భర్త మందలించాడని.. ప్రియుడితో కలిసి వివాహిత బలవన్మరణం

నాగర్‌కర్నూల్ జిల్లాలో తీవ్ర విషాదం చోటుచేసుకుంది. గతంలో ప్రేమించుకున్న ఓ వివాహిత, ఆమె ప్రియుడు కలిసి ఆత్మహత్యకు పాల్పడ్డారు. గ్రామ శివారులోని ఓ మామిడి తోటలో ఒకే చెట్టుకు ఉరివేసుకుని ఇద్దరూ ప్రాణాలు విడిచారు. శనివారం ఉదయం ఈ దారుణం ఘటన వెలుగులోకి వచ్చింది.పోలీసులు, మృతుల కుటుంబ సభ్యుల కథనం ప్రకారం.. కొల్లాపూర్ మండలం ఎల్లూరు గ్రామానికి చెందిన రేణుక (23), శివ (25) గతంలో ప్రేమించుకున్నారు. అయితే, వీరి వివాహానికి ఇరు కుటుంబాల పెద్దలు అంగీకరించకపోవడంతో, రెండేళ్ల క్రితం రేణుకకు మరొకరితో వివాహం జరిగింది. వీరికి ఏడాది వయసున్న కుమార్తె ఉంది.ఇటీవల రేణుక తన ప్రియుడు శివతో ఫోన్‌లో మాట్లాడుతుండటాన్ని గమనించిన భర్త ఆమెను మందలించాడు. దీంతో మనస్తాపానికి గురైన రేణుక వారం రోజుల క్రితమే పుట్టింటికి వచ్చేసింది. ఈ క్రమంలోనే శుక్రవారం అర్ధరాత్రి సమయంలో ఎవరికీ చెప్పకుండా ఇంటి నుంచి బయటకు వెళ్లిపోయింది. చిన్నారి ఏడుపు విని నిద్రలేచిన కుటుంబ సభ్యులు, ఇంట్లో రేణుక కనిపించకపోవడంతో ఆందోళన చెంది పరిసర ప్రాంతాల్లో గాలించారు.శనివారం తెల్లవారిన తర్వాత గ్రామ శివారులోని మామిడి తోటలో రేణుక, శివ ఒకే చెట్టుకు ఉరివేసుకుని విగతజీవులుగా కనిపించారు. ఈ హృదయవిదారక ఘటనతో గ్రామంలో విషాద ఛాయలు అలుముకున్నాయి. సమాచారం అందుకున్న స్థానిక పోలీసులు వెంటనే సంఘటనా స్థలానికి చేరుకుని మృతదేహాలను పరిశీలించారు. ఈ ఘటనపై కేసు నమోదు చేసిన పోలీసులు, ఆత్మహత్యకు దారితీసిన పూర్తి కారణాలపై దర్యాప్తు చేపట్టారు