ట్విట్టర్ లోనే ఫుల్ సినిమా! లకు ఎలాన్ మస్క్ చెక్ పెట్టబోతున్నాడా

జర్మనీలో సాధారణ విడుదలకు అడ్డంకులు ఎదుర్కొన్న ఒక వివాదాస్పద సినిమాను… ప్రపంచంలోనే అత్యంత ధనవంతుడు ఎలాన్ మస్క్ నేరుగా తన X (ట్విట్టర్) ప్లాట్‌ఫామ్‌లో 48 గంటల పాటు పూర్తి సినిమాగా స్ట్రీమ్ చేశాడు.

దాంతో “X ఇక సోషల్ మీడియా మాత్రమేనా… లేక రేపటి OTT ప్లాట్‌ఫామా?” అనే చర్చకు ఈ సంఘటన తెరతీసింది.

అసలు ఈ సినిమా ఏమిటి? జర్మనీలో ఎందుకు వివాదం రేగింది? ఎలాన్ మస్క్ ఎందుకు దీనిని ప్రపంచానికి చూపించాలని నిర్ణయించుకున్నాడు? ఈ వ్యవహారం వెనుక రాజకీయాలు, వ్యాపార వ్యూహం ఏమిటి?

ఈ కథను కేవలం సినిమా వివాదంగా చూస్తే అసలు విషయం మిస్ అవుతాం. ఇందులో ఎలాన్ మస్క్ ఆలోచన ఉంది… రాజకీయాలు ఉన్నాయి… వ్యాపార వ్యూహం ఉంది… భవిష్యత్తులో సినిమాలు ఎలా విడుదలవుతాయనే ప్రశ్న కూడా ఉంది. అందుకే ప్రపంచవ్యాప్తంగా ఈ సినిమా కంటే, దీని చుట్టూ జరిగిన పరిణామాలే ఎక్కువ చర్చకు దారి తీశాయి. ఇవన్ని కలవడంతోనే Citizen Vigilante ఒక్కసారిగా ప్రపంచ దృష్టిని ఆకర్షించింది.

ఎలాన్ మస్క్ తనను తాను చాలాకాలంగా “Free Speech Absolutist” గా అభివర్ణించుకుంటున్నారు.ఎవరైనా చట్టాన్ని ఉల్లంఘించనంత వరకు వారి అభిప్రాయాలను లేదా కంటెంట్‌ను ప్రభుత్వాలు, సంస్థలు అడ్డుకోకూడదని నమ్మే వ్యక్తి. అందుకే సెన్సార్‌షిప్‌కు సంబంధించిన అంశాలపై ఆయన తరచూ బహిరంగంగా స్పందిస్తుంటారు.

ప్రభుత్వాలు, సెన్సార్ బోర్డులు లేదా పెద్ద టెక్ కంపెనీలు ఏదైనా కంటెంట్‌ను అడ్డుకుంటే… అలాంటి కంటెంట్‌కు X వేదిక కావాలన్నదే ఆయన బహిరంగ వైఖరి.

ఈ సినిమా జర్మనీలో సాధారణ విడుదలకు అవసరమైన రేటింగ్ పొందలేకపోవడంతో అక్కడ ప్రదర్శనకు పరిమితులు ఏర్పడ్డాయి. దర్శకుడు ఉవే బోల్ ఈ విషయాన్ని ప్రస్తావించిన కొద్ది రోజుల్లోనే మస్క్ పూర్తి సినిమాను Xలో 48 గంటల పాటు అందుబాటులో ఉంచారు.

ఈ నిర్ణయంతో ఆయన ఒక సందేశం ఇవ్వాలనుకున్నారు.

“ప్రభుత్వాలు ఆపినా… Xలో మీరు చూడొచ్చు.” అని.

