చమురు లేదు..బంగారం లేదు - స్విట్జర్లాండ్ విజయ రహస్యం ఇదే

అయితే ఆశ్చర్యకరమైన విషయం ఏమిటంటే.. స్విట్జర్లాండ్‌కు చమురు నిల్వలు లేవు, బంగారం గనులు లేవు, సముద్ర తీర ప్రాంతం కూడా లేదు. సహజ వనరులు పెద్దగా లేని ఈ దేశం ప్రపంచ ఆర్థిక శక్తిగా ఎలా ఎదిగింది? ఇదే స్విట్జర్లాండ్ విజయగాథలోని అసలు ఆసక్తికర అంశం.

ఐరోపా మధ్యలో ఉన్న స్విట్జర్లాండ్ ఎక్కువ భాగం ఆల్ప్స్ పర్వతాలతో నిండి ఉంటుంది. వ్యవసాయానికి అనుకూలమైన భూమి కూడా పరిమితంగానే ఉంది. దీంతో సంప్రదాయ వనరుల ఆధారంగా అభివృద్ధి సాధించడం కష్టమైంది. కానీ అదే పరిస్థితిని దేశ నాయకులు ఒక అవకాశంగా మలుచుకున్నారు. సహజ వనరులకంటే మానవ వనరులపై దృష్టి పెట్టారు. విద్య, నైపుణ్యాలు, పరిశ్రమలు, ఆర్థిక సేవల అభివృద్ధికి ప్రాధాన్యత ఇచ్చారు.

ముందుగా స్విట్జర్లాండ్‌ దేశం రైల్వే నిర్మాణం చేపట్టింది. అంటే ఆ రోజుల్లో తాము తయారు చేసిన ఉత్పత్తులను ఇతర ప్రాంతాలకు తీసుకెళ్లి విక్రయించాలంటే రవాణా వ్యవస్థ ఉండేది కాదు. ఇందుకు రైల్వే మార్గం ఒక్కటే పరిష్కారం అని తలచిన నాటి నాయకులు... వెంటనే దీన్ని అమలు చేసే ప్రణాళికలు రూపొందించారు. స్విట్జర్లాండ్ భౌగోళికంగా చూస్తే ఎక్కువ శాతం పర్వతాలే ఉంటాయి. ఇక్కడ రైలు మార్గం నిర్మించాలంటే కత్తిమీద సాము లాంటిదే. కానీ అక్కడి వారు చూపిన చొరవతో అసాధ్యమనుకున్నది సాధ్యం చేశారు. స్విట్జర్లాండ్ దేశంలోని మారుమూల ప్రాంతాలకు సైతం రైల్వే కనెక్టివిటీని తీసుకొచ్చారు. ఇక తమ ఉత్పత్తులు ఇతర ప్రాంతాల్లో కూడా విక్రయించి సొమ్ము చేసుకునే పరిస్థితికి వచ్చారు.

స్విట్జర్లాండ్ సంపద వెనుక ప్రధాన కారణం దాని బ్యాంకింగ్ వ్యవస్థ. రాజకీయ స్థిరత్వం, కఠినమైన గోప్యతా చట్టాలు, విశ్వసనీయ ఆర్థిక వ్యవస్థ కారణంగా ప్రపంచ వ్యాప్తంగా ధనవంతులు తమ సంపదను ఇక్కడి బ్యాంకుల్లో నిల్వ చేయడం ప్రారంభించారు.1934లో ప్రవేశపెట్టిన బ్యాంకింగ్ సీక్రెసీ చట్టం ఈ దేశానికి భారీ ప్రయోజనం చేకూర్చింది.ఖాతాదారుల వివరాలను అత్యంత గోప్యంగా ఉంచడం వల్ల ప్రపంచ సంపదలో గణనీయమైన భాగం స్విస్ బ్యాంకుల వైపు మళ్లింది.దీంతో దేశ ఆర్థిక వ్యవస్థ వేగంగా బలపడింది.

స్విట్జర్లాండ్ కేవలం బ్యాంకింగ్‌కే పరిమితం కాలేదు.అత్యంత నాణ్యత కలిగిన గడియారాలు,వైద్య పరికరాలు,ఔషధ ఉత్పత్తులు,ఇంజినీరింగ్ పరికరాల తయారీలో ప్రపంచ నాయకత్వాన్ని సాధించింది.Rolex, Omega, Novartis, Roche వంటి సంస్థలు ప్రపంచ మార్కెట్లలో స్విట్జర్లాండ్ ప్రతిష్టను మరింత పెంచాయి."Swiss Made" అనే ముద్ర నాణ్యతకు ప్రతీకగా మారింది.

రెండు ప్రపంచ యుద్ధాల సమయంలో కూడా స్విట్జర్లాండ్ తటస్థ వైఖరిని కొనసాగించింది.ఇతర యూరోపియన్ దేశాలు యుద్ధాలతో నష్టపోతుంటే,స్విట్జర్లాండ్ తన ఆర్థిక వ్యవస్థను రక్షించుకుంది. ఈ స్థిరత్వం విదేశీ పెట్టుబడులను మరింత ఆకర్షించింది.

స్విట్జర్లాండ్ విజయానికి మరో ప్రధాన కారణం పరిశోధన,ఆవిష్కరణలకు ఇచ్చిన ప్రాధాన్యత.ఉన్నత విద్య,సాంకేతిక పరిజ్ఞానం,నైపుణ్యాభివృద్ధి రంగాల్లో నిరంతర పెట్టుబడులు పెట్టడం వల్ల ప్రపంచ స్థాయి పరిశ్రమలు అక్కడ అభివృద్ధి చెందాయి.చిన్న దేశం అయినప్పటికీ ప్రపంచ ఆవిష్కరణ సూచికల్లో ఎప్పుడూ అగ్రస్థానాల్లో నిలుస్తోంది.

ప్రపంచానికి స్విట్జర్లాండ్ నేర్పిన పాఠం స్విట్జర్లాండ్ కథ ఒక కీలకమైన సందేశాన్ని ఇస్తుంది. ఒక దేశం అభివృద్ధి చెందాలంటే సహజ వనరులే అవసరం కాదు. సరైన విధానాలు, రాజకీయ స్థిరత్వం, నాణ్యమైన విద్య, విశ్వసనీయ ఆర్థిక వ్యవస్థ,ఆవిష్కరణలకు ప్రోత్సాహం ఉంటే ప్రపంచ ఆర్థిక శక్తిగా ఎదగొచ్చు.

చమురు లేకపోయినా, బంగారం గనులు లేకపోయినా, మానవ ప్రతిభను సంపదగా మార్చుకుని ప్రపంచంలో అత్యంత ధనిక దేశాల్లో ఒకటిగా నిలిచిన స్విట్జర్లాండ్ విజయగాథ ప్రతి దేశానికి స్ఫూర్తిదాయకమైన ఉదాహరణగా నిలుస్తోంది.