తిరుమల గర్భగుడిలో శ్రీవారి మూలవిరాటే కాదు ఇంకాా ఏమేం ఉంటాయో తెలుసా? వీటిని కూడా దర్శించుకుంటే పుణ్యఫలం

Tirumala : కలియుగ ప్రత్యక్ష దైవంగా భావించే తిరుమల వెంకటేశ్వర స్వామిని నిత్యం వేలాది మంది దర్శించుకుంటారు. స్వామివారి హుండీ ఆదాయమే రోజుకు 3-4 కోట్లు ఉంటుందంటేనే ఏ స్థాయిలో భక్తులు వస్తారో అర్థం చేసుకోవచ్చు. కుటుంబసభ్యులు, స్నేహితులతో కలిసి శ్రీవారి దర్శనానికి వస్తుంటారు... దీంతో ఏడుకొండలపై ఎప్పుడూ సందడి నెలకొంటుంది.

అయితే గంటలతరబడి క్యూలైన్, కంపార్ట్ మెంట్స్ లో గడిపే భక్తులు గర్భగుడిలోకి ప్రవేశం లభించాక వెంకటేశ్వరస్వామి దివ్యమంగళ రూపాన్ని చూసి మైమరచిపోతారు. సమయం చాలా తక్కువగా ఉంటుంది కాబట్టి స్వామి మూలవిరాట్ ని మాత్రమే దర్శించుకుంటారు. కానీ తిరుమల గర్భగుడిలో భక్తుల దర్శనం కోసం ఇంకెన్నో ఉంటాయి. వాటిగురించి చాలామందికి తెలియదు. కాబట్టి తిరుమల శ్రీవారి సన్నిధిలో ఏమేం ఉంటాయో ఇక్కడ తెలుసుకుందాం.

తిరుమల గర్భగుడిలో కేవలం వెంకటేశ్వరస్వామి మూల విరాట్ మాత్రమే ఐదు విగ్రహాలు ఉంటాయి... వీటిని పంచబేరాలు అంటారు. ఇందులో కేవలం మనం ధృవ బేరం (8 అడుగులు స్వామివారి మూల విరాట్) ను మాత్రమే దర్శించుకుంటాం. ఇతర కౌతు బేరం, ఉత్సవ బేరం, బలిబేరం, స్నపన బేరం దర్శించుకోము. అసలు ఈ విగ్రహాలు గర్భగుడిలో ఉంటాయని కూడా చాలామందికి తెలియదు.

తిరుమల గర్భగుడిలోని మూల విరాట్ తో పాటు ఇతర పంచలోహ విగ్రహాలు (పంచబేరాలు) కూడా ప్రత్యేక పూజలు అందుకుంటాయి. ముఖ్యంగా ప్రత్యేక ఉత్సవాలు, అభిషేకాలకు వీటిని ఉపయోగిస్తారు. కొలువు శ్రీనివాసమూర్తి, మలయప్పస్వామి విగ్రహాలు ఈ పంచబేరాల్లో భాగమే. బేరం అంటే ఆగమశాస్త్రంలో మూర్తి లేదా విగ్రహం అని అర్థం.

తిరుమల గర్భగుడిలోకి ప్రవేశించగానే మూల విరాట్ విగ్రహం ఉంటుంది.. అయితే స్వామివారి పాదాలవద్ద గమనిస్తే సుమారు అడుగున్నర ఎత్తులో వెండి విగ్రహం ఉంటుంది. ఇదే భోగ శ్రీనివాసమూర్తి విగ్రహం. ఈ విగ్రహానికి నిత్యం పాలు, నీళ్లతో అభిషేకం చేస్తుంటారు. భక్తులకు భోగభాగ్యాలు అందించేది ఈ స్వామే అని భక్తుల విశ్వాసం. కాబట్టి ఈసారి తిరుమలకు వెళ్లినప్పుడు ఈ స్వామిని కూడా తప్పకుండా దర్శించుకొండి.

