త్రిష పొలిటికల్ ఎంట్రీపై ఊహించని ట్విస్ట్

తమిళనాడు రాజకీయాలు ఎప్పుడూ రసవత్తరంగానే సాగుతుంటాయి. సినిమా రంగానికి, రాజకీయాలకు అక్కడ విడదీయరాని బంధం ఉంది. తాజాగా కోలీవుడ్ స్టార్ హీరోయిన్, అందాల నటి త్రిష క్రిష్ణన్ ప్రత్యక్ష రాజకీయాల్లోకి అడుగుపెట్టబోతున్నారనే వార్త ఇప్పుడు తమిళనాడుతో పాటు రెండు తెలుగు రాష్ట్రాల్లోనూ పెను సంచలనంగా మారింది. తమిళ సూపర్ స్టార్, ప్రస్తుత తమిళనాడు సీఎం విజయ్ రాజకీయ ప్రస్థానంలో త్రిష కీలక పాత్ర పోషించబోతున్నారనే ఊహాగానాలు గత కొంతకాలంగా గట్టిగా వినిపిస్తున్న తరుణంలో, తాజాగా దీనిపై ఒక కీలకమైన ట్విస్ట్ చోటుచేసుకుంది. ఈ ఆసక్తికరమైన చర్చ ఇప్పుడు సోషల్ మీడియాను సైతం ఊపేస్తోంది.

ఇంతకీ అసలు విషయం ఏంటంటే, ఇటీవల జరిగిన తమిళనాడు అసెంబ్లీ ఎన్నికల్లో సీఎం విజయ్ రెండు స్థానాల నుంచి భారీ మెజారిటీతో విజయం సాధించారు. అయితే, నిబంధనల ప్రకారం ఏదో ఒక స్థానాన్ని మాత్రమే ఉంచుకోవాల్సి ఉండటంతో, ఆయన తాను గెలిచిన 'తిరుచ్చి ఈస్ట్' నియోజకవర్గ శాసనసభ స్థానానికి రాజీనామా చేశారు. విజయ్ తప్పుకోవడంతో ఖాళీ అయిన ఈ స్థానం నుంచి ఆయన స్థాపించిన తమిళగ వెట్రి కళగం (TVK) పార్టీ తరపున ఎవరు పోటీ చేస్తారనే దానిపై తీవ్ర ఉత్కంఠ నెలకొంది. ఈ క్రమంలోనే మొదట త్రిష పేరు తెరపైకి వచ్చింది. సీఎం విజయ్ ఖాళీ చేసిన ప్రతిష్టాత్మక స్థానం నుంచే ఆమె ప్రత్యక్ష ఎన్నికల బరిలోకి దిగుతారని అందరూ భావించారు.

అయితే మధ్యలో ఈ కథలోకి ఊహించని మరో ట్విస్ట్ వచ్చింది. ప్రముఖ కొరియోగ్రాఫర్, నటుడు, దర్శకుడు రాఘవ లారెన్స్ ఈ 'తిరుచ్చి ఈస్ట్' స్థానం నుండి టీవీకే పార్టీ అభ్యర్థిగా పోటీ చేయబోతున్నారంటూ వార్తలు హల్ చల్ చేశాయి. దీంతో రాజకీయ విశ్లేషకులు, అభిమానుల దృష్టి ఒక్కసారిగా లారెన్స్ వైపు మళ్లింది. కానీ, తాజాగా ఈ వివాదంపై రాఘవ లారెన్స్ స్వయంగా స్పందించి సున్నితంగా క్లారిటీ ఇచ్చారు. సీఎం విజయ్ పార్టీ (TVK) కోసం మొదటి నుంచి ఎంతో కష్టపడి, పార్టీ జెండా మోసిన నిజమైన కార్యకర్తలకు ఆ సీటు దక్కడం న్యాయమని, కానీ తాను మధ్యలో వచ్చి ఆ స్థానంలో పోటీ చేయడం రాజకీయ ధర్మం కాదని ఆయన స్పష్టం చేశారు. ప్రస్తుతానికి తాను ఈ ఉపఎన్నిక బరి నుంచి తప్పుకుంటున్నట్లు అధికారికంగా ప్రకటించారు.

రాఘవ లారెన్స్ ఈ రేసు నుండి తప్పుకోవడంతో, ఇప్పుడు పొలిటికల్ సర్కిల్స్ చూపు మళ్లీ ఒక్కసారిగా స్టార్ హీరోయిన్ త్రిషపై పడింది. విజయ్ రాజీనామాతో ఖాళీ అయిన 'తిరుచ్చి ఈస్ట్' ఉపఎన్నిక బరిలో టీవీకే పార్టీ అభ్యర్థిగా త్రిషనే రంగంలోకి దింపే అవకాశాలు నూటికి నూరు శాతం ఎక్కువగా ఉన్నాయని రాజకీయ విశ్లేషకులు బలంగా అభిప్రాయపడుతున్నారు. విజయ్, త్రిషల కాంబినేషన్‌కు వెండితెరపై ఎంతటి క్రేజ్ ఉందో ప్రత్యేకంగా చెప్పక్కర్లేదు. ఇప్పుడు అదే క్రేజ్‌ను రాజకీయ వేదికపై కూడా ఉపయోగించి, పార్టీని మరింత బలోపేతం చేయాలని విజయ్ భావిస్తున్నట్లు సమాచారం. మరి ఈ క్రేజీ పొలిటికల్ ఎంట్రీపై త్రిష లేదా తమిళగ వెట్రి కళగం (TVK) పార్టీ వర్గాల నుంచి ఎలాంటి అధికారిక ప్రకటన వస్తుందో తెలియాలంటే మరికొన్ని రోజులు వేచి చూడాల్సిందే.

ఆంధ్ర తీరంలో ఇంత సీక్రేట్ ఉందా.. అపార ఖనిజ సంపదపై ప్రత్యేక విశ్లేషణ!

బండి భగీరథ్ బెయిల్ పిటిషన్‌పై రేపు హైకోర్టులో విచారణ

.