కువైట్ ఎయిర్ పోర్ట్ పై ఇరాన్ దాడి

ఇంటర్నెట్‌డెస్క్‌: గల్ఫ్‌ దేశాల్లోని అమెరికా స్థావరాలపై ఇరాన్‌ (Iran) డ్రోన్‌లతో విరుచుకుపడుతోంది. తాజాగా కువైట్‌ అంతర్జాతీయ విమానాశ్రయం (Kuwait Airport) లక్ష్యంగా డ్రోన్‌ దాడికి పాల్పడింది. ఈ దాడిలో విమానాశ్రయ ఆస్తులకు గణనీయమైన నష్టం కలిగిందని.. పలువురు గాయపడ్డారని ఆ దేశ సైన్యం వెల్లడించింది. దీంతో విమానాశ్రయంలో ఎమర్జెన్సీ ప్రకటించి.. విమానాల రాకపోకలను నిలిపివేసినట్లు కువైట్ జనరల్ సివిల్ ఏవియేషన్ అథారిటీ తెలిపింది. అంతర్జాతీయ విమానాశ్రయానికి రానున్న పలు విమానాలను ఇతర ప్రాంతాలకు మళ్లించినట్లు పేర్కొంది. ఇరాన్‌లోని గెరుక్, ఖేష్మ్‌ ద్వీపంపై శని, ఆదివారాల్లో అమెరికా చేపట్టిన వైమానిక దాడులకు ప్రతీకారంగా గల్ఫ్‌ దేశాలపై దాడులు చేసినట్లు ఐఆర్‌జీసీ ప్రకటించింది. కువైట్‌లోని అల్ సలేమ్ వైమానిక స్థావరం, బహ్రెయిన్‌లోని ఇసా వైమానిక స్థావరం సహా పలు ప్రాంతాలను లక్ష్యంగా చేసుకున్నట్లు తెలుపుతూ ఈ దాడులు కొనసాగుతాయంది. అమెరికా చర్యల వల్ల హర్మూజ్ జలసంధి భద్రతకు భంగం కలిగితే అగ్రరాజ్యం భారీ మూల్యం చెల్లించుకోవాల్సి ఉంటుందని హెచ్చరించింది. ఇరాన్‌ దాడులు కొనసాగుతుండడంతో ఎవరూ బయటకు రావద్దని.. సురక్షిత ప్రాంతాల్లో తలదాచుకోవాలని కువైట్‌, బహ్రెయిన్ ప్రభుత్వాలు తమ ప్రజలకు సూచించాయి. మరోవైపు, హర్మూజ్‌ మీదుగా ఇరాన్‌కు వెళ్తున్న ఓ నౌకపై దాడి చేసినట్లు అమెరికా సైన్యం వెల్లడించింది. గల్ఫ్ దేశాలపై టెహ్రాన్‌ ప్రయోగించిన పలు బాలిస్టిక్ క్షిపణులు, డ్రోన్‌లను విజయవంతంగా కూల్చివేసినట్లు తెలిపింది. గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు