త్రిపురాంతకం: వినాయక చవితిని పురస్కరించుకుని యువతీ యువకులు మట్టితో వినాయక ప్రతిమలను స్వయంగా తయారు చేసుకుంటూ పర్యావరణ పరిరక్షణకు బాటలు వేస్తున్నారు. సంప్రదాయ పద్ధతిలో సహజసిద్ధమైన మట్టిని ఉపయోగించి అందమైన వినాయక విగ్రహాలను రూపొందిస్తూ పండుగకు సరికొత్త శోభను తీసుకొస్తున్నారు. యువతీ యువకులు ఉత్సాహంగా పాల్గొని మట్టిని సిద్ధం చేసుకొని వినాయకుడి ఆకృతిని మలచడంలో ఒకరికి ఒకరు సహకరించుకుంటూ తమ సృజనాత్మకతను చాటుకున్నారు. చిన్నారులు సైతం ఈ కార్యక్రమాన్ని ఆసక్తిగా తిలకిస్తూ మట్టి వినాయక ప్రతిమల తయారీపై అవగాహన పెంచుకున్నారు. ప్రస్తుతం ప్లాస్టర్‌ ఆఫ్‌ పారిస్‌తో తయారయ్యే విగ్రహాలు, రసాయన రంగుల వల్ల నీటి వనరులు కలుషితమవుతున్న నేపథ్యంలో మట్టి వినాయక ప్రతిమలను ప్రోత్సహించాల్సిన అవసరం ఉందని యువత పేర్కొన్నారు. మట్టితో తయారైన విగ్రహాలను పూజించి అనంతరం నిమజ్జనం చేయడం వల్ల పర్యావరణ పరిరక్షణ సాధ్యపడుతుందన్నారు. “మట్టి వినాయకుడు.. పర్యావరణానికి మేలు” అనే ఉద్దేశంతో త్రిపురాంతకంలోని పలువురు యువతీ యువకులు మట్టిని తీసుకొచ్చి వినాయక ప్రతిమలు తయారుచేసుకుంటున్నారు. దీంతో పండుగను భక్తిశ్రద్ధలతో నిర్వహించుకోవడంతోపాటు ప్రకృతి పరిరక్షణ బాధ్యతను కూడా ప్రతి ఒక్కరూ గుర్తుంచుకోవాలని వారు పిలుపునిచ్చారు.
గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
