టాలీవుడ్ గర్వించే క్షణం రానుందా? కల్కిపై అందరి చూపు

మరోసారి జాతీయ స్థాయిలో తెలుగు సినిమా సత్తా చాటే అవకాశం వచ్చిందనే ఉత్సాహంలో టాలీవుడ్ అభిమానులు ఉన్నారు. 2024 సంవత్సరానికి సంబంధించిన 72వ జాతీయ చలనచిత్ర అవార్డుల విజేతలను ఈ సాయంత్రం ప్రకటించే అవకాశం ఉండటంతో అందరి దృష్టి ఇప్పుడు కల్కి 2898ADపై నిలిచింది. ప్రభాస్(Prabhas) హీరోగా నాగ్ అశ్విన్(Nag Ashwin) దర్శకత్వంలో రూపొందిన ఈ భారీ సైన్స్ ఫిక్షన్ మూవీ కనీసం ఒక ప్రధాన విభాగంలో అయినా జాతీయ అవార్డు అందుకోవాలని అభిమానులు సోషల్ మీడియాలో పెద్ద ఎత్తున ప్రచారం చేస్తున్నారు.

సినిమా రిలీజైన‌ప్ప‌టి నుంచే దాని విజువల్ ప్రెజెంటేషన్, వరల్డ్ బిల్డింగ్, అత్యున్నత స్థాయి VFX పనితీరుకు దేశవ్యాప్తంగా ప్రశంసలు దక్కాయి. భారతీయ పురాణాలను ఫ్యూచరిస్టిక్ కాన్సెప్ట్‌తో మేళవిస్తూ రూపొందించిన ఈ సినిమా టెక్నిక‌ల్ ప‌రంగా కొత్త ప్రమాణాలను నెలకొల్పిందని సినీ విశ్లేషకులు అభిప్రాయపడుతున్నారు. అందుకే బెస్ట్ ఫీచ‌ర్ ఫిల్మ్ లేదా బెస్ట్ విజువల్ ఎఫెక్ట్స్ విభాగాల్లో కల్కికి బలమైన అవకాశాలు ఉన్నాయని అభిమానులు నమ్ముతున్నారు. టాలీవుడ్ హిస్ట‌రీలో అత్యంత ప్రతిష్ఠాత్మకమైన విజువల్ స్పెక్టకల్స్‌లో ఈ సినిమా ఒకటిగా నిలిచిందనే అభిప్రాయం కూడా బలంగా వినిపిస్తోంది.

అయితే తుది నిర్ణయం జాతీయ అవార్డుల జ్యూరీదే అయినప్పటికీ, కల్కి 2898 AD చుట్టూ ఏర్పడిన అంచనాలు మాత్రం ప్రత్యేకంగా కనిపిస్తున్నాయి. ఇటీవల పలు వేదికలపై ఈ సినిమా సాంకేతిక విభాగాల్లో ప్రశంసలు, అవార్డులు అందుకోవడంతో జాతీయ అవార్డుల్లోనూ అదే జోరు కొనసాగుతుందా అనే ఆసక్తి నెలకొంది. ఒకవేళ కల్కి ప్రధాన విభాగాల్లో విజయం సాధిస్తే, అది కేవలం చిత్ర బృందానికే కాకుండా తెలుగు సినిమా సాంకేతిక ప్రతిభకు కూడా మరో గొప్ప గుర్తింపుగా నిలుస్తుందని సినీ వర్గాలు భావిస్తున్నాయి.