సీనియర్ నిర్మాత పహలాజ్ నిహలానీ కన్నుమూత

ప్రముఖ బాలీవుడ్ నిర్మాత, సెంట్రల్ బోర్డ్ ఆఫ్ ఫిల్మ్ సర్టిఫికేషన్ (సీబీఎఫ్‌సీ) మాజీ చైర్మన్ పహలాజ్ నిహలానీ (76) కన్నుమూశారు. గత కొంతకాలంగా లివర్ సిర్రోసిస్ వంటి కాలేయ సంబంధిత అనారోగ్య సమస్యలతో బాధపడుతున్న ఆయన, ముంబైలోని నానావతి ఆసుపత్రిలో చికిత్స పొంది ఇటీవలే నివాసానికి చేరుకున్నారు. తన నివాసంలోనే గురువారం ఆయన తుదిశ్వాస విడిచినట్లు కుటుంబ సభ్యులు వెల్లడించారు. శాంతాక్రూజ్ హిందూ శ్మశానవాటికలో నిన్న మధ్యాహ్నం 3 గంటలకు ఆయన అంత్యక్రియలు ముగిశాయి. ఈ కార్యక్రమానికి పలువురు సినీ రంగ ప్రముఖులు హాజరై నిహలానీకి నివాళులర్పించారు.1950 జనవరి 10న జన్మించిన నిహలానీ, 1982లో 'హాత్‌కడి' చిత్రంతో నిర్మాతగా తన ప్రస్థానాన్ని ప్రారంభించారు. 1980, 90వ దశకాల్లో గోవిందాను స్టార్‌గా నిలబెట్టిన 'ఇల్జామ్', 'ఆంఖే', 'షోలా ఔర్ షబ్నమ్' వంటి విజయవంతమైన చిత్రాలను ఆయన నిర్మించారు. గోవిందాతో పాటు అనిల్ కపూర్, సునీల్ శెట్టి వంటి అగ్ర హీరోలతో మాస్ మసాలా ఎంటర్‌టైనర్‌లను రూపొందించి ప్రేక్షకులను విశేషంగా అలరించారు.2015 నుంచి 2017 వరకు సీబీఎఫ్‌సీ చైర్మన్‌గా పహలాజ్ నిహలానీ బాధ్యతలు నిర్వహించారు. అయితే, ఆయన పదవీకాలం పలు వివాదాలకు దారితీసింది. చిత్రాల సెన్సార్‌షిప్ విషయంలో ఆయన కఠినంగా వ్యవహరించడం సినీ పరిశ్రమలో అప్పట్లో పెద్ద ఎత్తున చర్చకు దారితీసింది. ఆయన మృతి పట్ల ప్రస్తుత సీబీఎఫ్‌సీ అధికారులు, నటులు గోవిందా, చుంకీ పాండే, దర్శకుడు అనీస్ బజ్మీ సహా పలువురు బాలీవుడ్ ప్రముఖులు ప్రగాఢ సంతాపం వ్యక్తం చేశారు