Donald Trump: ప్రపంచ చమురు రవాణాలో అత్యంత కీలకమైన స్ట్రెయిట్ ఆఫ్ హోర్ముజ్ జలసంధిపై పూర్తి నియంత్రణ సాధించేందుకు అమెరికా అధ్యక్షుడు డోనాల్డ్ ట్రంప్ కొత్త ఎత్తుగడ వేశారు. పర్షియన్ గల్ఫ్, ఒమన్ గల్ఫ్ పరిసర ప్రాంతాల్లోని కీలక భాగాలను రెడ్ మార్క్ చేస్తూ ఈ ప్రాంతాలు వాషింగ్టన్ కంట్రోల్లో ఉంటాయని ప్రకటించారు. ఒమన్ పై సైనిక దాడికి సిద్ధమవుతున్నారనే వార్తలు వస్తున్న తరుణంలో ట్రంప్ ఈ ప్రకటన చేయడం అంతర్జాతీయ రాజకీయాల్లో తీవ్ర వివాదానికి దారితీసింది. గల్ఫ్ ప్రాంతంలో శతాబ్దాలుగా సాగుతున్న వ్యాపార, సైనిక ఆధిపత్య పోరును ఇది మరింత క్లిష్టం చేసింది.
ఈ మ్యాప్లో అత్యంత విస్తుపోయే అంశం ఏంటంటే, వాషింగ్టన్కు దశాబ్దాలుగా నమ్మకమైన మిత్రదేశాలుగా ఉన్న యూఏఈ, ఒమన్ భూభాగాలను కూడా ట్రంప్ తమ ప్రాంతాలుగా పేర్కొనడం. యూఏఈ ఆర్థిక రాజధాని దుబాయ్, వాణిజ్య నౌకాశ్రయం ఫుజైరా ప్రాంతాలు తమ పరిధిలోకి వస్తాయని ప్రకటించారు. వీటితో పాటు ఇరాన్కు చెందిన వ్యూహాత్మక ఖేషమ్ దీవి, దానికి అనుబంధంగా ఉన్న సముద్ర తీరాలను అమెరికా భూభాగంగా మ్యాప్లో చూపించారు. కొద్దిరోజులుగా ఇరాన్ జరిపిన క్షిపణి దాడులతో యూఏఈ తీవ్రంగా నష్టపోగా, ఇప్పుడు అమెరికా నుంచి ఈ రకమైన ప్రకటన రావడం వారిని ఆందోళనకు గురిచేస్తోంది.
ఇరాన్తో కుదుర్చుకున్న ఒప్పందం గడువు 60 రోజులు ముగిసినప్పటికీ, హోర్ముజ్ జలసంధిని నిబంధనల ప్రకారం తెరవడానికి టెహ్రాన్ నిరాకరించింది. దీంతో ఇరాన్ ఇస్లామిక్ రివల్యూషనరీ గార్డ్ కార్ప్స్ అధికారులతో అమెరికా రహస్యంగా సంప్రదింపులు జరుపుతోంది. ఇరాక్ నూతన ప్రధానిని మధ్యవర్తిగా పెట్టుకుని చర్చలు జరుపుతున్నట్లు సమాచారం. అమెరికాలో త్వరలో జరగనున్న మిడ్ టర్మ్ ఎన్నికల నాటికి ఇరాన్తో ఒక గౌరవప్రదమైన ఒప్పందాన్ని సాధించాలనే పట్టుదలతో ట్రంప్ యంత్రాంగం ఉంది.
ట్రంప్ చేసిన ఈ ప్రకటనపై అరబ్ లీగ్, గల్ఫ్ దేశాలు తీవ్ర అసంతృప్తి వ్యక్తం చేస్తున్నాయి. ఒక స్వతంత్ర దేశ నగరమైన దుబాయ్ను తమ ప్రాంతంగా పేర్కొనడం అంతర్జాతీయ చట్టాలను తీవ్రంగా ఉల్లంఘించడమేనని నిపుణులు అభిప్రాయపడుతున్నారు. ట్రంప్ కేవలం రాజకీయ లబ్ధి కోసమే ఈ విధమైన తీవ్రమైన వ్యాఖ్యలు చేస్తున్నారా లేక సైనిక చర్యకు సిద్ధమవుతున్నారా అనేది వేచి చూడాలి.
2014లో జర్నలిస్ట్గా నా కెరీర్ ప్రారంభించాను. పలు వెబ్సైట్లలో కంటెంట్ రైటర్గా పని చేశాను. డిజిటల్ రంగాల్లో 11 ఏళ్లకు పైగా అనుభవం ఉంది. బిజినెస్, ఆటోమొబైల్, స్పోర్ట్స్, మూవీస్, టెక్నాలజీ, పాలిటిక్స్, వైరల్, బిజినెస్కు సంబంధించిన కంటెంట్ను రాయగలను. ముఖ్యంగా ఆటోమొబైల్, బిజినెస్, బ్రేకింగ్ న్యూస్ రాయడంలో నైపుణ్యం ఉంది.
