చైనా టార్గెట్ గా భారత్ భీకర వ్యూహం

చైనా దురాక్రమణలను అడ్డుకోవడమే లక్ష్యంగా భారత్ తన దీర్ఘశ్రేణి స్ట్రైక్ సామర్థ్యాలను శరవేగంగా పెంచుకుంటోంది. ఈ మేరకు ప్రముఖ అంతర్జాతీయ సంస్థ సిప్రి విడుదల చేసిన నివేదికలో సంచలన విషయాలు వెల్లడయ్యాయి. ఈ నివేదిక ప్రకారం భారత్ రక్షణ పరంగా చైనాను సమర్థవంతంగా ఎదుర్కొనేందుకు సరికొత్త వ్యూహాలను అమలు చేస్తోంది. ముఖ్యంగా 3000 కిలోమీటర్ల నుండి 5000 కిలోమీటర్ల దూరంలోని లక్ష్యాలను ఛేదించే క్షిపణులపై భారత్ ప్రత్యేక దృష్టి సారించింది. ఈ క్రమంలోనే దేశ రక్షణ వ్యవస్థలో అత్యంత శక్తివంతమైన అగ్ని 5 అంతర ఖండ ఖండాతర క్షిపణులను భారీగా మోహరించింది. 2025 ప్రారంభం నాటికి భారత్ వద్ద 24 అగ్ని 5 క్షిపణులు సిద్ధంగా ఉన్నాయని నివేదిక స్పష్టం చేసింది. ఇదిలా ఉండగా భారతదేశ రక్షణ ఎగుమతులు కూడా సరికొత్త రికార్డులను సృష్టిస్తున్నాయి. అంతర్జాతీయ మార్కెట్లో భారత ఆయుధాలకు డిమాండ్ విపరీతంగా పెరగడంతో ఎగుమతుల విలువ 38400 కోట్ల రూపాయలకు చేరింది. ఫలితంగా ప్రపంచ దేశాలకు ఆయుధాలను సరఫరా చేసే కీలక శక్తిగా భారత్ అవతరిస్తోంది. మేక్ ఇన్ ఇండియా సత్ఫలితాలను ఇస్తుండటంతో రక్షణ రంగం కొత్త పుంతలు తొక్కుతోంది. ఈ నేపథ్యంలో సాంకేతిక పరిజ్ఞానాన్ని అందిపుచ్చుకోవడంలో భారత్ వేగంగా అడుగులు వేస్తోంది. ఆధునిక యుద్ధ తంత్రానికి అవసరమైన డ్రోన్లు మరియు ఖచ్చితమైన లక్ష్యాలను ఛేదించే ప్రిసిషన్ స్ట్రైక్ వ్యవస్థలపై ప్రత్యేక దృష్టి పెట్టింది. వీటితో పాటు సైబర్ రక్షణ వ్యవస్థలను బలోపేతం చేస్తూ పూర్తి స్వదేశీ సాంకేతికతకు రక్షణ శాఖ అత్యంత ప్రాధాన్యత ఇస్తోంది. ఆధునిక సవాళ్లను తట్టుకునేలా సైన్యాన్ని సర్వసన్నద్ధం చేస్తోంది. భారత్ సాధిస్తున్న ఈ పురోగతి అటు చైనాకు గట్టి హెచ్చరికగా మారుతోంది. సరిహద్దుల్లో చైనా చేసే ఎలాంటి సాహసానికైనా దీటుగా సమాధానం చెప్పేలా లాంగ్ రేంజ్ క్షిపణుల మోహరింపు సాగుతోంది. స్వదేశీ సాంకేతికత మరియు పెరిగిన ఉత్పత్తి సామర్థ్యంతో భారత్ ఇప్పుడు ప్రపంచ రక్షణ రంగంలో అగ్రగామిగా నిలుస్తోంది. భవిష్యత్తులో దేశ భద్రతకు మరింత పటిష్టమైన పునాది పడుతోంది.