క్యాబ్ డ్రైవర్ పై నటుడు సుప్రీత్ రెడ్డి దౌర్జన్యం.. కీసర పీఎస్ లో కేసు నమోదు

దౌర్జన్యాలకు దిగితే చట్టం తన పని తాను చేసుకుపోతుంది. ఇలాంటి ఘటనే తాజాగా హైదరాబాద్‌లో చోటుచుకుంది. టాలీవుడ్‌లో పలు చిత్రాల్లో ప్రతినాయక, సహాయ పాత్రలతో గుర్తింపు తెచ్చుకున్న నటుడు సుప్రీత్ రెడ్డి (ఛత్రపతి ఫేమ్ కాట్రాజ్) తీవ్ర వివాదంలో చిక్కుకున్నారు. రోడ్డుపై కారు అడ్డంగా ఉందనే చిన్న కారణంతో ఒక క్యాబ్ డ్రైవర్‌పై ఆయన బహిరంగంగా భౌతిక దాడికి దిగడం ఇప్పుడు సినీ, సామాజిక వర్గాల్లో తీవ్ర సంచలనంగా మారింది.* సినీ రంగానికి విజయ్ ఆంటోనీ గుడ్‌బై?... చెన్నైని వదిలి పల్లెటూరిలో సెటిల్ అయ్యేందుకు ప్లాన్ అసలేం జరిగింది? మేడ్చల్ జిల్లా కీసర పోలీస్ స్టేషన్ పరిధిలోని నాగారంలో ఈ గొడవ చోటుచేసుకుంది. పోలీసుల ప్రాథమిక సమాచారం, బాధితుడు తెలిపిన వివరాల ప్రకారం.. శ్రీహరి అనే వ్యక్తి ఉబర్ క్యాబ్ డ్రైవర్‌గా జీవనం సాగిస్తున్నాడు. ఆదివారం ఆయన నాగారం చౌరస్తా ప్రాంతంలో ఒక ట్రిప్ పూర్తి చేసుకుని, తదుపరి బుకింగ్ కోసం తన కారును రోడ్డు పక్కన నిలిపి వేచి చూస్తున్నాడు. అదే సమయంలో నటుడు సుప్రీత్ రెడ్డి తన ఫార్చునర్ కారులో ఆ మార్గంలో వచ్చారు. క్యాబ్ కాస్త రోడ్డుకు అడ్డంగా ఉందనే ఉద్దేశంతో సుప్రీత్ రెడ్డి ఒక్కసారిగా తీవ్ర ఆగ్రహానికి లోనయ్యారు. తన కారు దిగి నేరుగా క్యాబ్ డ్రైవర్ శ్రీహరి వద్దకు వెళ్లి కేకలు వేస్తూ, అసభ్య పదజాలంతో దూషించడం ప్రారంభించారు. ఊహించని ఈ పరిణామానికి షాక్‌కు గురైన డ్రైవర్ శ్రీహరి.. సర్దిచెప్పే ప్రయత్నం చేసినప్పటికీ సుప్రీత్ వినలేదు. ఆగ్రహంతో ఊగిపోతూ, రోడ్డుపై అందరూ చూస్తుండగానే విచక్షణ లేకుండా శ్రీహరిపై దాడి చేసి చితకబాదారు. రంగంలోకి దిగిన పోలీసులునటుడి చేతిలో దెబ్బలు తిన్నప్పటికీ క్యాబ్ డ్రైవర్ శ్రీహరి ఏమాత్రం వెనక్కి తగ్గలేదు. సమాజంలో సెలబ్రిటీల దౌర్జన్యాలకు చట్టపరంగానే బుద్ధి చెప్పాలని నిర్ణయించుకున్నాడు. ఘటనా స్థలం నుంచే వెంటనే డయల్ 100 ద్వారా పోలీసులకు సమాచారం అందించాడు. దాంతో కీసర పోలీసులు తక్షణమే స్పందించి సంఘటనా స్థలానికి చేరుకుని వివరాలు సేకరించారు. అనంతరం బాధితుడు శ్రీహరి కీసర పోలీస్ స్టేషన్‌లో రాతపూర్వక ఫిర్యాదును అందజేశారు. డ్రైవర్ ఫిర్యాదు మేరకు పోలీసులు నటుడు సుప్రీత్ రెడ్డిపై వివిధ సెక్షన్ల కింద కేసు నమోదు చేసి దర్యాప్తు ప్రారంభించారు. గొడవ జరిగిన ప్రాంతంలో ఉన్న సీసీటీవీ కెమెరాలను విశ్లేషించి, ఆధారాల ఆధారంగా సుప్రీత్ రెడ్డికి నోటీసులు జారీ చేసేందుకు సిద్ధమవుతున్నారు. ఈ ఘటనపై సోషల్ మీడియాలో నెటిజన్లు తీవ్రంగా మండిపడుతున్నారు. రాత్రింబవళ్లు కష్టపడి బతికే సామాన్య కార్మికులపై ఇలాంటి దౌర్జన్యాలు సహించబోమని క్యాబ్ డ్రైవర్ల సంఘాలు ఆగ్రహం వ్యక్తం చేశాయి. చట్టం ముందు అందరూ సమానమేనని, సుప్రీత్ రెడ్డిపై కఠినమైన చర్యలు తీసుకోవాలని డిమాండ్ చేస్తున్నాయి.* అప్పుడు అల్లుడితో, ఇప్పుడు మామతో... మెగాస్టార్ చిత్రంలో ‘కూలీ’ బ్యూటీ?నటుడు సుప్రీత్ రెడ్డి ఇండస్ట్రీలో ప్రత్యేకమైన బాడీ లాంగ్వేజ్, బేస్ వాయిస్‌తో గుర్తింపు తెచ్చుకున్నారు. పవన్ కళ్యాణ్ దర్శకత్వం వహించిన 'జానీ' (2003) చిత్రంతో టాలీవుడ్‌ ఎంట్రీ ఇచ్చిన ఆయన ఆ తర్వాత ఎస్.ఎస్. రాజమౌళి తెరకెక్కించిన 'సై' (2004) చిత్రంలో ప్రతినాయకుడి అనుచరుడిగా మంచి మార్కులు కొట్టేసారు. అయితే 2005లో వచ్చిన ‘ఛత్రపతి’ సినిమాలో ఆయన పోషించిన ‘కాట్రాజ్’ పాత్ర సుప్రీత్ కెరీర్‌లోనే ఒక మైలురాయిగా నిలిచింది. ఆ ఒక్క క్యారెక్టర్‌తో టాలీవుడ్‌లో తిరుగులేని గుర్తింపు తెచ్చుకున్నారు. ఆ తర్వాత 'మర్యాద రామన్న', 'మిర్చి', 'బిల్ల', 'దూకుడు', '1 - నేనొక్కడినే', 'ఆనందో బ్రహ్మ' వంటి పలు సూపర్ హిట్ సినిమాల్లో నటించడమే కాకుండా బాలీవుడ్‌లోనూ అవకాశాలు దక్కించుకున్నారు. ఇటీవల వచ్చిన రజినీకాంత్ ‘వేట్టయాన్’ చిత్రంలోనూ మెరిశారు. తెరపై విలనిజంతో మెప్పించిన ఈ నటుడు రియల్ లైఫ్‌లో ఇలాంటి వివాదంలో చిక్కుకోవడం చర్చనీయాంశంగా మారింది.