మస్క్ కేవలం ఒక సినిమాను ఉచితంగా చూపించలేదు, దీని వెనుక ఒక పెద్ద బిజినెస్ మైండ్ గేమ్ ఉంది:

కంటెంట్ క్రియేటర్లకు ఎర: పెద్ద పెద్ద సినిమాలే నేరుగా X లోకి వస్తే, భవిష్యత్తులో క్రియేటర్లు, చిన్న నిర్మాతలు థియేటర్లు, OTTల చుట్టూ తిరగాల్సిన పనిలేదు.

ట్రేడ్ మార్కెట్‌లో సంచలనం: మస్క్ X లో పెట్టిన 48 గంటల హైప్ వల్ల, ఆ తర్వాత Apple TV, Amazon Prime లలో డిజిటల్ కొనుగోళ్లలో ఈ సినిమా నంబర్ 1 స్థానానికి దూసుకెళ్లింది. అంటే X ఒక ప్రమోషన్ ఇంజిన్‌గా మారిపోయింది!

పై నుంచి చూస్తే ఇది ఒక సినిమా ప్రమోషన్‌లా కనిపించొచ్చు. కానీ వ్యాపార కోణంలో చూస్తే ఇది Xకు భారీ ప్రచారం.

సినిమా చూడటానికి వేలాది మంది కొత్తగా Xలోకి వచ్చారు. దాంతో ట్రాఫిక్, యూజర్ ఎంగేజ్‌మెంట్ రెండూ పెరిగాయి.

ఇప్పటివరకు ట్విట్టర్ అంటే పోస్టులు. ఇప్పుడు… “ఫుల్ లెంగ్త్ సినిమా కూడా చూడొచ్చు.” అనే భావనను మస్క్ ప్రజల్లోకి తీసుకెళ్లారు.

ఇవే సినిమా విడుదలకు చివరి గమ్యాలు అనుకునే సమయంలో… “రేపు X కూడా సినిమా విడుదల వేదిక అవుతుందా?” అనే ప్రశ్న మొదలైంది.

4. వివాదాస్పద కంటెంట్‌కు ప్రత్యామ్నాయ వేదిక

పెద్ద స్టూడియోలు లేదా సంప్రదాయ మీడియా దూరంగా ఉండే సినిమాలకు X ఒక ప్రత్యామ్నాయ వేదికగా నిలవాలని మస్క్ ప్రయత్నిస్తున్నారనే విశ్లేషణలు వినిపిస్తున్నాయి.

ఈ సినిమాలో ఆర్మీ హామర్ పోషించిన పాత్ర మైఖేల్ సాండర్స్. అమెరికాకు చెందిన మాజీ సైనికుడు. తండ్రి వ్యాపారం కోసం క్రొయేషియాకు వెళ్తాడు. అక్కడ పెరుగుతున్న నేరాలు, వ్యవస్థ వైఫల్యంతో విసిగిపోయి… చట్టాన్ని తన చేతుల్లోకి తీసుకుంటాడు. నేరస్తులను స్వయంగా వేటాడి చంపడం మొదలుపెడతాడు. తన చర్యలను సోషల్ మీడియాలో పోస్ట్ చేస్తూ… కొంతమందికి హీరోగా… మరికొందరికి ప్రమాదకర వ్యక్తిగా మారిపోతాడు. ఇక్కడే సినిమా అసలు వివాదంలోకి వెళ్తుంది.

విమర్శకుల అభిప్రాయం ప్రకారం… ఈ సినిమాలో వలసదారులపై తీవ్రమైన ప్రతికూల చిత్రణ ఉందని, హింసను సమర్థించేలా కనిపిస్తుందని ఆరోపణలు వచ్చాయి. మరోవైపు దర్శకుడు ఉవే బోల్ మాత్రం…”ప్రజలు మనసులో అనుకునే విషయాలనే సినిమాలో చూపించాం.” అని చెబుతున్నారు. అంటే… ఒకే సినిమాను… ఒక వర్గం “చేదు నిజం” అంటోంది. మరో వర్గం “ప్రమాదకర ప్రచారం” అంటోంది. అందుకే ఇది సినిమా కంటే పెద్ద రాజకీయ చర్చగా మారింది.

