తెలంగాణ నుంచి మూడో మంత్రి

రాష్ట్రం నుంచి కేంద్ర క్యాబినెట్‌లో మరొకరికి అవకాశం లభిస్తుందా, లేక ప్రస్తుతం ఉన్న ఇద్దరితోనే సరిపెడతారా అనే అంశంపై రాష్ట్ర బీజేపీ వర్గాల్లో విస్తృతంగా చర్చ జరుగుతోంది. ఈ మార్పులు, చేర్పుల ప్రచారం నేపథ్యంలో రాష్ట్రానికి చెందిన పలువురు బీజేపీ ఎంపీలు తమ అదృష్టాన్ని పరీక్షించుకునేందుకు తీవ్ర ప్రయత్నాలు ప్రారంభిస్తున్నారు. ఢిల్లీ స్థాయిలో తమకు అనుకూలంగా సమీకరణాలను చక్కబెట్టుకునే పనిలో పడ్డారు.

గత లోక్‌సభ ఎన్నికల్లో తెలంగాణ నుంచి ఊహించని విధంగా ఎనిమిది స్థానాలను కైవసం చేసుకుంది కమలం పార్టీ. దీనికి అదనంగా లక్ష్మణ్ ఉత్తరప్రదేశ్ నుంచి రాజ్యసభ సభ్యునిగా ప్రాతినిధ్యం వహిస్తున్నారు. ప్రస్తుతం రాష్ట్రం నుంచి కిషన్ రెడ్డి కేంద్ర క్యాబినెట్ మంత్రిగా, బండి సంజయ్ సహాయ మంత్రిగా బాధ్యతలు నిర్వర్తిస్తున్నారు. దక్షిణాది రాష్ట్రాల్లో కర్ణాటక తర్వాత తెలంగాణలోనే పార్టీ అధికారంలోకి రావడానికి ఎక్కువ అవకాశాలు ఉన్నాయని బీజేపీ జాతీయ నాయకత్వం బలంగా విశ్వసిస్తోంది. వచ్చే అసెంబ్లీ ఎన్నికల్లో ఎలాగైనా తెలంగాణలో పాగా వేయడమే లక్ష్యంగా కేంద్ర మంత్రులు, జాతీయ నేతలు రాష్ట్రంలో నిరంతరం పర్యటిస్తున్నారు. ఈ తరుణంలో, రాష్ట్రంలోని ముఖ్య నాయకుల మధ్య ఉన్న అంతర్గత విభేదాలను సమూలంగా పరిష్కరించి, కేడర్‌లో కొత్త ఉత్సాహాన్ని నింపడానికి మరో మంత్రి పదవిని కేటాయించడం దోహదపడుతుందని అధిష్ఠానం భావిస్తున్నట్లు సమాచారం.

తెలంగాణ నుంచి ప్రస్తుతం ఒక క్యాబినెట్, ఒక సహాయ మంత్రి పదవులు ఉండగా, రాబోయే ఎన్నికల వ్యూహంలో భాగంగా మూడో వ్యక్తికి అవకాశం కల్పించడం ద్వారా సామాజిక సమతుల్యతను సాధించాలని అధిష్ఠానం యోచిస్తోంది. మంత్రివర్గ విస్తరణలో చోటు దక్కించుకునేందుకు పలువురు సీనియర్ నాయకులు ఎవరి ధీమాతో వారు ఉన్నారు. ప్రధానంగా ఈటల రాజేందర్, డి.కె.అరుణ, ధర్మపురి అర్వింద్, జి.నగేశ్ తదితరుల పేర్లు ప్రచారంలో ఉన్నాయి.

అయితే., ఈటల రాజేందర్, డీకే అరుణ రేసులో ముందు వరుసలో ఉన్నట్లు పార్టీ వర్గాల సమాచారం. ఇప్పటికే బీసీ సామాజిక వర్గం నుంచి బండి సంజయ్ మంత్రివర్గంలో ఉన్నప్పటికీ, బలమైన ముదిరాజ్ సామాజిక వర్గానికి చెందిన ఈటల రాజేందర్‌కు అవకాశం కల్పిస్తే రాష్ట్రంలో రాజకీయంగా పెద్ద ఎత్తున కలిసి వస్తుందని భావిస్తున్నారు. మరోవైపు మహబూబ్‌నగర్ ఎంపీ డీకే అరుణ సైతం ఈసారి గట్టి ఆశలతో ఉన్నారు. ఈ విస్తరణలో మహిళలకు ప్రాధాన్యత పెరిగే అవకాశం ఉండటం, పైగా ముఖ్యమంత్రి సొంత జిల్లా అయిన ఉమ్మడి మహబూబ్‌నగర్‌లో కాంగ్రెస్ గట్టి పోటీని తట్టుకుని ఆమె విజయం సాధించడంతో ఆమె పేరును అధిష్ఠానం తీవ్రంగా పరిశీలిస్తున్నట్లు ప్రచారం సాగుతోంది.

అయితే, డీకే అరుణ ప్రాతినిధ్యం వహిస్తున్న సామాజిక వర్గం నుంచే ఇప్పటికే కిషన్ రెడ్డి క్యాబినెట్ మంత్రిగా అత్యంత కీలక బాధ్యతల్లో ఉన్నారు. అలాగే శాసనసభలో పార్టీ పక్ష నేత కూడా రెడ్డి సామాజిక వర్గానికి చెందిన వారు కావడంతో, ఒకే సమీకరణం నుంచి మరో వ్యక్తిని కేంద్ర మంత్రివర్గంలోకి తీసుకుంటారా అనే సందేహాలు కూడా వ్యక్తమవుతున్నాయి. ఈ నేపథ్యంలో ఇప్పటికే ఓసీ, బీసీ వర్గాలకు కేంద్రంలో చోటు దక్కినందున, గిరిజన ఓటు బ్యాంకును ఆకర్షించేందుకు ఆదిలాబాద్ ఎంపీ జి.నగేశ్‌కు అవకాశం ఇవ్వవచ్చనే ప్రచారం కూడా ఊపందుకుంది. మరోవైపు నిజామాబాద్ ఎంపీ ధర్మపురి అర్వింద్ సైతం తనదైన శైలిలో గట్టి నమ్మకంతో ప్రయత్నాలు సాగిస్తున్నారు.

మొత్తంమీద, తెలంగాణలో పార్టీని మరింత బలోపేతం చేసేందుకు ప్రస్తుతమున్న మంత్రులలో ఎటువంటి మార్పులు చేయకుండానే, అదనంగా మరొకరికి అవకాశం కల్పించే వ్యూహాన్ని అధిష్ఠానం అమలు చేసే సూచనలు కనిపిస్తున్నాయి. అయితే, బీజేపీ జాతీయ నాయకత్వం చివరి నిమిషంలో నిర్ణయాలు మార్చడంలో ప్రసిద్ధి చెందినందున, ఈ విస్తరణ ప్రక్రియ పూర్తయ్యే వరకు ఉత్కంఠ కొనసాగడం ఖాయమని రాజకీయ విశ్లేషకులు భావిస్తున్నారు.