆర్థిక రంగాల్లో సానుకూల మార్పులు చోటుచేసుకోవచ్చు. స్థిరాస్తుల సముపార్జన, అపవాదుల నుంచి విముక్తి, మానసిక ప్రశాంతత లభించే సూచనలు ఉన్నాయి. మకర రాశి.. భాగస్వామ్య వ్యాపారాలు, వివాహ సంబంధ విషయాలు, కోర్టు వ్యవహారాల్లో అనుకూల పరిణామాలు కనిపించవచ్చు.
ఉద్యోగ మార్పు లేదా పదవి మార్పు అవకాశాలు కూడా ఉన్నాయి. కుంభ రాశి.. ఆరోగ్య పరిస్థితులు మెరుగుపడే అవకాశం ఉంది. అప్పులు తగ్గడం, ఉద్యోగ అవకాశాలు పెరగడం, విదేశీ ప్రయాణ యోగాలు కలుగుతాయి. క్రమశిక్షణ పాటిస్తే మరింత మంచి
ఫలితాలు పొందవచ్చు.
మీన రాశి.. విద్య, సంతానం, వ్యవసాయం, వ్యాపార రంగాల్లో లాభదాయక పరిస్థితులు ఏర్పడతాయి. శుభకార్యాల్లో పాల్గొనే అవకాశం, ఆస్తి కొనుగోలు యోగం, శత్రువులు మిత్రులుగా మారే పరిస్థితులు కనిపించవచ్చు. ఈ 61 రోజుల కాలంలో వివాహాలు, గృహప్రవేశాలు నిర్వహించడానికి అనుకూల సమయం. కొత్త వ్యాపారాల ప్రారంభానికి శుభయోగం. విద్య, ఉద్యోగ, వ్యాపార రంగాల్లో పురోగతి. ధార్మిక కార్యక్రమాలకు విశేష ఫలితాలు.ఆస్తుల కొనుగోలు, పెట్టుబడులకు అనుకూల పరిస్థితులు ఉంటాయి.
ఇతర రాశుల పరిస్థితి ఎలా ఉంటుంది?.. మేష, వృషభ, మిథున, కర్కాటక, సింహ, కన్య రాశుల వారికి ఈ యోగం ప్రత్యక్షంగా పెద్ద శుభఫలితాలు ఇవ్వకపోయినా, ధార్మికత, క్రమశిక్షణ, సత్కార్యాలను అనుసరించడం ద్వారా అనుకూల ఫలితాలను పొందే అవకాశం ఉందని జ్యోతిష్య నిపుణులు చెబుతున్నారు. (Disclaimer: ఇక్కడ అందించిన సమాచారం జ్యోతిష్యం, సాధారణ నమ్మకాల ఆధారంగా మాత్రమే అందించబడింది. ఈ సమాచారం ఖచ్చితంగా నిజం లేదా శాస్త్రీయంగా నిర్ధారితమైన సమాచారం అని భావించకండి. వ్యక్తిగత నిర్ణయాలు తీసుకునే ముందు సంబంధిత నిపుణులను సంప్రదించడం మంచిది.)