కడప రైతు అద్భుతం చేశారు.. ఏకంగా రూ. కోటికిపైగా ఆదాయం.. రెండు సలహాలతో సక్సెస్

కరువు ప్రాంతంగా పిలిచే రాయలసీమలో రైతులు అద్భుతాలు చేస్తున్నారు. సంప్రదాయ పంటల్ని సాగుచేస్తూనే అధిక లాభాలు అందుకుంటున్నారు. వ్యవసాయ పద్ధతుల్లో చిన్న, చిన్న మార్పులు చేసి సేంద్రీయ ఎరువులతో అరటి, దానిమ్మ, బత్తాయి (చీనీ), మామిడి సాగు చేస్తూ అధిక దిగుబడిని అందుకుంటున్నారు.

ఇటీవల అనంతపురం జిల్లాలో ఆపిల్ సాగు చేసిన రైతు సక్సెస్ అందుకుంటే.. తాజాగా కడప జిల్లాకు చెందిన రైతు సేంద్రీయ ఎరువులతో పాటుగా బిందు సేద్యంతో బత్తాయి సాగు చేసి అధిక దిగుబడితో భారీగా లాభాలు ఆర్జించారు. కడప జిల్లా బి చెర్లోపల్లెకు చెందిన రైతు పేరం రామాంజులురెడ్డి 11 ఎకరాల్లో బత్తాయి సాగు చేశారు.

రామాంజులు రెడ్డి మొదటి నుంచి ఉద్యానవనశాఖ అధికారుల సలహాలు పాటిస్తూ తన తోటకు బిందు సేద్యం (డ్రిప్) ఏర్పాటు చేసుకున్నారు. అందరు రైతుల్లా కాకుండా రసాయన ఎరువుల్ని వాడకుండా పేడ ఎరువు, ఆముదం, వేపచెక్క వంటి సేంద్రీయ ఎరువుల్ని మాత్రమే ఉపయోగించారు.

బిందు సేద్యంతో పాటుగా సేంద్రీయ ఎరువులు ఉపయోగించడంతో చెట్లు బాగా పెరిగాయి.. చీడపీడల బెడద కూడా లేదు. మిగిలిన రైతులకు ఎకరానికి 8 నుంచి 10 టన్నుల దిగుబడి వస్తుంటే.. రామాంజులు రెడ్డికి మాత్రం ఎకరాకు 14 నుంచి 16 టన్నుల దిగుబడి వచ్చింది.

11 ఎకరాల్లో 180 టన్నుల దిగుబడి సాధించారు. బిందు సేద్యంతో పాటుగా సేంద్రీయ ఎరువుల కారణంగా కాయలు కూడా నాణ్యంగా వచ్చాయి. రామాంజులు రెడ్డి తోటలో కాయలు నాణ్యంగా ఉండటంతో వ్యాపారుల నుంచి మంచి ధర వచ్చింది. ఏకంగా టన్ను రూ.98వేల నుంచి రూ.1.05 లక్షల వరకు కొనుగోలు చేశారు.

మిగిలిన రైతులు మాత్రం టన్ను రూ.70వేల నుంచి రూ.80వేల వరకు మాత్రమే విక్రయించారు. 11 ఎకరాల్లో పెట్టుబడి, మిగిలినవాటికి రూ.25 లక్షల వరకు ఖర్చు చేశారు. పెట్టుబడి పోను ఆయనకు ఆదాయం దాదాపు రూ.కోటికిపైగా వచ్చినట్లు రైతు రామాంజులు రెడ్డి చెబుతున్నారు.