ఈపీఎఫ్ ఓకు .. రూ. 25 కోట్ల రికవరీ నోటీసు కొట్టివేత.. అసలు ఏం జరిగిందంటే

కంపెనీ తన పీఎఫ్ ట్రస్ట్ మినహాయింపు హోదాను రద్దు చేయడంతో ఈ వివాదం మొదలైంది. నిబంధనల ప్రకారం, ఒక పీఎఫ్ ట్రస్ట్ తన మినహాయింపు హోదాను కోల్పోయిన తర్వాత, అది తన మొత్తం పీఎఫ్ బ్యాలెన్స్‌ను ఈపీఎఫ్‌ఓకు బదిలీ చేయాలి. అలా చేయకుండా, కంపెనీ జూలై 21, 2023న రావుకు రూ. 2.5 కోట్లు చెల్లించిందని, ఇది ఈపీఎఫ్ చట్టంలోని నిబంధనలకు విరుద్ధమని ఈపీఎఫ్‌ఓ ఆరోపించింది. తర్వాత.. 2025 ఫిబ్రవరి 17న, రూ. 2.5 కోట్లను 12 శాతం వార్షిక వడ్డీతో పాటు 7 రోజుల్లోగా తిరిగి చెల్లించాలని కోరుతూ EPFO రావుకు నోటీసు జారీ చేసింది. కంపెనీ ఇప్పటికే తన మినహాయింపును వదులుకున్నందున, ఈ చెల్లింపు నిబంధనలకు విరుద్ధమని EPFO వాదించింది.

ఈ నోటీసుతో కలత చెందిన నృపేంద్ర రావు తెలంగాణ హైకోర్టును ఆశ్రయించారు. తనకు అందిన మొత్తం తన సొంత పీఎఫ్ వాటా అని, ఒక ఉద్యోగిగా దానిపై తనకు చట్టబద్ధమైన హక్కు ఉందని ఆయన వాదించారు. తన డబ్బును తిరిగి ఇవ్వమని డిమాండ్ చేసేందుకు ఈపీఎఫ్‌ఓకు చట్టపరమైన అధికారం లేదని కూడా ఆయన వాదించారు. నోటీసు జారీ చేయడానికి ముందు, కారణం చూపమని నోటీసు ఇవ్వలేదు. అలాగే తన వాదన వినిపించుకోవడానికి అవకాశం కూడా కల్పించలేదు. అందువల్ల, ఈ చర్య సహజ న్యాయ సూత్రాలకు విరుద్ధమని వాదించారు.

దీనిపై స్పందించిన కోర్టు విచారణ సందర్భంగా, కంపెనీ పీఎఫ్ ట్రస్ట్ 1981 నుండి మినహాయింపు కేటగిరీలో ఉందని, మార్చి 2023లో ఆ హోదాను వదులుకుందని ఈపీఎఫ్‌ఓ కోర్టుకు తెలియజేసింది. చట్టం ప్రకారం, కంపెనీ మొత్తం పీఎఫ్ మొత్తాన్ని ఈపీఎఫ్‌ఓకు బదిలీ చేయాల్సి ఉందని, కానీ అలా చేయలేదని ఈపీఎఫ్‌ఓ వాదించింది. అయితే, జస్టిస్ నాగేష్ భింపక ఈపీఎఫ్‌ఓ వాదనలను అంగీకరించలేదు. కోర్టు ఇలా పేర్కొంది. ఉద్యోగికి చెల్లించిన పీఎఫ్ లో ఏవైనా నిబంధనలు, ఉల్లంఘనలు జరిగినట్లయితే వాటికి బాధ్యత యజమాని సంస్థ లేదా దాని పీఎఫ్ ట్రస్ట్ దేనని.. ఉద్యోగిది కాదని కోర్టు తేల్చి చెప్పింది.

కేవలం కంపెనీ తప్పు చేసిందనే ఆరోపణల ఆధారంగా ఒక ఉద్యోగి నుండి పీఎఫ్ నిధులను తీసుకునేందుకు అనుమతించే స్పష్టమైన చట్టపరమైన నిబంధనను ఈపీఎఫ్ఓ ఉదహరించడంలో విఫలమైందని హైకోర్టు తన ఉత్తర్వులో పేర్కొంది. ఉద్యోగికి జరిగిన మోసం, తప్పుడు ప్రాతినిధ్యం లేదా కుమ్మక్కుకు సంబంధించిన ఆరోపణలు ఏవీ లేవని కూడా కోర్టు గమనించింది. EPFO రికవరీ నోటీసును కొట్టివేసింది. అయితే పీఎఫ్ ట్రస్ట్ రూల్స్ ఉల్లంఘించిందా లేదా అనే అంశంపై హైకోర్టు ఎలాంటి తుది అభిప్రాయాన్ని వ్యక్తం చేయలేదు. అవసరమైతే పీఎఫ్ చట్టం ప్రకారం సంస్థ లేదా దాని ట్రస్ట్ పై తగిన చర్యలు తీసుకోవచ్చని ఈపీఎఫ్ఓకు స్వేచ్చ ఇచ్చింది.

స్థానికం నుంచి అంతర్జాతీయం వరకు.. క్రీడలు, వినోదం, రాజకీయాలు, విద్య, ఉద్యోగాలు, హెల్త్, లైఫ్‌స్టైల్ .. A to Z అన్నిరకాల వార్తలను తెలుగులో పొందడం కోసం ఇప్పుడే Zee తెలుగు న్యూస్ యాప్ డౌన్‌లోడ్ చేసుకోండి.