ఈ సినిమాకు జర్మనీ సెన్సార్ బోర్డు (FSK) రేటింగ్ ఇవ్వడానికి నిరాకరించింది. రేటింగ్ లేకపోవడంతో అక్కడ సాధారణ విడుదల సాధ్యం కాలేదు.

అధిక హింస: సినిమాలో విపరీతమైన క్రూరత్వం, యాక్షన్ సీన్లు ఉన్నాయి.

వలసదారులపై ప్రతికూల సందేశాలు: ఐరోపాలో పెరుగుతున్న వలసదారుల వల్ల నేరాలు పెరుగుతున్నాయనే కోణాన్ని, చట్టాన్ని చేతుల్లోకి తీసుకునే ఒక విజిలాంటే కథను ఇందులో చూపించడంతో దీనిపై తీవ్ర విమర్శలు వచ్చాయి

ఇదే ఈ కథలో అసలు ట్విస్ట్. మస్క్ చాలా కాలంగా… ఫ్రీ స్పీచ్, ప్రభుత్వ సెన్సార్‌షిప్, ఇమ్మిగ్రేషన్, యూరప్ రాజకీయాలు వంటి అంశాలపై తన అభిప్రాయాలను బహిరంగంగా చెబుతూ వస్తున్నారు. అందుకే ఈ సినిమాను Xలో పెట్టడం కేవలం ఒక దర్శకుడికి చేసిన సహాయం కాదని… తన రాజకీయ, సామాజిక వైఖరికి అనుగుణంగా చేసిన నిర్ణయమని విశ్లేషకులు భావిస్తున్నారు.

ఈ సినిమా ఆర్మీ హామర్‌కు కూడా కీలకమే. లైంగిక దాడి ఆరోపణల నేపథ్యంలో ఆయన కెరీర్‌కు పెద్ద దెబ్బ తగిలింది. విచారణ జరిగినప్పటికీ చివరకు ఆయనపై క్రిమినల్ అభియోగాలు నమోదు కాలేదు. ఆ గ్యాప్ తర్వాత ప్రధాన హీరోగా వస్తున్న తొలి చిత్రం కావడంతో ఈ సినిమా ముందే వార్తల్లో నిలిచింది. దానికి ఇప్పుడు ఎలాన్ మస్క్ X విడుదల మరింత ప్రచారం తీసుకొచ్చింది.

సినిమా ఇండస్ట్రీలో డిస్ట్రిబ్యూషన్ మోడల్‌ను మార్చేలా ఎలన్ మస్క్ వేసిన ఈ అడుగు సరికొత్త చర్చకు దారితీసింది. ఈ సంఘటన ఒక పెద్ద ప్రశ్నను లేవనెత్తుతోంది. రేపు మన తెలుగు సినిమాలు కూడా Netflix, Prime Videoలను దాటేసి నేరుగా Xలోనే విడుదలయ్యే రోజులు వస్తే? చిన్న సినిమాలకు థియేటర్లు దొరకని తరుణంలో, ఇది ఒక అద్భుతమైన ప్రత్యామ్నాయం అవుతుందా?

ఇది ఒక్క సినిమాతోనే ఆగిపోతుందా? లేక భవిష్యత్తులో మరిన్ని చిత్రాలు కూడా సోషల్ మీడియా ప్లాట్‌ఫామ్‌లను నేరుగా ఎంచుకుంటాయా? అనేది ఆసక్తికరంగా మారింది.

ఒక సినిమా ప్రపంచవ్యాప్తంగా చర్చకు రావడానికి ఎప్పుడూ భారీ కలెక్షన్లు అవసరం లేదు. కొన్నిసార్లు ఒక వివాదం, ఒక రాజకీయ చర్చ, ఒక ఎలాన్ మస్క్ కూడా సరిపోతారు. ఇప్పుడు అందరి దృష్టి Citizen Vigilanteపై కాదు… X తర్వాతి అడుగు ఏమిటన్న దానిపైనే ఉంది.