ఆ జిల్లాలో నోయిడా తరహా ఎడ్యుకేషన్ హబ్.. రూ. 600 కోట్లతో, చకచకా సాగుతున్న పనులు

ఉత్తరప్రదేశ్‌లోని నోయిడా నగరం ఏ విధంగానైతే విద్యా, పారిశ్రామిక రంగాల్లో శరవేగంగా దూసుకుపోయిందో.. అదే తరహాలో తెలంగాణను కూడా అంతర్జాతీయ విద్యా హబ్‌గా తీర్చిదిద్దుతామని ముఖ్యమంత్రి రేవంత్‌ రెడ్డి ఇటీవల ప్రకటించిన సంగతి తెలిసిందే. ఈ దార్శనికతకు సజీవ రూపంగా వికారాబాద్‌ జిల్లా దుద్యాల మండల పరిధిలోని హకీంపేట గ్రామంలో భారీ ఎడ్యుకేషన్‌ హబ్‌ నిర్మాణ పనులు ప్రస్తుతం వేగంగా, చకచకా సాగుతున్నాయి. ఉన్నత విద్యను కేవలం నగరాలకే పరిమితం చేయకుండా.. మారుమూల గ్రామీణ ప్రాంతాల పేద విద్యార్థులకు సైతం చేరువ చేయడమే లక్ష్యంగా ప్రభుత్వం ఈ మెగా ప్రాజెక్టును ప్రతిష్టాత్మకంగా చేపట్టింది. మొత్తం 248 ఎకరాల సువిశాల విస్తీర్ణంలో వివిధ రకాల విద్యాసంస్థల భవన సముదాయాల నిర్మాణాలు ఊపందుకున్నాయి.ఈ విద్యా కాంప్లెక్స్ పరిధిలో అత్యంత ఆకర్షణీయంగా, అత్యాధునిక వసతులతో రూ. 200 కోట్ల భారీ బడ్జెట్‌తో యంగ్‌ ఇండియా ఇంటిగ్రేటెడ్‌ స్కూల్‌ భవనాన్ని నిర్మిస్తున్నారు. ఈ భవన నిర్మాణ పనులు ఈ ఏడాది డిసెంబరు నాటికే పూర్తి చేసి ప్రారంభోత్సవానికి సిద్ధం చేయాలని సంబంధిత అధికారులు రాత్రింబగళ్లు శ్రమిస్తున్నారు. దీనితో పాటు, గ్రామీణ ప్రాంతాల్లో వైద్య సేవలను, వైద్య విద్యను బలోపేతం చేసేందుకు మెడికల్, నర్సింగ్, ఫిజియోథెరపీ, పారామెడికల్‌ విభాగాల భవన నిర్మాణాలను కూడా ఇక్కడే చేపట్టారు. వీటిని 2027 జూన్ నాటికి పూర్తి చేయాలనే గడువును విధించుకోగా.. ఇందుకోసం సర్కారు ప్రాథమికంగా రూ. 19 కోట్లకు పైగా నిధులను విడుదల చేసింది.మరోవైపు, పశుసంపదపై ఆధారపడే గ్రామీణ ఆర్థిక వ్యవస్థకు ఊతమిచ్చేలా ఇక్కడ వెటర్నరీ విభాగానికి సంబంధించి కూడా రూ. 200 కోట్లతో భారీ ఎత్తున విద్యాసంస్థల నిర్మాణాలు కొనసాగుతున్నాయి. ఈ పశువైద్య భవనాలను 2028 ఆగస్టు నాటికి పూర్తి చేయాలని లక్ష్యంగా పెట్టుకున్నారు. వీటితో పాటు ఉపాధి అవకాశాలను పెంచే ప్రభుత్వ ఇంజినీరింగ్‌ కాలేజీ భవనానికి రూ. 1.5 కోట్లు, మహిళల ఉన్నత విద్యా సాధికారత కోసం మహిళా డిగ్రీ కళాశాల భవన నిర్మాణానికి రూ. 6.10 కోట్లు ప్రభుత్వం ఇప్పటికే విడుదల చేసింది. వీటికి సంబంధించిన భవన నిర్మాణ పనులన్నీ ఈ ఏడాది సెప్టెంబరు నాటికే పూర్తి కానున్నాయని అధికారులు స్పష్టం చేశారు. అలాగే, బాలికల విద్యను మరింత ప్రోత్సహించేందుకు గాను రూ. 2.5 కోట్లతో నిర్మించనున్న బాలికల గురుకుల పాఠశాల పనులు 2027 నాటికి అందుబాటులోకి రానున్నాయి.వికారాబాద్ జిల్లాలోని కొడంగల్, దుద్యాల, వికారాబాద్, పరిగి, కోస్గి మండలాలు దశాబ్దాలుగా కేవలం వ్యవసాయం పైనే ఆధారపడి ఉన్నాయి. పారిశ్రామికంగా, విద్యాపరంగా ఈ ప్రాంతాలు తీవ్ర వెనుకబాటుకు గురికావడంతో ఇక్కడి యువతకు స్థానికంగా ఉన్నత విద్యావకాశాలు కరువయ్యాయి. ఈ ప్రాంతాల రూపురేఖలను మార్చేందుకే ప్రభుత్వం ఈ బృహత్తర నిర్ణయం తీసుకుంది. ఈ విద్యా ప్రాజెక్టు పూర్తి స్థాయిలో అందుబాటులోకి వస్తే.. రాబోయే రోజుల్లో దాదాపు 4 వేల మంది విద్యార్థులకు ఒకే ప్రాంగణంలో కేజీ నుంచి పీజీ వరకు నాణ్యమైన విద్య ఉచితంగా అందుబాటులోకి రానుంది. కేవలం ఒక్క యంగ్‌ ఇండియా ఇంటిగ్రేటెడ్‌ స్కూల్‌లోనే దాదాపు 2 వేల మంది విద్యార్థులు ఒకేసారి చదువుకునే అవకాశం కలగనుంది.రాబోయే 2027 విద్యాసంవత్సరం నాటికి ఈ ఎడ్యుకేషన్‌ హబ్‌లో అధికారికంగా రెగ్యులర్ తరగతులు ప్రారంభం కానున్నాయని జిల్లా ఉన్నతాధికారులు అంచనా వేస్తున్నారు. ఈ మెగా ప్రాజెక్టు పురోగతిపై కొడంగల్‌ ఏరియా డెవలప్‌మెంట్‌ అథారిత ప్రత్యేకాధికారి వెంకట్‌రెడ్డి మాట్లాడుతూ.. ఈ హబ్‌ పరిధిలోని అన్ని రకాల విద్యాసంస్థల మౌలిక వసతుల కల్పనకు, నిర్మాణాలకు గాను రాష్ట్ర ప్రభుత్వం మొత్తం రూ. 600 కోట్లు ఖర్చు చేయనుందని అధికారికంగా వెల్లడించారు. భవిష్యత్ తరాల విద్యార్థుల భద్రతను, అవసరాలను దృష్టిలో ఉంచుకుని, నిర్మాణ పనుల్లో ఎక్కడా ఎలాంటి నాణ్యతా లోపాలు లేకుండా నిరంతరం క్షేత్రస్థాయిలో పర్యవేక్షిస్తున్నామని ఆయన స్పష్టం చేశారు.