వెల్లుల్లిని పచ్చిగా తింటేనే ఎక్కువ ప్రయోజనమా? అసలు నిజం ఇదే

వెల్లుల్లిని ఏ విధంగా తింటే ఆరోగ్య ప్రయోజనాలు పొందవచ్చు? రోజుకు ఎంత మోతాదులో తీసుకోవాలి? పూర్తి వివరాలు తెలుసుకుందాం..

ఇంటర్నెట్ డెస్క్: వెల్లుల్లిని వేలాది సంవత్సరాలుగా ఆహారంలో భాగంగానే కాకుండా ఔషధంగా కూడా ఉపయోగిస్తున్నారు. భారతీయ వంటల్లో ఇది ముఖ్యమైన పదార్థం. ప్రత్యేకమైన రుచి, సువాసనతో పాటు ఆరోగ్యానికి కూడా వెల్లుల్లి ఎంతో మేలు చేస్తుంది. ముఖ్యంగా రక్తంలో చక్కెర స్థాయిలను నియంత్రించడంలో ఇది కొంతవరకు సహాయపడుతుందని పలు అధ్యయనాలు సూచిస్తున్నాయి.

వెల్లుల్లిలో అల్లిసిన్ (Allicin) అనే సహజ సల్ఫర్ సమ్మేళనం ఉంటుంది. ఇది శరీరంలో ఇన్సులిన్ పనితీరును మెరుగుపరచడంలో, గ్లూకోజ్‌ను కణాల్లోకి చేరవేయడంలో సహాయపడుతుందని పరిశోధనలు చెబుతున్నాయి. అలాగే ఇందులో ఉండే యాంటీఆక్సిడెంట్, యాంటీ ఇన్‌ఫ్లమేటరీ గుణాలు రక్తంలో అధిక చక్కెర వల్ల కలిగే నష్టాన్ని తగ్గించడంలో ఉపయోగపడవచ్చు.

వెల్లుల్లి రెబ్బలో మొదట అల్లిన్ (Alliin) అనే పదార్థం ఉంటుంది. వెల్లుల్లిని నలిపినప్పుడు లేదా తరిగినప్పుడు అల్లినేస్ (Alliinase) అనే ఎంజైమ్ క్రియాశీలమై అల్లిన్‌ను అల్లిసిన్‌గా మారుస్తుంది. ఆరోగ్య ప్రయోజనాలకు ప్రధాన కారణం ఈ అల్లిసిన్‌నే అని నిపుణులు చెబుతున్నారు.

ఆరోగ్య నిపుణుల అభిప్రాయం ప్రకారం, పచ్చి వెల్లుల్లిలో అల్లిసిన్ ఎక్కువగా ఉంటుంది. అందుకే పచ్చిగా లేదా తేలికగా నలిపి తినడం ఉత్తమం. అయితే వండిన వెల్లుల్లిని తినాలనుకుంటే కూడా ఒక చిన్న జాగ్రత్త పాటిస్తే ప్రయోజనం ఉంటుంది.

వెల్లుల్లిని ముందుగా నలిపి లేదా తరిగి 5 నుంచి 10 నిమిషాలు పక్కన ఉంచాలి. ఆ తర్వాత వంట చివరి దశలో కలిపితే అల్లిసిన్ ఎక్కువగా నిల్వ ఉంటుంది. అధిక మంటపై ఎక్కువసేపు వేయిస్తే ప్రయోజనకరమైన సమ్మేళనాలు తగ్గిపోతాయి.

ఆరోగ్యంగా ఉన్న పెద్దలకు రోజుకు ఒకటి నుంచి రెండు వెల్లుల్లి రెబ్బలు సరిపోతాయని నిపుణులు సూచిస్తున్నారు. ఎక్కువ మోతాదులో వెల్లుల్లి తీసుకున్నంత మాత్రాన అదనపు ప్రయోజనాలు కలుగుతాయని చెప్పేందుకు తగిన ఆధారాలు లేవు.

అధికంగా వెల్లుల్లి తీసుకుంటే కొందరిలో అసిడిటీ, గుండెల్లో మంట, కడుపు ఉబ్బరం వంటి సమస్యలు రావచ్చు.

వెల్లుల్లి రక్తంలో చక్కెర నియంత్రణకు కొంతవరకు ఉపయోగపడినా, ఇది మధుమేహానికి మందు కాదు. డయాబెటిస్ ఉన్నవారు వైద్యులు సూచించిన మందులు, సమతుల్య ఆహారం, క్రమం తప్పని వ్యాయామం, తగిన నిద్ర, ఒత్తిడి నియంత్రణ వంటి ఆరోగ్యకరమైన జీవనశైలిని పాటిస్తేనే మంచి ఫలితాలు ఉంటాయి. వెల్లుల్లిని వీటికి అనుబంధంగా మాత్రమే ఉపయోగించాలి.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

టాబ్లెట్‌పై గీత ఎందుకు ఉంటుంది? దాని ఉపయోగం మీకు తెలుసా?

డ్రై ఫ్రూట్స్‌కు పురుగులు పడుతున్నాయా? ఇవిగో సింపుల్ చిట్కాలు..