ఇప్పుడే’ అనే క్షణంలో జీవించడమే యోగం.. గురుదేవ్ శ్రీ శ్రీ రవిశంకర్

యోగాన్ని నేర్చుకోవాలంటే మూడేళ్ల చిన్నారిని జాగ్రత్తగా గమనించాలని, అతడు గతం, భవిష్యత్తులో జీవించడని, కేవలం ఇప్పుడు అనే క్షణంలోనే జీవిస్తాడని అదే యోగమని అన్నారు. ప్రేమకూ, మాటలకూ తమదైన శక్తి ఉంటుందని గురుదేవ్ చెప్పారు.‘‘సాధారణంగా ప్రజలు జీవితంలో గాయపడినప్పుడు, నిరాశ, ఒత్తిడి లేదా అంతర్గత శూన్యతను అనుభవిస్తున్నప్పుడు ఆధ్యాత్మిక మార్గాన్ని ఆశ్రయిస్తారు. అయితే ఆధ్యాత్మిక ప్రయాణం కేవలం కష్టాల వల్ల మాత్రమే ప్రారంభం కావాల్సిన అవసరం లేదు. నిజానికి, ఒక యోగి ఎన్నో ఏళ్ల సాధన ద్వారా వెతికి తెలుసుకునే ఆధ్యాత్మిక జ్ఞానంతో ప్రతి శిశువూ జన్మిస్తుంది. ఒక శిశువు శ్వాస తీసుకునే విధానం, అతని చిరునవ్వు, అంతేకాక అతని ఏడుపు కూడా లోతైన పవిత్రతతో నిండి ఉంటాయి. అతను ప్రతి క్షణాన్ని సంపూర్ణ జాగరూకతతో జీవిస్తాడు. అతనికి ప్రత్యేకమైన పద్ధతులు అవసరం లేదు; ఎలాంటి సాధన చేయాల్సిన అవసరం లేదు. తన సహజ స్వరూపంలోనే అతను ఒక యోగి.మనం పెద్దవుతున్న కొద్దీ, సమాజం, విద్య, అంచనాలు, అహంకారం వంటి అనేక పొరలు మనలోని ఆ సహజత్వాన్ని కప్పివేస్తాయి. సరళతలోనే పరిపూర్ణత ఉందనే విషయాన్ని మనం మరిచిపోతాం... ఒక యోగి ప్రయాణం కూడా చివరికి ఇదే లక్ష్యాన్ని చేరుకోవడం కోసం స్వచ్ఛమైన ప్రేమతో, సహజత్వంతో, నిజాయితీతో జీవించిన తనలోని ఆ ‘అంతర్గత బాలుడి’ వద్దకు తిరిగి చేరుకోవడం.యోగాన్ని నేర్చుకోవాలంటే, మూడేళ్ల చిన్నారిని జాగ్రత్తగా గమనించండి. అతను శ్వాస తీసుకునే విధానం, అతని చిరునవ్వు, అతని స్పందనలు ప్రతి విషయమూ తనతో, ఇతరులతో, మొత్తం సృష్టితో ఒక సజీవ అనుసంధానాన్ని వ్యక్తపరుస్తాయి. అతను గతంలో జీవించడు; భవిష్యత్తులో కూడా జీవించడు. అతను కేవలం ‘ఇప్పుడే’ అనే క్షణంలో జీవిస్తాడు. అదే యోగం.కొన్ని మినహాయింపులు తప్ప, ఎక్కువ మంది పిల్లల్లో మనం జీవితపు పరుగులో కోల్పోయే సహజత్వం, అమాయకత్వం ఉంటాయి. వారు ద్వేషాన్ని పెంచుకోరు. అపశబ్దాలు మాట్లాడరు. ఎవరినీ బాధపెట్టాలనే ఉద్దేశం ఉండదు. వారి కోపంలో కూడా అమాయకత్వం ఉంటుంది; వారి ప్రేమలో సంపూర్ణత ఉంటుంది.పిల్లల్లో ఒక సహజ నిరాసక్తత ఉంటుంది. దీనినే అనేక మంది సాధకులు ‘త్యాగం’ అని పిలుస్తారు. ఒక తపస్వి, ‘నేను ప్రపంచాన్ని త్యజించాను’ అని చెప్పవచ్చు. కానీ ఒక పిల్లవాడు ఏమీ చెప్పకుండా త్యాగంలోనే జీవిస్తాడు, ఎందుకంటే అతనిలో అధిక కోరికలు ఉండవు. అతనిని, ‘నీకు ఏమి కావాలి?’ అని అడిగితే, అతను చిరునవ్వుతో, ‘ఏమీ వద్దు’ అని చెప్పే అవకాశం ఎక్కువ. మనము ఆ స్థితిలో ఉన్నప్పుడు, మన కర్మలు ఆనందానికి వ్యక్తీకరణలుగా మారుతాయి. కోరికలు వెనుకబడిపోతాయి. అదే యోగ స్థితి.