సినీ నటి మంచు లక్ష్మి ప్రెస్ మీట్లలో, ఇంటర్వ్యూలలో మాట్లాడే మాటలు వైరల్ అవుతుంటాయి. కొన్నిసార్లు ట్రోల్ అయితే, మరికొన్ని సందర్భాల్లో ట్రెండ్ అవుతుంటాయి.
ఏదైనా ఉన్నది ఉన్నట్టు మొహం మీదే మాట్లాడే లక్ష్మి.. ఇంటర్వ్యూలలో కొందరు జర్నలిస్టులు అడిగే తలా తోకా లేని ప్రశ్నలపై ఘాటుగా స్పందిస్తుంటారు. అభ్యంతరకరమైన, అసంబద్ధమైన ప్రశ్నలు అడిగితే.. స్ట్రాంగ్ కౌంటర్ ఇస్తుంటారు. తాజాగా అలాంటి ప్రశ్నే అడిగిన ఓ ఫిలిం జర్నలిస్టుపై మంచు లక్ష్మి అసహనం వ్యక్తం చేశారు. తెలుగు ఓటీటీ ఫ్లాట్ ఫామ్ 'ఆహా' ఇప్పుడు ఓ ఆసక్తికరమైన షోతో అలరించడానికి రెడీ అయింది. ‘టాప్ తెలుగు ఇన్ఫ్లుయెన్సర్’ అనే పేరుతో రాబోతున్న ఈ షోకి మంచు లక్ష్మి, యాంకర్ రష్మీ గౌతమ్, కమెడియన్ హర్ష చెముడు హోస్టులుగా వ్యవహరిస్తున్నారు. మంగళవారం (జూన్ 23) ఈ షోకి సంబంధించిన ప్రోమోను రిలీజ్ చేశారు. దీని కోసం హైదరాబాద్ లో ప్రెస్ మీట్ నిర్వహించారు. ఈ సందర్భంగా ఓ జర్నలిస్ట్ ఫీల్ అవ్వొద్దు అంటూ సుడిగాలి సుధీర్ పేరు ప్రస్తావిస్తూ రష్మీని ఓ ప్రశ్న అడిగారు. దానికి రష్మీ నవ్వుతూనే సమాధానమిచ్చింది కానీ, పక్కనే ఉన్న మంచు లక్ష్మి మాత్రం కాస్త ఘాటుగా బదులిచ్చారు. ''సుడిగాలి సుధీర్ తో కలిసి ఎన్నో షోలు చేశారు. అయితే ఈ ఈవెంట్ లో నిర్వహించిన గేమ్ లో ఆయన పేరు చెప్పడానికి కూడా మీరు ఇష్టపడలేదు. ఎందుకు?'' అని జర్నలిస్ట్ ప్రశ్నించగా.. ''ఇష్టపడకపోవడం ఏమీ లేదు. మేము ‘టాప్ తెలుగు ఇన్ఫ్లుయెన్సర్’ అనే షోని ప్రమోట్ చేయడానికి వచ్చాం. మమ్మల్ని లేదా ఒక పర్టిక్యులర్ వ్యక్తినో ప్రమోట్ చేయడానికి రాలేదు. ఈ షో గురించి నవ్వించడానికి ఒక ఎలిమెంట్ చేశాం. అంతే ఇక్కడ ఒకరి పేరు చెప్పకపోవడం అనేది ఏమీ లేదండి'' అని రష్మీ గౌతమ్ నవ్వుతూ బదులిచ్చింది.అప్పుడు మంచు లక్ష్మీ మైక్ అందుకుంటూ.. ''జోక్ జోక్ లాగా వేస్తే బాగుంటుంది. చిరిగిపోయే వరకూ లాగితే అది జోక్ అవ్వదు. ఆ ప్రశ్న అడిగి అడిగి అడిగి మీకే బోర్ కొట్టలేదా?. అసలు ఈ షోకి సంబంధం లేని ప్రశ్న అది. జస్ట్ క్లిక్ బైట్ కోసం మీరు ప్రశ్న అడిగితే, మేం దానికి ఆన్సర్ చేయాల్సిన అవసరం మాకు లేదు. రష్మీ ఈ సమాధానం చెప్పడానికి ఇబ్బంది పడొచ్చు కానీ, నేను దానికి డైరెక్ట్ గా ఆన్సర్ ఇస్తాను. ఇప్పటి నుంచైనా ఏదైనా ఇంట్రెస్టింగ్ క్యశ్చన్స్ అడగాలని కోరుకుంటున్నాను'' అని సెటైరికల్ గా మాట్లాడారు. ఇదిలా ఉంటే, ‘టాప్ తెలుగు ఇన్ఫ్లుయెన్సర్’ ఈవెంట్ లో 'రాను ముంబాయికి రాను' పాటకు మంచు లక్ష్మీ డ్యాన్స్ చేసి ఆకట్టుకున్నారు. ప్రస్తుతం ముంబైలో నివాసం ఉంటున్న ఆమె.. సాంగ్ మధ్యలో తాను ఇప్పుడు అక్కడే ఉంటున్నానని చెప్పి నవ్వులు పూయించారు. ఈ వీడియోలు ప్రస్తుతం సోషల్ మీడియాలో వైరల్ అవుతున్నాయి.