మృత దేహం ప్రైవేట్ పార్ట్స్ పై విద్యార్థిని పిచ్చి మాట లు.. కేసు న మోదు, అస లేం

విద్య కోసం దానం చేసిన పురుష మృతదేహాల ప్రైవేట్ పార్ట్స్ గురించి ఆమె చేసిన వ్యాఖ్యలు వివాదానికి కారణమయ్యాయి. ఈ వీడియో సోషల్ మీడియాలో వైరల్ కావడంతో నెటిజన్లు తీవ్రంగా స్పందించారు. వైద్య విద్య కోసం తమ శరీరాలను దానం చేసిన వ్యక్తులను అవమానించేలా ఈ వ్యాఖ్యలు ఉన్నాయని పలువురు అభిప్రాయపడ్డారు.

వివాదం పెరగడంతో KEM ఆస్పత్రి డీన్ డాక్టర్ హరీష్ పాఠక్ స్పందించారు. సోషల్ మీడియా ద్వారా ఈ విషయం తమ దృష్టికి వచ్చిందని ఆయన తెలిపారు. మృతదేహాలకు గౌరవం ఇవ్వడం వైద్య రంగంలో అత్యంత ముఖ్యమని, ఇలాంటి వ్యాఖ్యలను ఎట్టి పరిస్థితుల్లోనూ సమర్థించలేమని చెప్పారు. ఈ ఘటనపై ఇద్దరు సభ్యులతో ప్రత్యేక విచారణ కమిటీని ఏర్పాటు చేసినట్లు వెల్లడించారు. కమిటీ రిపోర్ట్ వచ్చిన తర్వాత తగిన చర్యలు తీసుకుంటామని స్పష్టం చేశారు.

ఈ ఘటనపై మహారాష్ట్ర సైబర్ పోలీసులు కేసు నమోదు చేశారు. సెజల్ పవార్‌తో పాటు కామెడియన్ ప్రణీత్ మోరేపైనా FIR నమోదు చేసినట్లు సమాచారం. వైద్య విద్య కోసం ఉపయోగించే మృతదేహాల గౌరవాన్ని దెబ్బతీసేలా వ్యాఖ్యలు చేశారనే ఆరోపణలతో విచారణ కొనసాగుతోంది. భారతీయ న్యాయ సంహిత (BNS)తో పాటు సమాచార సాంకేతిక చట్టంలోని కొన్ని సెక్షన్ల కింద కూడా కేసు నమోదు చేసినట్లు తెలుస్తోంది. దర్యాప్తులో ఆరోపణలు రుజువైతే జైలు శిక్ష, జరిమానా లేదా రెండూ విధించే అవకాశం ఉందని న్యాయ నిపుణులు చెబుతున్నారు.

భారత చట్టాల ప్రకారం మృతుల గౌరవాన్ని కించపరిచే చర్యలను తీవ్రమైన అంశంగా పరిగణిస్తారు. మృతదేహాలను అవమానించడం లేదా వాటిపై అభ్యంతరకర వ్యాఖ్యలు చేయడం నిరూపితమైతే ఒకటి నుంచి మూడు సంవత్సరాల వరకు జైలు శిక్ష పడే అవకాశం ఉంది. అలాగే వీడియో డిజిటల్ రిపోర్టుల ద్వారా వ్యాప్తి చెందడం వల్ల ఐటీ చట్టంలోని నిబంధనలు కూడా వర్తించవచ్చు. కొన్ని సందర్భాల్లో మూడు సంవత్సరాల వరకు జైలు శిక్షతో పాటు రూ.5 లక్షల వరకు జరిమానా విధించే అవకాశం ఉందని న్యాయవర్గాలు పేర్కొంటున్నాయి.

వివాదం తీవ్రరూపం దాల్చడంతో సెజల్ పవార్ వీడియో విడుదల చేసి బహిరంగ క్షమాపణలు చెప్పారు. మూడు నెలల క్రితం జరిగిన తన మొదటి స్టాండ్-అప్ షోలో చేసిన వ్యాఖ్యలు ఇప్పుడు వైరల్ అయ్యాయని తెలిపారు. తాను చెప్పిన మాటలు తప్పేనని అంగీకరించిన ఆమె, ఎవరి మనోభావాలను దెబ్బతీయాలనే ఉద్దేశం తనకు లేదని చెప్పారు. జరిగిన ఘటనపై తీవ్ర విచారం వ్యక్తం చేస్తూ, భవిష్యత్తులో ఇలాంటి పొరపాటు మళ్లీ చేయనని హామీ ఇచ్చారు.

ఈ ఘటనతో వైద్య విద్యలో నైతిక విలువలు, మృతదేహాల పట్ల గౌరవం, సోషల్ మీడియాలో బాధ్యతాయుత ప్రవర్తన వంటి అంశాలపై మరోసారి చర్చ మొదలైంది. వైద్య పరిశోధన కోసం శరీరాలను దానం చేసే వారి సేవలను గౌరవించాల్సిన అవసరం ఉందని పలువురు వైద్య నిపుణులు అభిప్రాయపడుతున్నారు.