భాగ్యరాజ్ మొదటి భార్య ఎవరో తెలుసా? పెళ్లైన రెండేళ్లకే ఎలా చనిపోయింది

ఇప్పుడు ఆయన భార్యగా నటి పూర్ణిమ అందరికీ తెలిసినా, ఆమె కంటే ముందు నటి ప్రవీణ ఆయన మొదటి భార్య అనే నిజం చాలా మందికి తెలియదు.

1970ల మధ్యలో ప్రవీణ నటిగా పరిచయమయ్యారు. మొదట్లో ఆమె చిన్న చిన్న పాత్రల్లోనే నటించారు. తమిళంలోనే కాకుండా మలయాళం, తెలుగు, కన్నడ సినిమాల్లోనూ అవకాశాలు అందుకున్నారు. హీరోయిన్‌గా ఛాన్సులు రాకపోయినా, నటనపై ఉన్న ఆసక్తితో ఇండస్ట్రీలో నిలదొక్కుకోవడానికి ఆమె చాలా కష్టపడ్డారు.

అదే సమయంలో భాగ్యరాజ్ కూడా ఇండస్ట్రీలో నిలదొక్కుకోవడానికి ప్రయత్నిస్తున్నారు. వీరిద్దరూ సినిమా ఇండస్ట్రీలో కలిసినప్పుడు మంచి స్నేహితులయ్యారు. కాలక్రమేణా ఆ స్నేహం ప్రేమగా మారింది. ఆ రోజుల్లో ఇద్దరూ ఆర్థికంగా చాలా ఇబ్బందులు పడ్డారని అంటుంటారు. ఆ పరిస్థితుల్లో ప్రవీణ, భాగ్యరాజ్‌కు అండగా నిలిచారని అప్పటి సినీ వర్గాలు చెబుతుంటాయి.

చాలా కాలం ప్రేమించుకున్న భాగ్యరాజ్, ప్రవీణ 1981లో పెళ్లి చేసుకున్నారు. పెళ్లి తర్వాత కూడా ప్రవీణ సినిమాల్లో నటిస్తూనే ఉన్నారు. ఓవైపు సినిమాలు, మరోవైపు కొత్త సంసార జీవితం.. ఇలా మొదలైన ఈ జంట ఆనందం ఎక్కువ కాలం నిలవలేదు. పెళ్లయిన రెండేళ్లకే, 1983లో ప్రవీణకు పచ్చకామెర్లు (jaundice) సోకాయి.

చికిత్స తీసుకున్నా ఆమె ఆరోగ్యం మరింత క్షీణించింది. దీంతో కేవలం 25 ఏళ్ల వయసులోనే ఆమె కన్నుమూశారు. ఈ ఘటన భాగ్యరాజ్‌ను మానసికంగా తీవ్రంగా కుంగదీసింది. చిన్న వయసులోనే జీవిత భాగస్వామిని కోల్పోయిన ఆ విషాదం, ఆయన జీవితంలో చివరి వరకు ఓ మర్చిపోలేని జ్ఞాపకంగా మిగిలిపోయింది.

ప్రవీణ మరణం తర్వాత కొన్ని సంవత్సరాలకు భాగ్యరాజ్ నటి పూర్ణిమను పెళ్లి చేసుకున్నారు. వీరి కొడుకు శంతను భాగ్యరాజ్, కోడలు కీర్తన కూడా సినిమా ఇండస్ట్రీలోనే తమకంటూ ఓ గుర్తింపు తెచ్చుకున్నారు. నటిగా ప్రవీణ ఎక్కువ సినిమాల్లో హీరోయిన్‌గా మెరవలేకపోయినా, ఆమె పట్టుదల, భాగ్యరాజ్ జీవితంలో కీలక వ్యక్తి కావడంతో ఇప్పటికీ అందరూ ఆమెను గుర్తుంచుకుంటారు.