పెళ్లి రద్దుకు కారణమైన ప్రీ వెడ్డింగ్ షూట్.. అసలేం జరిగిందంటే

ఆ ఫోటోలు సోషల్ మీడియాలో ప్రచారం కావడంతో ఈ వ్యవహారం అధికారుల దృష్టికి వెళ్లింది. ఫోటోల్లో కనిపించిన యువతి వయస్సు అనుమానాస్పదంగా ఉండటంతో అధికారులు వెంటనే విచారణ ప్రారంభించారు.

విచారణలో 23 ఏళ్ల యువకుడికి కేవలం 15 ఏళ్ల బాలికతో వివాహం నిశ్చయమైనట్లు బయటపడింది. పెళ్లి కోసం కుటుంబ సభ్యులు ఏర్పాట్లు కూడా చేస్తున్నట్లు సమాచారం. అయితే అధికారికంగా వివాహం ఇంకా జరగలేదు. ప్రీ-వెడ్డింగ్ షూట్ పూర్తయిన తర్వాత పెళ్లి కార్యక్రమం నిర్వహించేందుకు సన్నాహాలు కొనసాగుతున్న సమయంలో ఈ విషయం వెలుగులోకి వచ్చింది.

సోషల్ మీడియాలో చక్కర్లు కొడుతున్న ఫోటోలు జిల్లా కలెక్టర్ వివేక్ జాన్సన్ దృష్టికి చేరాయి. విషయం తీవ్రతను గుర్తించిన ఆయన వెంటనే మహిళా, శిశు సంక్షేమ శాఖ అధికారులను అప్రమత్తం చేశారు. అధికారుల బృందం బాలిక నివాస గ్రామానికి చేరుకుని పరిస్థితిని పరిశీలించింది. బాలిక వయస్సుకు సంబంధించిన పత్రాలను తనిఖీ చేసి, ఆమె మైనర్ అని నిర్ధారించింది.

అధికారులు గ్రామానికి చేరుకునే సమయానికి వివాహం జరిగినట్లు ఎలాంటి ఆధారాలు కనిపించలేదు. అయితే బాలిక చేతిపై వరుడి పేరుతో గోరింటాకు ఉండటం, పెళ్లి ఏర్పాట్లు జరుగుతున్న సంకేతాలు కనిపించాయి. దీంతో వెంటనే వివాహ ప్రక్రియను నిలిపివేశారు. బాలికను రక్షణలోకి తీసుకుని ఆమె భద్రత కోసం అవసరమైన చర్యలు చేపట్టారు. బాల్య వివాహం జరగకుండా ముందుగానే అడ్డుకోవడంతో అధికారులు ఊపిరి పీల్చుకున్నారు.

ఈ ఘటనపై సమగ్ర విచారణ ప్రారంభించిన అధికారులు బాల్య వివాహానికి ప్రయత్నించిన వారిపై చట్టపరమైన చర్యలు తీసుకునే దిశగా ముందుకు సాగుతున్నారు. బాల్య వివాహ నిరోధక చట్టం ప్రకారం మైనర్ బాలిక వివాహం జరపడం నేరంగా ప‌రిగ‌ణిస్తున్నారు. ఈ సంఘటన మరోసారి సోషల్ మీడియా కూడా సామాజిక బాధ్యతలో కీలక పాత్ర పోషించగలదని చూపించింది. ఒక సాధారణ ప్రీ-వెడ్డింగ్ షూట్ ఫోటో అధికారుల దృష్టికి చేరడంతో ఓ బాలిక జీవితాన్ని ప్రభావితం చేసే బాల్య వివాహం ఆగిపోయింది. బాల్య వివాహాల నిర్మూలన కోసం సమాజం అప్రమత్తంగా ఉండాల్సిన అవసరాన్ని ఈ ఘటన స్పష్టం చేసింది.