కొత్త మలుపు’.. గాయని సునీత తనయుడి మూవీ ఎలా ఉంది

పెద్దగా వేగం కనిపించకపోవడం ప్రేక్షకుల్ని కాస్త ఇబ్బంది పెడుతుంది. ఏ లక్ష్యం లేకుండా జీవితాన్ని సరదాగా గడిపేసే కుర్రాడిగా హీరో పరిచయ సన్నివేశాలు ఫర్వాలేదనిపిస్తాయి. ఎప్పుడైతే పెళ్లి వేడుక కోసం కోనసీమలోకి అడుగు పెడతాడో.. అక్కడి నుంచే అసలు కథ మొదలవుతుంది.

నాయకానాయికల పరిచయ సన్నివేశాలు, పెళ్లి వేడుకలో చేసే హంగామా, గోదారోళ్ల అల్లరి అన్నీ కాలక్షేపాన్నిస్తాయి. ఓ చిన్న ట్విస్ట్‌తో ప్రథమార్ధానికి విరామమిచ్చిన తీరు ఆసక్తిరేకెత్తిస్తుంది. ఇక ద్వితీయార్ధంలో కథంతా ఎమోషనల్‌ టచ్‌తో సాగుతుంది. ఓ ఫొటో వల్ల కమల్‌ - వరలక్ష్మిల ప్రేమ ప్రయాణంలో అలజడి మొదలవడం.. అనుమానాలు - అపార్థాలు చోటు చేసుకోవడం.. ఈ క్రమంలో ఇద్దరూ పడే మానసిక వేదన అన్నీ హత్తుకుంటాయి. గతాన్ని చూసి ఓ వ్యక్తి వర్తమానాన్ని జడ్జ్‌ చేయకూడదనే సందేశాన్నిస్తూ క్లైమాక్స్‌ని తీర్చిదిద్దిన తీరు యువతరానికి కనెక్ట్‌ అయ్యేలా ఉంటుంది.

కమల్‌ పాత్రలో ఆకాశ్‌ చక్కగా ఒదిగిపోయాడు. ప్రథమార్ధంలో అల్లరి కుర్రాడిగా నవ్విస్తూనే.. ద్వితీయార్ధంలో భావోద్వేగభరితమైన నటనని కనబరిచాడు. పల్లెటూరి అమ్మాయి వరలక్ష్మి పాత్రలో భైరవి తెరపై కనిపించిన తీరు.. ఆమె సహజమైన నటన.. ఆకాశ్‌తో కెమిస్ట్రీ అన్నీ ఆకట్టుకుంటాయి. రఘుబాబు, పృథ్వీ అక్కడక్కడా నవ్వించారు. ప్రభావతి, మహేందర్, ఐశ్వర్య, సిద్ధు తదితరుల పాత్రలు పరిధి మేరకు ఉంటాయి. దర్శకుడు ఎంచుకున్న కథలో కొత్తదనం లేకున్నా.. దాన్ని కోనసీమ నేపథ్యం నుంచి ప్రజెంట్‌ చేసిన విధానం ఆకట్టుకుంటుంది. ఆ పల్లెటూరి అందాల్ని సుమంత్, జవహర్‌ రెడ్డి తమ కెమెరాల్లో చక్కగా బంధించి చూపించారు. యశ్వంత్‌ నాగ్‌ అందించిన పాటలు, నేపథ్య సంగీతం ఫర్వాలేదనిపిస్తుంది. నిర్మాణ విలువలు కథకు తగ్గట్లుగా ఉన్నాయి.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.