పాండ్యా కోసం కొట్టుకుంటున్న ఏడు ఫ్రాంచైజీలు.. ఆ రెండు జట్లు మాత్రం మాకొద్దంటున్నాయి

రాబోయే ఐపీఎల్ సీజన్ కంటే ముందు జరగబోయే ట్రేడ్ విండోలో ఆయన ముంబై ఇండియన్స్ జట్టును వీడే అవకాశం ఉందని జాతీయ మీడియా కథనాలు పేర్కొంటున్నాయి. ఒకవేళ హార్దిక్ గనుక ముంబై టీమ్‌ను వదిలిపెడితే, అతన్ని తమ జట్టులోకి లాగేందుకు ఐపీఎల్‌లోని ఏకంగా ఏడు ఫ్రాంచైజీలు తీవ్ర ఆసక్తి చూపిస్తున్నాయి. ది టైమ్స్ ఆఫ్ ఇండియా కథనం ప్రకారం.. హార్దిక్‌ను సొంతం చేసుకునే రేసులో మహేంద్ర సింగ్ ధోని జట్టు చెన్నై సూపర్ కింగ్స్ (CSK) అందరికంటే ముందుండగా.. కోల్‌కతా నైట్ రైడర్స్ (KKR), రాజస్థాన్ రాయల్స్ (RR) జట్లు కూడా గట్టిగా ప్రయత్నిస్తున్నాయి.

హార్దిక్ పాండ్యాను ట్రేడింగ్ ద్వారా తీసుకోవడానికి మెజారిటీ జట్లు ఉత్సాహం చూపిస్తున్నప్పటికీ.. రాయల్ ఛాలెంజర్స్ బెంగళూరు (RCB), సన్‌రైజర్స్ హైదరాబాద్ (SRH) జట్లు మాత్రం అతనిపై ఎలాంటి ఆసక్తి చూపించడం లేదని తెలుస్తోంది. హార్దిక్ తన ఐపీఎల్ ప్రయాణాన్ని 2015లో ముంబై ఇండియన్స్‌తోనే ప్రారంభించాడు. ఆ తర్వాత 2022లో గుజరాత్ టైటాన్స్ జట్టుకు కెప్టెన్‌గా మారి మొదటి సీజన్ లోనే కప్ అందించి, రెండో సీజన్ లో రన్నరప్‌గా నిలబెట్టాడు. అయితే, గతేడాది భారీ హైప్ మధ్య తిరిగి ముంబై ఇండియన్స్‌కు కెప్టెన్‌గా ఎంట్రీ ఇచ్చినప్పటికీ, ఆయన ఆశించిన స్థాయిలో రాణించలేకపోయాడు. ఆయన నాయకత్వంలో ముంబై జట్టు గత మూడు సీజన్లలో వరుసగా 10వ స్థానం, 3వ స్థానం, 9వ స్థానాలతో సరిపెట్టుకోవాల్సి వచ్చింది.

ముంబైని వదిలి బెంగళూరుకు షిఫ్ట్ అయిన హార్దిక్

ఐపీఎల్ ట్రేడింగ్ రూమర్స్ ఇలా ఉంటే.. హార్దిక్ పాండ్యా వ్యక్తిగత జీవితంలో ఒక కీలక నిర్ణయం తీసుకుని వార్తల్లో నిలిచాడు. ఆయన ముంబై నగరాన్ని శాశ్వతంగా వదిలిపెట్టి, బెంగళూరుకు తన బసను మార్చేశాడు. బెంగళూరు నగర శివార్లలో ఉన్న బీసీసీఐ కొత్త సెంటర్ ఆఫ్ ఎక్సలెన్స్(COE)కు అత్యంత సమీపంలో ఒక విలాసవంతమైన ఇల్లును కూడా ఆయన అద్దెకు తీసుకున్నాడు. ఇకపై తన కెరీర్ ముగిసే వరకు బెంగళూరులోనే ఉంటూ, అక్కడి అత్యాధునిక సౌకర్యాల నడుమ తన ఫిట్‌నెస్, ట్రైనింగ్‌పై పూర్తిగా దృష్టి పెట్టాలని హార్దిక్ భావిస్తున్నాడు. ఈ విధంగా బీసీసీఐ అకాడమీని తన పర్మనెంట్ ట్రైనింగ్ బేస్‌గా మార్చుకున్న మొదటి భారతీయ క్రికెటర్‌గా హార్దిక్ రికార్డు సృష్టించాడు.

ప్రస్తుతం హార్దిక్ పాండ్యా తొడ కండరాల గాయంతో బాధపడుతున్నాడు. ఈ ఇంజూరీ కారణంగానే ఆయన ప్రస్తుతం ఇంగ్లాండ్‌తో జరుగుతున్న వైట్-బాల్ (టీ20, వన్డే) సిరీస్‌కు కూడా ఎంపిక కాలేదు. బీసీసీఐ ఉన్నతాధికారి ఒకరు పీటీఐ వార్తా సంస్థతో మాట్లాడుతూ.. “హార్దిక్ ఇప్పటికే బెంగళూరుకు పూర్తిగా షిఫ్ట్ అయిపోయాడు. తన కెరీర్‌ను సుదీర్ఘ కాలం పాటు కొనసాగించడానికి, ఎప్పటికప్పుడు ఫిట్‌నెస్ సాధించడానికి సెంటర్ ఆఫ్ ఎక్సలెన్స్ అతనికి ఎంతగానో ఉపయోగపడుతుంది” అని స్పష్టం చేశారు. ఏదేమైనా అటు గాయం నుంచి కోలుకోవడం, ఇటు ఐపీఎల్‌లో టీమ్ మారే అవకాశాలు ఉండటంతో రాబోయే రోజుల్లో హార్దిక్ పాండ్యా చుట్టూనే ఇండియన్ క్రికెట్ పాలిటిక్స్ తిరగనున్నాయి.

మరిన్ని క్రికెట్‌ వార్తల కోసం ఇక్కడ క్లిక్‌ చేయండి