పాక్ సంచలన జట్టు.. బాబర్, షాహీన్ లపై వేటు

సరికొత్త యువ జట్టును ప్రకటించింది. అయితే ఈ ఎంపికలో క్రికెట్ ప్రపంచాన్ని ఆశ్చర్యపరిచేలా బోర్డు భారీ మార్పులు చేసింది. జట్టులోని సీనియర్ స్టార్ ఆటగాళ్లు బాబర్ అజామ్, షాహీన్ షా అఫ్రిది, షాదాబ్ ఖాన్, సల్మాన్ అలీ ఆఘా వంటి అగ్రశ్రేణి ఆటగాళ్లకు పూర్తిగా విశ్రాంతి నిచ్చింది. ఇటీవలి కాలంలో టీ20 ప్రపంచకప్‌లో సూపర్ 8 దశలోనే వెనుతిరగడం, అలాగే ఆసియా కప్ ఫైనల్‌లో భారత్ చేతిలో ఓడిపోవడం వంటి వరుస పరాజయాల నేపథ్యంలో పాకిస్తాన్ మేనేజ్‌మెంట్ భవిష్యత్తు కోసం జట్టును పునర్నిర్మించే ప్రక్రియకు ఇక్కడి నుంచే శ్రీకారం చుట్టింది.

ఈ యువ జట్టుకు సారథిగా అనుభవజ్ఞుడైన ఓపెనింగ్ బ్యాటర్ సాహిబ్జాదా ఫర్హాన్‌ను నియమించింది. 30 ఏళ్ల ఫర్హాన్‌కు అంతర్జాతీయంగా మంచి అనుభవం ఉంది. అతను పాకిస్తాన్ తరఫున ఇప్పటివరకు 46 టీ20 ఇంటర్నేషనల్స్ ఆడి, 28.36 సగటుతో 1,305 పరుగులు చేశాడు. ఇందులో 2 సెంచరీలు, 10 హాఫ్ సెంచరీలు ఉన్నాయి. అంతేకాకుండా, ఇటీవలే ముగిసిన 2026 టీ20 ప్రపంచకప్‌లో అత్యధిక పరుగులు చేసిన ఆటగాడిగా ఫర్హాన్ నిలిచాడు. ఇన్నాళ్లూ జట్టులో కీలక పాత్ర పోషించినప్పటికీ, అతనికి కెప్టెన్సీ బాధ్యతలు అప్పగించడం ఇదే తొలిసారి. అలాగే మిడిలార్డర్ బ్యాటర్ అబ్దుల్ సమద్‌ను వైస్ కెప్టెన్‌గా నియమించారు. కేవలం 5 టీ20లు ఆడిన అనుభవం ఉన్న సమద్‌ను వైస్ కెప్టెన్‌గా చేయడం బోర్డు యువ ఆటగాళ్లపై ఎంత నమ్మకం ఉంచిందో స్పష్టం చేస్తోంది.

పాకిస్తాన్ బోర్డు ఈసారి సరికొత్త టాలెంట్‌ను ప్రపంచ వేదికపై పరీక్షించాలని గట్టిగా ఫిక్స్ అయింది. అందుకే ఈ 15 మంది సభ్యుల జట్టులో ఇంకా అంతర్జాతీయ టీ20 అరంగేట్రం (Debut) చేయని నలుగురు అన్‌క్యాప్డ్ ఆటగాళ్లకు చోటు కల్పించింది. ఫాస్ట్ బౌలర్ ఆకిఫ్ జావేద్, యువ పేసర్ అలీ రజా, ప్రతిభావంతుడైన బ్యాటర్ మాజ్ సదాఖత్, ఆల్‌రౌండర్ సాద్ మసూద్ ఈ టోర్నీ ద్వారా తమ అదృష్టాన్ని పరీక్షించుకోనున్నారు. వీరంతా జపాన్ పిచ్‌లపై అద్భుతాలు చేయడానికి సిద్ధమవుతున్నారు. జట్టులో సాయిమ్ అయూబ్, వికెట్ కీపర్ ఉస్మాన్ ఖాన్, అబ్రార్ అహ్మద్ వంటి దూకుడు గల ప్లేయర్లు కూడా ఉన్నారు. జూన్ 15 నుంచి లాహోర్‌లో ప్రారంభం కానున్న నేషనల్ క్రికెట్ అకాడమీ (NCA) వైట్-బాల్ క్యాంప్‌లో ఈ స్క్వాడ్ లోని 14 మంది ఆటగాళ్లు శిక్షణ పొందనున్నారు.

ఈ ఆసియా గేమ్స్ 2026 క్రికెట్ టోర్నమెంట్‌లో మొత్తం 10 జట్లు బంగారు పతకం కోసం హోరాహోరీగా తలపడనున్నాయి. భారత్, పాకిస్తాన్, బంగ్లాదేశ్, శ్రీలంక, ఆఫ్ఘనిస్తాన్, ఆతిథ్య దేశం జపాన్‌లు నేరుగా అర్హత సాధించగా, మిగిలిన స్థానాల్లో నేపాల్, మలేషియా, హాంగ్ కాంగ్, ఒమన్ జట్లు పోటీపడుతున్నాయి. సెప్టెంబర్ 19 నుండి అక్టోబర్ 14 వరకు ఆసియా గేమ్స్ జరగనుండగా, మెన్స్ క్రికెట్ పోటీలు సెప్టెంబర్ 24 నుండి ప్రారంభమై అక్టోబర్ 3న ముగిసే మెడల్ మ్యాచ్‌లతో క్లైమాక్స్ కు చేరుకుంటాయి.

బెంగళూరులో 11 కిలోమీటర్ల భారీ ఫ్లైఓవర్.. ట్రాఫిక్ కష్టాలకు చెక్!

.