ముక్కు మొహం తెలియని వాళ్లతో ముద్దులు.. సింగర్ సునీత బిగ్ స్టేట్మెంట్

గాయని సునీత గురించి తెలుగు ప్రేక్షకులకు ప్రత్యేకంగా చెప్పాల్సిన అవసరం లేదు. తన మధురమైన గాత్రంతో ఎన్నో సూపర్ హిట్ పాటలు పాడి అభిమానుల మనసులు గెలుచుకున్నారు. గాయని మాత్రమే కాకుండా డబ్బింగ్ ఆర్టిస్ట్‌గా కూడా ఆమె మంచి గుర్తింపు సంపాదించారు.

తాజాగా సునీత ఒక పోడ్‌కాస్ట్‌లో పాల్గొన్నారు. ఈ సందర్భంగా వివాహాలు, ప్రేమ, కుటుంబ జీవితం గురించి ఆసక్తికర వ్యాఖ్యలు చేశారు. ప్రస్తుతం ఆమె చేసిన కామెంట్స్ సోషల్ మీడియాలో వైరల్ అవుతున్నాయి. పోడ్‌కాస్ట్‌లో యాంకర్ మాట్లాడుతూ అరేంజ్డ్ మ్యారేజ్ గురించి తన అభిప్రాయాన్ని వెల్లడించారు. "లవ్ మ్యారేజ్ అయితే ఒకరినొకరు బాగా తెలుసుకుని పెళ్లి చేసుకుంటారు. కానీ అరేంజ్డ్ మ్యారేజ్‌లో పూర్తిగా తెలియని వ్యక్తితో జీవితాంతం కలిసి ఉండాలని ఎలా నిర్ణయించుకుంటారు?" అని ప్రశ్నించారు.

దీనికి స్పందించిన సునీత ఆసక్తికర సమాధానం ఇచ్చారు. "అలా అయితే ముక్కు మొహం కూడా సరిగా తెలియని వ్యక్తులతో ప్రేమలో పడటం, ముద్దులు పెట్టుకోవడం ఎలా జరుగుతుంది అని కూడా అడగాలి" అంటూ నవ్వుతూ చెప్పారు.

అంతేకాకుండా తన మాట పెద్ద స్టేట్మెంట్ అవుతుందని తెలిసినా నిజం చెప్పాలని అనిపించిందని అన్నారు. ప్రేమ వివాహం అయినా, అరేంజ్డ్ మ్యారేజ్ అయినా చివరికి ఇద్దరు వ్యక్తులు ఒకరినొకరు అర్థం చేసుకోవడమే ముఖ్యమని వివరించారు.అరేంజ్డ్ మ్యారేజ్ అంటే వెంటనే పెళ్లి చేసుకోవడం కాదని సునీత చెప్పారు. కుటుంబ సభ్యుల ద్వారా పరిచయం అయిన తర్వాత కొంతకాలం మాట్లాడుకునే అవకాశం ఉంటుందని, ఆ సమయంలో ఒకరి గురించి మరొకరు తెలుసుకునే అవకాశం లభిస్తుందని అన్నారు.

ప్రేమ వివాహాల్లో కూడా మొదట పరిచయం ఏర్పడి తర్వాత బంధం బలపడినట్లే, అరేంజ్డ్ మ్యారేజ్‌లో కూడా క్రమంగా అవగాహన పెరుగుతుందని ఆమె అభిప్రాయపడ్డారు. అందువల్ల ఏ వివాహమైనా పరస్పర నమ్మకం, గౌరవం, అర్థం చేసుకోవడం మీదే నిలబడుతుందని చెప్పారు. సునీత చేసిన ఈ వ్యాఖ్యలు ప్రస్తుతం సోషల్ మీడియాలో చర్చనీయాంశంగా మారాయి. చాలా మంది ఆమె అభిప్రాయానికి మద్దతు ఇస్తుండగా, మరికొందరు తమ తమ అభిప్రాయాలను వ్యక్తం చేస్తున్నారు.