మెట్రో నగరాలు, పట్టణాల్లో ఉద్యోగం లేదా చదువు నిమిత్తం ఉండే బ్యాచిలర్లు ఎదుర్కొనే ప్రధాన సమస్యల్లో అద్దె ఇల్లు దొరకకపోవడం ఒకటి. ఫ్లాట్ ఓనర్ ఇల్లు ఇవ్వడానికి సిద్ధంగా ఉన్నప్పటికీ.. అపార్ట్మెంట్ లేదా హౌసింగ్ సొసైటీలు మాత్రం మా సొసైటీలో బ్యాచిలర్స్కు ఇళ్లు ఇవ్వం అంటూ హుకుం జారీ చేస్తుంటాయి. అయితే పెళ్లి కాలేదన్న ఏకైక కారణంతో వ్యక్తులను నిరాకరించే హక్కు హౌసింగ్ సొసైటీలకు ఉందా? భారత రాజ్యాంగం, సహకార చట్టాలు, న్యాయస్థానాల తీర్పులు ఏం చెబుతున్నాయి? అనే విషయాలు చాలా మందికి తెలియవు. యువతీయువకులు రాత్రి వేళల్లో లేట్ నైట్ పార్టీలు చేసుకుంటారని, మద్యం సేవించి గొడవలు చేస్తారని, ప్రశాంతతకు భంగం కలిగిస్తారనే ముందస్తు అపోహలతోనే ఇలాంటి నిర్ణయాలు తీసుకుంటారు. చట్టాలపై పూర్తి అవగాహన లేకపోవడంతో వేలాది మంది యువత సొసైటీల బెదిరింపులకు భయపడి మౌనంగా ఇళ్లను వెతుక్కుంటూ అల్లాడిపోతున్నారు.
