స్టీరింగే కాదు క్లచ్, యాక్సిలరేటర్ లేని కారు .. మరి డ్రైవింగ్ ఎలాాగో తెలుసా

ఈ వాహనానికి స్టీరింగ్ వీల్, పెడల్స్ (క్లచ్, యాక్సిలరేటర్) లేవు… ఇది సిటీ రోడ్లపై తిరుగుతున్న వీడియోను టెస్లా సీఈఓ ఎలాన్ మస్క్ షేర్ చేశారు.

టెస్ట్ సమయంలో వాహనంలో సేఫ్టీ మానిటర్ ఉన్నప్పటికీ, డ్రైవర్ నియంత్రణలు ఏవీ లేవు. 2024లో తొలిసారిగా చూపిన డిజైన్‌కు ఇది సరిగ్గా సరిపోతుంది. ప్రొడక్షన్-రెడీ సైబర్‌క్యాబ్‌లు పబ్లిక్ రోడ్లపై కనిపించడం ఇదే మొదటిసారి.

టెస్లా అక్టోబర్ 10, 2024న సైబర్‌క్యాబ్‌ను పరిచయం చేసింది. ఇది పూర్తిగా అటానమస్ వాహనం, ప్రత్యేకంగా రైడ్-హెయిలింగ్ సేవల కోసం తయారు చేయబడింది. బేసెనర్ (Basenor) రిపోర్ట్ ప్రకారం ఇప్పటికే ఉన్న టెస్లా మోడళ్లలా కాకుండా, దీన్ని మొదటి నుంచీ డ్రైవింగ్ కంట్రోల్స్ లేకుండానే డిజైన్ చేశారు.

ఈ కారును ఆవిష్కరించిన 20 నెలల్లోనే రోడ్ టెస్టులు ప్రారంభించడం చాలామందిని ఆశ్చర్యపరిచింది. ఆస్టిన్‌లో ఇప్పటికే మోడల్ Y వాహనాలతో అటానమస్ రైడ్ సేవలను టెస్లా పరీక్షిస్తోంది. 2026 జూన్‌లో పబ్లిక్ రోబోట్యాక్సీ రైడ్‌లు అందుబాటులోకి వచ్చాయి. ఇప్పుడు సైబర్‌క్యాబ్ టెస్లా అటానమస్ ప్రణాళికల్లో తదుపరి దశను సూచిస్తోందని బేసెనర్ రిపోర్ట్ పేర్కొంది.

ఈ వీడియోలో సైబర్‌క్యాబ్ ఇంటీరియర్ ఎలా ఉందో స్పష్టంగా కనిపించింది. డ్రైవింగ్ సమాచారంతో నిండిన డాష్‌బోర్డ్‌కు బదులుగా, ప్రయాణికుల కోసం మధ్యలో ఒక సింపుల్ డిస్‌ప్లే ఉంది.

డ్రైవర్ లేనందున ఈ స్క్రీన్ ప్రధానంగా రైడ్ వివరాలు, ఇతర సమాచారాన్ని చూపించడానికి రూపొందించబడింది. ఇది ఇంకా ఇంజనీరింగ్ టెస్ట్ దశలోనే ఉందని, వాణిజ్యపరంగా లాంచ్ చేయడానికి ముందు వాహనాలు వాస్తవ ప్రపంచ డేటాను సేకరిస్తున్నాయని టెస్లా చెబుతోంది.

చాలామంది టెస్లా పురోగతిని ప్రశంసించగా, స్టీరింగ్ వీల్ లేని డ్రైవర్‌లెస్ కార్లు రోజువారీ వినియోగానికి సిద్ధంగా ఉన్నాయా అనే దానిపై ఈ వైరల్ వీడియో ఆన్‌లైన్‌లో పెద్ద చర్చనూ రేపింది.

ఒక యూజర్ '20 ఏళ్ల క్రితం ఎవరికైనా స్టీరింగ్ లేని కారు సిటీలో దానంతట అదే తిరుగుతోందని చెప్తే, ఏ సినిమా చూశావని అడిగేవారేమో' అని సరదాగా కామెంట్ చేశారు. కొంతమంది యూజర్లు ఎప్పుడు పబ్లిక్ రైడ్స్ ప్రారంభిస్తారని అడిగేంతగా ఉత్సాహం చూపించారు.

అయితే అందరూ దీన్ని స్వాగతించలేదు. చాలామంది యూజర్లు, అవసరం లేకపోయినా స్టీరింగ్ వీల్, పెడల్స్ ఉంటేనే సురక్షితంగా ఫీలవుతామని అన్నారు. మరో వాహనం అదుపుతప్పినా, లేదా ఊహించని అత్యవసర పరిస్థితి ఎదురైనా సైబర్‌క్యాబ్ ఎలా స్పందిస్తుందని కొందరు ప్రశ్నించారు.

టెస్టింగ్ సమయంలో వాహనంలో ఉండే సేఫ్టీ మానిటర్ పాత్ర ఏమిటని, ఏదైనా తప్పు జరిగితే ఎమర్జెన్సీ స్టాప్ సిస్టమ్ ఉందా అని కూడా సందేహాలు లేవనెత్తారు.

సైబర్‌ సెక్యూరిటీ కూడా మరో పెద్ద ఆందోళన. ఈ వాహనాలను హ్యాకర్లు లక్ష్యంగా చేసుకునే అవకాశం ఉందా అని అడిగారు. పూర్తిగా అటానమస్ వాహనం ప్రమాదానికి గురైతే బాధ్యత ఎవరిది అనే చట్టపరమైన ప్రశ్నలు కూడా తలెత్తాయి.

సైబర్‌క్యాబ్ ఇంకా ఇంజనీరింగ్ టెస్ట్ దశలోనే ఉన్నప్పటికీ, ఈ తాజా ప్రదర్శనలు టెస్లా వాణిజ్య వినియోగం వైపు స్థిరంగా వెళ్తోందని సూచిస్తున్నాయి. సైబర్‌క్యాబ్ ఎప్పుడు ప్రయాణికులను ఎక్కించుకోవడం ప్రారంభిస్తుందో కంపెనీ ఇంకా ప్రకటించలేదు. కానీ పబ్లిక్ రోడ్లపై విజయవంతంగా టెస్టింగ్ చేయడం వల్ల రెగ్యులేటర్లు, ఆటోమోటివ్ పరిశ్రమ దృష్టి దీనిపై మరింత పెరిగే అవకాశం ఉంది.

ఏదేమైనా సైబర్ క్యాబ్ పై చర్చ కొనసాగుతూనే ఉంది. కొందరు సైబర్‌క్యాబ్‌ను రవాణా భవిష్యత్తుగా చూస్తుంటే, మరికొందరు స్టీరింగ్ వీల్ లేని డ్రైవర్‌లెస్ వాహనాలు రోడ్లపైకి రావడానికి ముందు మరిన్ని పరీక్షలు అవసరం అని నమ్ముతున్నారు.