ప్రపంచవ్యాప్తంగా హాట్ కేకుల్లా మారిన మన బ్రహ్మోస్ క్షిపణులు

భారత్-రష్యా సంయుక్తంగా అభివృద్ధి చేసిన 'బ్రహ్మోస్' సూపర్ సోనిక్ క్రూయిజ్ క్షిపణులను తమ సొంత సాయుధ దళాలలో చేర్చుకోవడానికి రష్యా అమితాసక్తి కనబరుస్తోంది. అంతేకాదు, ఈ బ్రహ్మోస్ క్షిపణులు ప్రస్తుతం ప్రపంచవ్యాప్తంగా హాట్ కేకుల్లా మారాయి.

నాగపూర్, జూన్ 18: భారత్, రష్యాలు సంయుక్తంగా అభివృద్ధి చేసిన ప్రపంచంలోనే అత్యంత వేగవంతమైన 'బ్రహ్మోస్' సూపర్ సోనిక్ క్రూయిజ్ క్షిపణులను తమ సొంత సాయుధ దళాలలో చేర్చుకోవడానికి రష్యా ఆసక్తిని కనబరుస్తోంది. ప్రస్తుత అంతర్జాతీయ పరిణామాలు, వ్యూహాత్మక అవసరాల దృష్ట్యా ఈ క్షిపణుల ఉత్పత్తిని భారీగా పెంచడంపై ఇరు దేశాల మధ్య ఉన్నత స్థాయి చర్చలు జరుగుతున్నాయి.

మహారాష్ట్రలోని నాగపూర్‌లో సోలార్ ఇండస్ట్రీస్ ఇండియా లిమిటెడ్ తయారు చేసిన 100వ స్వదేశీ బూస్టర్‌ను విజయవంతంగా ప్రారంభించిన సందర్భంగా బ్రహ్మోస్ ఏరోస్పేస్ చీఫ్ జైతీర్థ్ జోషి ఈ కీలక విషయాలను వెల్లడించారు. రష్యాకు ఇప్పటికే బ్రహ్మోస్ ప్రాజెక్ట్‌తో అనుబంధం ఉన్న పారిశ్రామిక భాగస్వాములు, సొంత తయారీ కేంద్రాలు ఉన్నప్పటికీ, ప్రస్తుత పరిస్థితుల దృష్ట్యా వారికి క్షిపణుల అవసరం మరింత పెరిగింది.

రష్యాలోని ప్రస్తుత తయారీ సౌకర్యాలు ఈ అదనపు డిమాండ్‌ను అందుకోవడానికి సరిపోకపోవచ్చని, అందుకే భారత రక్షణ పరిశ్రమ ఇందులో కీలక పాత్ర పోషించనుందని జోషి పేర్కొన్నారు. 'మేము రష్యాతో కలిసి పనిచేస్తాం, వారి అవసరాలకు తగ్గట్టుగా క్షిపణి వ్యవస్థలను భారతదేశం నుంచి సరఫరా చేస్తాం' అని ఆయన స్పష్టం చేశారు.

గత 25 ఏళ్లుగా సాగిన నిరంతర పరిశోధనలు, పరీక్షలు, విజయవంతమైన మోహరింపుల వల్లే అంతర్జాతీయ మార్కెట్లో బ్రహ్మోస్‌కు ఈ స్థాయి నమ్మకం ఏర్పడిందని జోషి వివరించారు. ఈ సందర్భంగా, బ్రహ్మోస్ క్షిపణి సాధించిన ఘనతను ఆయన గుర్తుచేశారు. సాధారణంగా క్షిపణులను భూమిపై లేదా నౌకల నుంచి కృత్రిమ పద్ధతిలో పరీక్షిస్తారు.