ప్రకాష్ రాజ్ కు సిగ్గుగా లేదా?.. వెంటనే సినిమా ఇండస్ట్రీ నుంచి బహిష్కరించండి.. విష్ణువర్థన్ రెడ్డి

నటుడు ప్రకాష్‌రాజ్‌ను సినీ ఇండస్ట్రీ నుంచి బహిష్కరించాలన్నారు ఏపీ బీజేపీ నేత విష్ణువర్థన్ రెడ్డి . ప్రకాష్ రాజ్ రాష్ట్రంలో వ్యక్తిగత దూషణలు, మత విద్వేషాలను రెచ్చగొట్టే వారిని సమర్థిస్తున్నారని అందుకే ఆయన్ను బహిష్కరించాలని డిమాండ్ చేశారు. ఏపీలో హిందువులు, ఇతర మతాల మధ్య కొంతమంది చిచ్చుపెట్టాలని చూస్తున్నారని అలాంటి వారికి ప్రకాష్‌రాజ్‌ ఎలా మద్దతు తెలుపుతారని ఆగ్రహం వ్యక్తం చేశారు. యూట్యూబర్ రావణ్ ముఖ్యమంత్రి చంద్రబాబు, పవన్ కళ్యాణ్, స్వామీజీలపై చేసిన వ్యాఖ్యలపై చర్యలు తీసుకోవడంలో తప్పులేదన్నారు. రావణ్‌పై చర్యలు తీసుకుంటే ప్రకాష్‌రాజ్ ట్వీట్ చేయడం సిగ్గుచేటన్నారు.ప్రశ్నిస్తే పారిపోయిన ప్రకాష్‌రాజ్‌ ఇప్పుడు ప్రశ్నలకు సమాధానం చెప్పాలని అడగడం సిగ్గుగా లేదా అంటూ విష్ణువర్థన్ రెడ్డి ఆగ్రహం వ్యక్తం చేశారు. 'వ్యక్తిగత దూషణలు చేస్తూ, ప్రజలను మతం పేరుతో రెచ్చగొట్టే వారికి, ఢిల్లీలో దేశంపై కుట్రలు చేసే దేశద్రోహులకు, పాకిస్థాన్ మద్దతుదారులకు మద్దతు ఇచ్చే ప్రకాష్‌రాజ్‌ వంటి వారిని ఏమని ప్రశ్నించాలి?' అంటూ ఘాటుగా స్పందించారు. 'ఏవైనా ప్రశ్నలు అడిగితే వాటికి సమాధానం చెప్పాలి.. కానీ హిందువులను, హిందూ ప్రతినిధులను, ప్రజలు ప్రజాస్వామ్యబద్ధంగా ఎన్నుకున్న నాయకులను అవమానిస్తే ఏం చేయాలి' అన్నారు. ప్రజాస్వామ్యంలో, అంబేద్కర్ రాజ్యాంగం ప్రకారం చట్టబద్ధంగా ఫిర్యాదు చేస్తారని.. కానీ అలాంటి చర్యలకు మద్దతు ఇవ్వడం ప్రజాస్వామ్య స్ఫూర్తికి విరుద్ధం అని తెలుసా అంటూ ప్రకాష్‌రాజ్‌ను ప్రశ్నించారు.అంతకముందు ప్రకాష్‌రాజ్‌ ఏపీ పోలీసులు జర్నలిస్ట్ కేవీఆర్, యూట్యూబర్ ప్రశ్న రావణ్‌ను అరెస్ట్ చేయడంపై స్పందించారు. ఏపీ సీఎం చంద్రబాబు, డిప్యూటీ సీఎం పవన్ కళ్యాణ్ ఆదేశాలతో అధికారాన్ని దుర్వినియోగం చేస్తూ కేవీఆర్, రావణ్‌లను అరెస్ట్ చేశారని ఆరోపించారు. ఇలా ప్రశ్నిస్తే అరెస్ట్ చేయడం ప్రజాస్వామ్యమేనా? అంటూ ప్రశ్నించారు. గతంలో మన పూర్వీకులు ఇలా చేసి ఉంటే ఇప్పుడు ప్రజాస్వామ్యం మిగిలేదా అన్నారు. ఏ రాష్టంలో తప్పు జరిగినా అదే తప్పేనని.. ప్రశ్నలకి సమాధానం చెప్పడం నేతల బాధ్యతని.. అరెస్ట్ చేసి గొంతులు నొక్కేయడం పిరికితమంటూ ట్వీట్ చేశారు. ప్రకాష్‌రాజ్‌ చేసిన ట్వీట్‌కు విష్ణువర్థన్ రెడ్డి కౌంటరిచ్చారు.