ఏళ్లకే రూ. 7 కోట్లు.. వైభవ్ సూర్యవంశీ ఆదాయంపై ఎంత పన్ను పడుతుంది? మైనర్ అయినా కట్టాల్సిందేనా

మైనర్ సంపాదించే ఆదాయం చాలా సందర్భాల్లో తల్లిదండ్రుల ఆదాయంలోనే కలుపుతారు. దీనిని క్లబ్బింగ్ ఆఫ్ ఇన్‌కంగా పిలుస్తారు. ముఖ్యంగా బ్యాంక్ నుంచి సేవింగ్స్ అకౌంట్, ఫిక్స్‌డ్ డిపాజిట్ వడ్డీలు, పెట్టుబడులపై వచ్చే రాబడులు, పేరెంట్స్ బదిలీ చేసిన ఆస్తుల ద్వారా వచ్చే ఆదాయం దీని పరిధిలోకి వస్తుంది. వైభవ్ విషయంలో వేరే.. కానీ 15 ఏళ్ల వైభవ్ సూర్యవంశీ విషయంలో ఈ పరిస్థితి కాస్త భిన్నంగా ఉంటుంది. ఎందుకంటే వైభవ్ ఆదాయం.. తన వ్యక్తిగత ప్రతిభ, సామర్థ్యం, క్రీడా నైపుణ్యం వల్ల వస్తుంది. ఇక్కడ క్రికెట్ మ్యాచ్ ఫీజులు సహా బ్రాండ్ ప్రచారాలు, ఐపీఎల్ కాంట్రాక్ట్స్, స్పాన్సర్ డీల్స్ ఆదాయాలు అన్నీ తన సొంతంగా ఆర్జించినవిగానే పరిగణించాల్సి ఉంటుంది. అందుకే.. అతడి ఆదాయాన్ని తన పేరెంట్స్ ఆదాయంలో కలపరు. వైభవ్ పేరిటే ఐటీఆర్ ఫైల్ చేయాలి.. కాబట్టి ఇక్కడ వైభవ్ సంపాదనకు సంబంధించి అతడికే హక్కు ఉంటుంది. అంటే అతడు మాత్రమే టాక్స్ కట్టాల్సి ఉంటుంది. ఇక్కడ అవసరమైతే.. అతని తరఫున తన తల్లిదండ్రులు, చట్టబద్ధ సంరక్షకులు ఎవరైనా ఐటీ రిటర్న్స్ ఫైల్ చేయాల్సి ఉంటుంది. సాధారణంగా ఇలాంటి వృత్తి పర లేదా కమర్షియల్ ఆదాయాల్ని.. వ్యాపారం లేదా వృత్తి ఆదాయం కింద పరిగణించి సదరు ఐటీఆర్ ఫారంల (ఐటీఆర్ 3 లేదా 4 ఫారం) ద్వారా రిపోర్ట్ చేస్తారు. క్రికెటర్లకు ఒక్కరికే కాదు.. ఆదాయపు పన్ను చట్టంలో ఈ నిబంధన క్రికెటర్లకు మాత్రమే కాదు.. ఇతర చైల్డ్ ఆర్టిస్టులు, యాక్టర్లు, బాల గాయకులు, సోషల్ మీడియా కంటెంట్ క్రియేటర్లు, రియాల్టీ షో విన్నర్స్, ఇతర క్రీడాకారులు తమ సొంత ప్రతిభ ద్వారా అంటే వ్యక్తిగతంగా ఆదాయం పొందితే ఇదే వర్తిస్తుందని గుర్తుంచుకోవాలి. ఇలా ఆర్జించే వారు మనకు చాలా మందే కనిపిస్తుంటారు. ఎంత టాక్స్ పే చేయాలి మరి..? టాక్స్ ఎక్స్‌పర్ట్స్ ప్రకారం.. వైభవ్ సూర్యవంశీ ఆర్జిస్తున్న కోట్లాది రూపాయల ఆదాయం.. తన సొంత క్రికెట్ ప్రతిభ కారణంగానే కాబట్టి అది పూర్తిగా అతని సొంత లేదా వ్యక్తిగత ఆదాయం కిందికే వస్తుంది. అప్పుడు భారత పన్ను చట్టాల ప్రకారం.. అతను మైనర్ అయినా.. పన్ను పరంగా స్వతంత్ర పన్ను చెల్లింపుదారుగా వ్యవహరించాల్సి ఉంటుంది. పన్ను చట్టంలోని శ్లాబుల ఆధారంగా చెల్లించాల్సి ఉంటుంది. కాబట్టి ఇక్కడ తన ఆదాయంపై 30 శాతం వరకు టాక్స్ పడుతుందన్నమాట.