తిరుమలలో వెంకటేశ్వరస్వామి సతీసమేతంగా కొలువయ్యాడు... మరి అమ్మవారి విగ్రహం ఎక్కడ అనేగా మీ డౌట్. స్వామివారి తన అర్దాంగికి గుండెల్లో చోటు కల్పించారు... మూలవిరాట్ వక్షస్థలంలో మహాలక్ష్మి కొలువై ఉంటుంది. అయితే స్వామివారి అలంకరణ కారణంగా సాధారణంగా అమ్మవారు కనిపించరు... కానీ స్వామి నిజరూప దర్శన సమయంలో అమ్మవారిని దర్శించుకోవచ్చు.

తిరుమల గర్భగుడిలో సీతారాములు, లక్ష్మణుడు, రుక్మిణీ కృష్ణుల విగ్రహాలు కూడా ఉంటాయి. అలాగే సుదర్శన చక్రం (చక్రత్తాళ్వార్) విగ్రహాలు, మరికొన్ని సాలగ్రామాలు కూడా ఉంటాయి. ఈ విగ్రహాలు కూడా నిత్యపూజలు అందుకుని అలంకరించి ఉంటాయి. కాబట్టి స్వామివారినే కాదు ఈ రూపాలను కూడా భక్తులు దర్శించుకోవచ్చు.

తిరుమల గర్భగుడిలో నిత్యం వెలుగుతూ ఉండే దీపాలు ఉంటాయి. పురాణాల ప్రకారం ఈ అఖండ దీపాలను స్వయంగా బ్రహ్మదేవుడే వెలిగించాడని చెబుతారు. ఈ రెండు దీపాలు ఎప్పుడూ వెలుగుతూనే ఉంటాయి... కాబట్టి వీటిని దర్శించుకున్నా పుణ్యఫలం దక్కుతుంది.

తిరుమల గర్భగుడిలో ఓ గోడకు గడ్డపార కనిపిస్తుంది. దీనితోనే శ్రీ రామానుజార్యుల శిష్యుడైన అనంతాళ్వార్ స్వామివారిని కొట్టినట్లు స్థలపురాణం చెబుతోంది. తిరుమలపై అనంతాళ్వార్ పూలవనాన్ని పెంచుతుండేవాడని... ఓరోజు స్వామివారు బాలుడి రూపంలో వచ్చి సహాయం చేసేందుకు ప్రయత్నించడంతో అనంతాళ్వార్ కోపగించుకున్నట్లు చెబుతారు. శ్రీవారి సేవలో తానొక్కడినే తరించాలని భావించిన అనంతాళ్వార్ బాలుడు రూపంలోని స్వామివారిపైకి గడ్డపార విసరగా అది దవడకు తగిలిందట. అందుకే ఇప్పటికీ స్వామివారి విగ్రహం దవడకు పచ్చకర్పూరం రాస్తారు. ఇలా స్వయంగా వెంకటేశ్వర స్వామిని గాయపర్చిన గడ్డపార ఇప్పటికీ ఆలయంలో కనిపిస్తుంది.

తిరుమలలో వెంకటేశ్వర స్వామి వెలిసిన గర్భాలయంపై ఉండే స్వర్ణ గోపురాన్ని ఆనంద నిలయం అంటారు. దీనిపై కూడా గర్భగుడిలోని స్వామివారిని పోలిన విగ్రహం ఉంటుంది. .. దీన్ని విమాన వెంకటేశ్వర స్వామి అంటారు. ఏదైనా కారణంతో గర్భగుడిలోకి వెళ్లలేకపోయినవారు ఈ విమాన వెంకటేశ్వర స్వామిని దర్శించుకుంటే చాలా ప్రధాన విగ్రహాన్ని దర్శించుకున్న ఫలితం దక్కుతుందని భక్తుల విశ్వాసం. అందుకే ప్రదక్షిణలు చేసే సమయంలో తప్పకుండా ఈ విమాన వెంకటేశ్వరస్వామిని భక్తులు దర్శించుకుంటారు.