బిజీ మార్నింగ్స్ కు బెస్ట్ బ్రేక్ ఫాస్ట్.. నెయ్యి రోస్ట్ చిల్లా ట్రై చేయండి

తక్కువ సమయంలో తయారయ్యే వంటకం కోసం చూస్తున్నారా? అయితే నెయ్యి రోస్ట్ క్రిస్పీ చిల్లా మీకు అద్భుతమైన ఎంపిక. శనగపిండి, బొంబాయి రవ్వతో తయారయ్యే ఈ చిల్లా బయట క్రిస్పీగా, లోపల మెత్తగా ఉండి ప్రతి ఒక్కరినీ ఆకట్టుకుంటుంది. చిల్లా అనేది భారతీయ అల్పాహార వంటకాలలో ఎంతో ప్రాచుర్యం పొందిన వంటకం. ఇది త్వరగా తయారవడమే కాకుండా ఎక్కువసేపు ఆకలిని నియంత్రించడంలో కూడా సహాయపడుతుంది. సాధారణ చిల్లాలకు భిన్నంగా నెయ్యి రోస్ట్ చిల్లా ప్రత్యేకమైన రుచిని అందిస్తుంది. గ్రీన్ చట్నీ, టొమాటో కెచప్ లేదా ఉల్లిపాయ చట్నీతో దీని రుచి మరింత పెరుగుతుంది.

ముందుగా ఒక పెద్ద గిన్నెలో శనగపిండి, బొంబాయి రవ్వ, పచ్చిమిరపకాయ ముక్కలు, జీలకర్ర, వాము, ధనియాల పొడి, కారం, ఉప్పు వేసి బాగా కలపాలి. అనంతరం కొద్దికొద్దిగా నీరు పోస్తూ ముద్దలు లేకుండా మెత్తని పిండి మిశ్రమం తయారు చేసుకోవాలి. పిండి మరీ చిక్కగా లేదా మరీ పల్చగా ఉండకుండా జాగ్రత్త పడాలి. ఇప్పుడు ఒక నాన్‌స్టిక్ పాన్ లేదా దోశ పెనం మధ్యస్థ మంటపై వేడి చేయాలి. పెనం వేడెక్కిన తర్వాత కొద్దిగా నెయ్యి రాసి, సిద్ధం చేసిన పిండిని గరిటెతో తీసుకుని గుండ్రంగా పరచాలి. చిల్లా ఒక వైపు లేత బంగారు రంగులోకి మారిన తర్వాత అంచుల చుట్టూ కొద్దిగా నెయ్యి వేసి జాగ్రత్తగా తిప్పాలి. మరో వైపు కూడా బంగారు రంగు వచ్చే వరకు కాల్చాలి. ఇలా కాల్చినప్పుడు చిల్లా బయట కరకరలాడుతూ, లోపల మెత్తగా ఉంటుంది.

తయారైన నెయ్యి రోస్ట్ క్రిస్పీ చిల్లాను వేడివేడిగా గ్రీన్ చట్నీ, టొమాటో కెచప్ లేదా ఉల్లిపాయ చట్నీతో వడ్డించండి. ఉదయపు అల్పాహారంగా మాత్రమే కాకుండా సాయంత్రం స్నాక్‌గా కూడా దీనిని ఆస్వాదించవచ్చు. తక్కువ పదార్థాలతో, తక్కువ సమయంలో తయారయ్యే ఈ నెయ్యి రోస్ట్ చిల్లా రుచి పిల్లల నుంచి పెద్దల వరకు అందరికీ నచ్చుతుంది. ఒకసారి తయారు చేసి చూస్తే మీ ఇంట్లో ఫేవరెట్ బ్రేక్‌ఫాస్ట్‌గా మారిపోతుంది.