బీహార్ లో లగ్జరీ.. అమెరికాలో సాధారణం.. వైరల్ అవుతున్న బీహారీ యువకుడి వీడియో

ప్రస్తుతం అమెరికాలో నివసిస్తున్న అర్హమ్ ఇస్తేయాక్ అనే ఈ యువకుడు, "బీహార్‌లోని సగటు జీవితం వర్సెస్ అమెరికాలోని సగటు జీవితం. ఒకే వ్యక్తి.. పూర్తిగా భిన్నమైన వాస్తవికత" అనే క్యాప్షన్‌తో ఇన్‌స్టాగ్రామ్‌లో ఈ వీడియోను పంచుకున్నాడు.ఈ వీడియోలో అర్హమ్ మాట్లాడుతూ, తాను మంచి ఉద్యోగంలో ఉండటం, అధునాతన ఐఫోన్ వాడటం, తరచూ ప్రయాణాలు చేయడం చూసి భారత్‌లోని తన బంధువులు, స్నేహితులు తాను జీవితంలో పూర్తిగా స్థిరపడిపోయానని, గొప్ప విజయం సాధించానని భావిస్తున్నారని తెలిపాడు. అయితే, వాస్తవానికి అమెరికాలో ఇవన్నీ చాలా సాధారణ విషయాలని, అక్కడి సగటు పౌరుడికి ఇవి నిత్యకృత్యమని పేర్కొన్నాడు. ఈ తరహా జీవనశైలి అక్కడ ఆశించదగిన గొప్ప విషయమేమీ కాదని, అది సర్వసాధారణమని అతను వివరించాడు.ఈ వీడియోపై నెటిజన్ల నుంచి విశేష స్పందన లభిస్తోంది. భారత్‌లో జీవన ప్రమాణాలు, సామాజికాభివృద్ధిపై మరింత దృష్టి సారించాల్సిన అవసరం ఉందని పలువురు అభిప్రాయపడుతున్నారు. మెరుగైన ఆర్థిక అవకాశాలు, ఉన్నత జీవన ప్రమాణాల కోసం విదేశాలకు వెళ్లే అనేకమంది భారతీయుల వాస్తవిక అనుభవాలకు ఈ వీడియో అద్దం పడుతోంది.