పెళ్లి గురించి ఓపెన్ అయిన త్రిష.. విడాకుల గురించి కూడా హీరోయిన్ కీలక వ్యాఖ్యలు

సరైన వ్యక్తి దొరికితేనే పెళ్లి చేసుకుంటానని, విడాకులను తాను నమ్మనని చెప్పిన ఆమె వ్యాఖ్యలు ఇప్పుడు నెటిజన్లలో ఆసక్తికర చర్చకు దారితీశాయి.

త్రిష కృష్ణన్ సౌత్ ఇండియా సినీ పరిశ్రమలో అగ్ర కథానాయికగా ఎన్నో సంవత్సరాలుగా తనకంటూ ప్రత్యేక గుర్తింపు సంపాదించుకున్నారు. తన నటనతో పాటు వ్యక్తిగత జీవితంపై కూడా అభిమానుల్లో ఎప్పుడూ ఆసక్తి ఉంటుంది. అయితే త్రిష మాత్రం తన వ్యక్తిగత విషయాలను ఎక్కువగా బయట పెట్టడానికి ఇష్టపడరు. చాలా అరుదుగా మాత్రమే తన అభిప్రాయాలను పంచుకుంటారు. ఈమధ్య ఆమె పెళ్లి, ప్రేమ, విడాకుల గురించి గతంలో చెప్పిన మాటలు మరోసారి సోషల్ మీడియాలో వైరల్ అవుతున్నాయి.

త్రిష మాట్లాడుతూ, తనకు విడాకులు అనే ఆలోచనే నచ్చదని చెప్పారు. ఒకసారి పెళ్లి చేసుకుంటే జీవితాంతం అదే బంధాన్ని కొనసాగించాలని తాను కోరుకుంటానని వెల్లడించారు. అందుకే పెళ్లి చేసుకునే ముందు వందసార్లు ఆలోచిస్తానని అన్నారు. జీవితాంతం కలిసి ఉండగల వ్యక్తి దొరికితేనే పెళ్లి చేసుకోవాలని భావిస్తున్నానని చెప్పారు.

తన చుట్టూ ఉన్న చాలా మంది పెళ్లి చేసుకుని సంతోషంగా లేరని త్రిష అన్నారు. కొందరు తప్పు కారణాలతో పెళ్లి చేసుకుని తర్వాత బాధపడుతున్నారని చెప్పారు. అలాంటి పరిస్థితి తన జీవితంలో రావద్దని కోరుకుంటున్నట్లు వెల్లడించారు. సరైన వ్యక్తి దొరికితేనే పెళ్లి చేసుకుంటానని, అలాంటి వ్యక్తి దొరకకపోయినా తనకు ఎలాంటి బాధ లేదని స్పష్టం చేశారు.

డేటింగ్ గురించి కూడా త్రిష ఆసక్తికరమైన వ్యాఖ్యలు చేశారు. రెస్టారెంట్‌కు వెళ్లడం లేదా డిన్నర్ చేయడమే డేటింగ్ కాదని ఆమె అభిప్రాయపడ్డారు. ఇద్దరి మధ్య నిజమైన అనుబంధం, మనస్ఫూర్తిగా మాట్లాడుకునే అవకాశం ఉండటమే ముఖ్యమని చెప్పారు. ఒకరినొకరు నిజంగా అర్థం చేసుకోవడం వల్లే మంచి బంధం ఏర్పడుతుందని ఆమె పేర్కొన్నారు.త్రిష దృష్టిలో పెళ్లి కంటే జీవిత భాగస్వామి ముఖ్యం. సమాజం కోసం లేదా ఇతరుల ఒత్తిడితో పెళ్లి చేసుకోవడం సరైన నిర్ణయం కాదని ఆమె అభిప్రాయపడ్డారు. ప్రేమ, నమ్మకం, పరస్పర గౌరవం ఉన్నప్పుడు మాత్రమే ఆ బంధం అందంగా ఉంటుందని చెప్పారు.

ఇటీవల తమిళనాడు ముఖ్యమంత్రి విజయ్‌తో త్రిష పేరు సోషల్ మీడియాలో ప్రచారంలోకి రావడంతో, ఆమె గతంలో చెప్పిన ఈ వ్యాఖ్యలు మరోసారి వైరల్ అవుతున్నాయి. అయితే ఈ వ్యాఖ్యలు చాలా సంవత్సరాల క్రితం వివిధ ఇంటర్వ్యూల్లో త్రిష చెప్పినవే. ప్రస్తుతం అవి మళ్లీ నెటిజన్ల దృష్టిని ఆకర్షిస్తున్నాయి. త్రిష తన వ్యక్తిగత జీవితంపై ఎలాంటి కొత్త ప్రకటన చేయకపోయినా, ఆమె నిజాయితీగా చెప్పిన ఈ అభిప్రాయాలు అభిమానుల్లో మరోసారి చర్చకు దారి తీశాయి.