ఫ్రీగా వస్తే తీసుకుంటారా’అని అన్నాడు.. డెలివరీ బాయ్ గొడవపై నటుడు అఖిల్ రాజ్

డెలివరీ బాయ్‌పై అఖిల్‌ దాడి (actor akhil raj delivery boy issues) చేసినట్లు పోస్టులు వెల్లువెత్తాయి. ఈ క్రమంలో అఖిల్‌ స్పందించారు. ఈ మేరకు ఇన్‌స్టా వేదికగా సుదీర్ఘ వివరణ ఇచ్చారు.

‘‘మా ఇంటి ఎదురుగా ఉన్న చేలం రెసిడెన్సీ ఫ్లాట్‌ నెం.201లో ఇవ్వాల్సిన పార్సిల్‌ను రమేశ్‌ అనే డెలివరీ బాయ్‌ మేము నివసిస్తున్న అరుణ రెసిడెన్సీ ఫ్లాట్‌ నెం.201లో ఇచ్చాడు. పార్సిల్‌పై చేలం రెసిడెన్సీ చిరునామా స్పష్టంగా ఉంది. మా ఇంట్లో ఉన్న నలుగురిలో ఎవరో ఒకరు ఆర్డర్‌ చేశారని మా నాన్నగారు దాన్ని తీసుకున్నారు. ఇదే విషయం మమ్మల్ని అడగడానికి నాన్న ఇంట్లోకి వచ్చేసరికి డెలివరీ బాయ్‌ వెళ్లిపోయాడు. ఆ విషయం మా అమ్మగారికి తెలియక ఆ ప్యాకెట్‌ను ఓపెన్‌ చేసేశారు. ఒక ఆర్డర్‌ డెలివరీ చేసినప్పుడు ఓటీపీ, పేరు, సరిచూసుకోవాల్సిన బాధ్యత డెలివరీ బాయ్‌దే. ఆ విషయంలో తప్పు చేశాడు. ఇంట్లో ఎవరూ ఆర్డర్‌ చేయలేదని తెలిసిన తర్వాత దాన్ని పక్కన పెట్టేశాం. దాదాపు 20 నిమిషాల తర్వాత ఆ అబ్బాయి మా ఫ్లాట్‌కు వచ్చి పార్సిల్‌ ఇవ్వమని అడిగాడు. ‘బ్రదర్‌ మీరు అడ్రస్‌ సరి చూసుకున్నారా’ అని అడిగా. అందుకు అతడు ‘లేదు నేను చూసుకోలేదు. ఇచ్చేశానంతే’ అని దురుసుగా జవాబిచ్చాడు’’

‘‘ఇంతలో మా అమ్మ వచ్చి, ‘బాబూ తెలియక ఓపెన్‌ చేశాం. ఏమీ అనుకోకండి’ అని పార్సిల్‌ తిరిగి ఇచ్చారు. ఆ అబ్బాయి వెళ్తూ వెళ్తూ ‘ఫ్రీగా వస్తే ఓపెన్ చేసి తీసుకుంటారా’ అని మాట్లాడాడు. అమ్మను అంటే ఎవరికైనా కోపం వస్తుంది కదా! నాకూ వచ్చింది. ‘సరిగా మాట్లాడు’ అంటూ హెచ్చరించా. ఇంతలో అతడు ‘నువ్వు హీరో కదా! చూడు ఏం చేస్తానో’ అంటూ వీడియో తీయడం మొదలు పెట్టాడు. దాంతో మా ఇద్దరి మధ్య వాగ్వాదం జరిగింది. పనిగట్టుకుని డెలివరీ బాయ్‌తో గొడవ పడాల్సిన అవసరం నాకేంటి? ఈ గొడవ వల్ల కెరీర్‌కేమైనా ఉపయోగం ఉంటుందా? ఒకప్పుడు నేనూ డెలివరీ బాయ్‌గా పనిచేసిన సందర్భాలున్నాయి. అతడిని కించపరిస్తే నాకేం వస్తుంది. అతను మాట్లాడిన విధానం తప్పు’’

‘‘ఇదంతా తెలియకుండా నావైపున ఏం జరిగిందో తెలుసుకోకుండా సోషల్‌మీడియాలో నెగెటివ్‌ కామెంట్స్‌ పెడుతున్నారు. నన్నూ నా తల్లిదండ్రులను తిట్టిపోస్తున్నారు. మీ ఇంట్లో వాళ్లపై నెగెటివ్‌గా మాట్లాడితే ఊరుకుంటారా? మీరే ఈ పరిస్థితుల్లో ఉంటే ఏం చేస్తారు. డెలివరీ అబ్బాయి అమాయకుడని మాట్లాడుతున్నారు కదా! అతడి ప్రవర్తన సరిగా లేదు. ఇప్పటికే పోలీసులకు ఫిర్యాదు చేశా. నావైపు తప్పు ఉంటే కచ్చితంగా క్షమాపణ చెబుతా. మా అమ్మను ఎవరైనా ఏమైనా అంటే ఊరుకోను’’ అని అఖిల్‌రాజ్‌ అన్నారు.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.