రోడ్ ట్రిప్ కి వెళ్తున్నారా? అయితే ఈ విషయాలు కచ్చితంగా తెలుసుకోండి

అయితే సరైన ప్రణాళిక లేకుండా రోడ్ ట్రిప్‌కు వెళ్తే చిన్న చిన్న సమస్యలే పెద్ద ఇబ్బందులుగా మారే అవకాశం ఉంటుంది. అందుకే ప్రయాణాన్ని సురక్షితంగా, సౌకర్యవంతంగా, ఆనందంగా మార్చుకోవడానికి కొన్ని ముఖ్యమైన విషయాలను ముందుగా తెలుసుకోవాలి. అవేంటో చూద్దాం.

రోడ్ ట్రిప్ ప్లాన్ చేసే ముందు వెహికిల్ స్థితిని పూర్తిగా చెక్ చేసుకోవాలి. ముఖ్యంగా టైర్లు, బ్రేకులు, ఇంజిన్ ఆయిల్, ఫ్యూయల్, లైట్లు వంటి బేసిక్ అంశాలు సరిగ్గా ఉన్నాయో లేదో చూసుకోవాలి. చాలాసార్లు చిన్న మెకానికల్ సమస్యలు కూడా పెద్ద ఆటంకంగా మారతాయి. కాబట్టి ముందుగా చెక్ చేసుకోవడం మంచిది. అలాగే స్పేర్ టైర్, జాక్, టూల్ కిట్ వంటివి తప్పనిసరిగా వెంట ఉంచుకోవాలి.

ప్రయాణ మార్గాన్ని ముందుగానే ప్లాన్ చేసుకోవడం ముఖ్యం. గూగుల్ మ్యాప్స్ వంటి నావిగేషన్ యాప్స్ ఉపయోగించి వెళ్లే రూట్, మధ్యలో వచ్చే టోల్ గేట్లు, పెట్రోల్ బంకులు, రెస్టారెంట్లు వంటి వివరాలను తెలుసుకోవచ్చు. అయితే అనుకోని మార్గాల్లో వెళ్లడం కొన్నిసార్లు ఆసక్తికరంగా అనిపించినా, దానివల్ల ఫ్యూయల్ లేదా టైం వేస్ట్ కావచ్చు. కాబట్టి ప్రధాన మార్గంతో పాటు ప్రత్యామ్నాయ మార్గాలను కూడా ముందుగానే తెలుసుకోవడం మంచిది.

డ్రైవింగ్ సమయంలో సీట్ బెల్ట్ తప్పనిసరిగా పెట్టుకోవాలి. అలాగే డ్రైవర్ అలసటగా ఉంటే కొంత విరామం తీసుకోవాలి. రాత్రి పూట ఎక్కువసేపు డ్రైవింగ్ చేయడం ప్రమాదకరం కావచ్చు. ఎందుకంటే దృష్టి తగ్గే అవకాశం ఉంటుంది. సాధ్యమైనంత వరకు రోజులోనే ప్రయాణం ప్లాన్ చేసుకోవడం ఉత్తమం. పిల్లలు లేదా వృద్ధులు ప్రయాణిస్తున్నప్పుడు మరింత జాగ్రత్తగా ఉండాలి.

ప్రయాణంలో అవసరమైన వస్తువులను ముందుగానే ప్యాక్ చేసుకోవడం మంచిది. వాటర్, స్నాక్స్, ఫస్ట్ ఎయిడ్ కిట్, అవసరమైన మందులు, మొబైల్ ఛార్జర్, పవర్ బ్యాంక్ వంటి వస్తువులు తప్పనిసరిగా ఉండాలి. కొన్ని సందర్భాల్లో దూర ప్రాంతాల్లో దుకాణాలు లేదా హోటళ్లు అందుబాటులో ఉండకపోవచ్చు. అప్పుడు ఈ చిన్న జాగ్రత్తలు ఎంతో ఉపయోగపడతాయి. అలాగే వాతావరణ పరిస్థితులను చూసుకుని రెయిన్‌కోట్ లేదా అదనపు దుస్తులు తీసుకెళ్లడం మంచిది.

రోడ్ ట్రిప్‌లో ఫ్యూయల్ నిర్వహణ చాలా ముఖ్యం. ట్యాంక్ పూర్తిగా ఖాళీ అయ్యే వరకు వెయిట్ చేయకుండా ముందుగానే పెట్రోల్ లేదా డీజిల్ నింపుకోవాలి. కొన్ని ప్రాంతాల్లో పెట్రోల్ బంకులు దూరంగా ఉండే అవకాశం ఉంటుంది. కాబట్టి ఎప్పుడూ కనీసం హాఫ్ ట్యాంక్ ఫ్యూయల్ ఉంచుకోవడం సురక్షితం. ఎలక్ట్రిక్ వాహనాల్లో ప్రయాణిస్తే ఛార్జింగ్ స్టేషన్ల లొకేషన్‌ను ముందుగానే తెలుసుకోవాలి. ఇలాంటి చిన్న జాగ్రత్తలు పాటించడం ద్వారా మీ రోడ్ ట్రిప్ మరింత సరదాగా, సంతోషంగా మారుతుంది.