ప్రేమకూ, మాటలకూ తమదైన శక్తి ఉంటుంది. ఒక కఠినమైన మాట ఒక వ్యక్తిని గాయపరచగలిగితే, ఒక మృదువైన మాట అతడి హృదయాన్ని లోతుగా తాకగలదు. ఈ సత్యాన్ని ఒక చిన్నారి సహజంగానే జీవిస్తాడు. అతను చెప్పేది మాయ లేకుండా, నటన లేకుండా చెబుతాడు. అతను చేసే ప్రతి పనిలో సంపూర్ణమైన ఉనికి ఉంటుంది.ఒకసారి ఒక భక్తుడు ఒక స్వామిని అడిగాడు ‘దైవనామాన్ని జపించడం, పాడడం వల్ల ఏమి ప్రయోజనం? నేను ‘గాడిద’ అని లేదా ఇంకేదైనా పదం చెప్పవచ్చుకదా!’ ఆ రోజు స్వామి ఏమీ మాట్లాడలేదు. మర్నాడు ఆ భక్తుడిని పిలిచి, ‘నీ తండ్రి గాడిద!’ అని తిట్టడం ప్రారంభించారు. మళ్లీ మళ్లీ అదే మాట అన్నారు. వెంటనే ఆ భక్తుడి ముఖం కోపంతో ఎర్రబడిపోయింది. అతను ఆగ్రహంతో,‘ఇలాంటి మాటలు చెప్పడానికి మీకు ఎలా ధైర్యం వచ్చింది?’ అని ప్రశ్నించాడు. అతని రక్తపోటు కూడా పెరిగింది.అప్పుడు స్వామి ప్రశాంతంగా ఇలా అన్నారు ‘‘నేను నీ తండ్రిని గాడిద అని పిలిచిన ఒక మాటే నీపై ఇంత ప్రభావం చూపింది. మరి మంచి మాటలు ప్రభావం చూపవని ఎందుకు అనుకుంటున్నావు?’’ అందువల్ల మాటలకు అపారమైన శక్తి ఉంది. ఒకవేళ పొరపాటున మీ నోటి నుంచి ఎవరికైనా హాని కలిగించే మాటలు లేదా చెడు ఆకాంక్షలు బయటకు వస్తే, వెంటనే ‘సరే, అది రద్దయింది’ అని మనసులో చెప్పుకోండి. ఆ వ్యక్తి శ్రేయస్సు కోసం ఒక ప్రార్థన చేయండి.యోగం మనకు మాటల కంటే ఉనికిని గుర్తించడం నేర్పుతుంది. మీరు ఎన్నో పుస్తకాలు చదివినా, ఎన్నో భాషలు నేర్చుకున్నా, మీ ప్రవర్తనలో ప్రేమ ప్రతిఫలించకపోతే, ఆ జ్ఞానం అసంపూర్ణమే. అందుకే యోగం ఒక సాధన అని చెప్పినప్పుడు, దాని అర్థం కేవలం ఆసనాలు లేదా ధ్యానం కాదు. అది మనలోని ఆ సహజమైన, నిర్మలమైన, ప్రేమతో నిండిన బాలుడితో మళ్లీ అనుసంధానం పొందే ప్రక్రియ. నిజమైన జ్ఞానం మన మాటలను మాత్రమే సరిచేయడం కాదు; మన ఉనికిని పవిత్రం చేయడం. అది మనల్ని అంతర్గతంగా ఆనందంగా ఉంచుతుంది.యోగం హిమాలయాల్లో ప్రారంభమయ్యే ప్రయాణం కాదు. అది మన బాల్యంలో జీవించిన ఆ స్థితిని తిరిగి గుర్తుచేసుకోవడం. అప్పట్లో మనం ప్రతి ఒక్కరినీ మనవారిగా భావించేవాళ్లం. ఎలాంటి నటన ఉండేది కాదు. మోసం ఉండేది కాదు. యోగాన్ని నిజంగా అర్థం చేసుకోవాలంటే, ఒక సిద్ధగురువును చూసే ముందు ఒక చిన్నారిని గమనించండి. అతను మీకు ఉపన్యాసం ఇవ్వడు. పుస్తకాలు తెరిచి చూపించడు. కానీ అతని అమాయకమైన చిరునవ్వు, అతని చూపు, అతని మౌనం మాటలు నేర్పలేని విషయాలను మీకు నేర్పిస్తాయి.. బాల్యం ఒక వయస్సు కాదు.. ఒక చైతన్య స్థితి. ఆ స్థితికి తిరిగి చేరడానికి యోగం అందమైన మార్గం’’ అని గురుదేవ్ అన్నారు.