రెండ్రోజుల క్రితమే కలుసుకున్నాం.. అప్పుడే వెళ్లిపోయావా మిత్రమా

ఆయన తీవ్ర గుండెపోటుతో తుదిశ్వాస విడిచినట్లు వైద్యులు ధృవీకరించారు. రెండు వారాల క్రితమే తన గురువు, దిగ్గజ దర్శకుడు భారతీరాజాను కోల్పోయిన కోలీవుడ్.. ఇప్పుడు భాగ్యరాజ్ మరణంతో మరోసారి తీవ్ర దిగ్భ్రాంతికి లోనైంది. అయితే, ఈ విషాదం సినీ వర్గాలను మరింత కలచివేయడానికి ఒక ముఖ్యమైన కారణం ఉంది. మరణించడానికి కేవలం రెండు రోజుల క్రితం వరకు ఆయన ఎంతో సంతోషంగా గడిపారు.* చిత్ర పరిశ్రమలో తీవ్ర విషాదం.. ప్రముఖ నటుడు, దర్శకుడు కె. భాగ్యరాజ్ కన్నుమూత గోవాలో పెళ్లి సందడి.. నేడు అనంత లోకాలకుసీనియర్ నటి, రాజకీయ నాయకురాలు ఖుష్బూ సుందర్, దర్శకుడు సుందర్‌ దంపతుల పెద్ద కుమార్తె అవంతిక వివాహ వేడుక గోవాలోని ఒక లగ్జరీ రిసార్ట్‌లో రెండ్రోజుల క్రితం అత్యంత వైభవంగా జరిగింది. ఈ వేడుకకు కె. భాగ్యరాజ్ సాంప్రదాయ దుస్తుల్లో విచ్చేసి నూతన దంపతులను ఆశీర్వదించారు. ఆ సమయంలో ఆయనతో పాటు టాలీవుడ్, కోలీవుడ్, బాలీవుడ్‌కు చెందిన ఎందరో అగ్ర నటులు హాజరై సందడి చేశారు. ఎంతో ఉత్సాహంగా పెళ్లి వేడుకలో గడిపిన భాగ్యరాజ్.. ఇంతలోనే శాశ్వతంగా దూరమవ్వడాన్ని తోటి నటీనటులు జీర్ణించుకోలేకపోతున్నారు. చిరంజీవి భావోద్వేగంగోవా వివాహ వేడుకలో భాగ్యరాజ్‌తో కలిసి చివరి క్షణాలను పంచుకున్న మెగాస్టార్ చిరంజీవి.. ఈ మరణవార్త విని తీవ్ర భావోద్వేగానికి లోనయ్యారు. తన స్నేహితుడి మృతిపై సోషల్‌ మీడియాలో ఎమోషనల్ పోస్ట్ పెట్టారు. "మాటల్లో చెప్పలేనంత తీవ్ర దిగ్భ్రాంతికి, గుండె కోతకు గురయ్యాను. మొన్నటికి మొన్న మేమంతా గోవాలో కుష్ వివాహ వేడుకలో కలుసుకున్నాం.. ఎంతో సంతోషంగా నవ్వుకుంటూ, జోకులు వేసుకుంటూ, ఫోటోలు దిగాం. భాగ్యరాజ్ గారు ఎంతో ఉత్సాహంగా, ఆనందంగా కనిపించారు. అలాంటిది, ఈ రోజు ఉదయం ఆయన కన్నుమూశారనే వార్త వినాల్సి రావడం నిజంగా నమ్మశక్యంగా లేదు. ఆయన ఒక అద్భుతమైన చలనచిత్ర దర్శకుడు, అసాధారణమైన స్క్రీన్‌ప్లే రచయిత, గొప్ప నటుడు. భారతీయ సినిమాకు ఆయన అందించిన సేవలు ఎప్పటికీ గుర్తుండిపోతాయి. పూర్ణిమ గారికీ, శాంతనుకూ మరియు వారి కుటుంబ సభ్యులందరికీ నా హృదయపూర్వక సానుభూతి తెలియజేస్తున్నాను. ఈ పూడ్చలేని లోటును తట్టుకునే శక్తిని ఆ భగవంతుడు వారికి ప్రసాదించాలని కోరుకుంటున్నాను. ప్రశాంతంగా విశ్రమించు నా ప్రియ మిత్రమా. నిన్ను మేము ఎప్పటికీ ఎంతో మిస్ అవుతాము." అంటూ చిరంజీవి కన్నీటి నివాళులర్పించారు. ఖుష్బూ కుమార్తె అవంతిక, చెన్నైకి చెందిన మర్చంట్ నేవీ ఆఫీసర్ శ్రవణ్ శ్రీనివాసన్‌ల వివాహం అంగరంగ వైభవంగా జరిగింది. 80ల కాలం నాటి నటీనటుల రీ-యూనియన్‌ను తలపించేలా సాగిన వేడుకలో చిరంజీవితో పాటు నాగార్జున, విక్టరీ వెంకటేష్, అమల, త్రిష, తమన్నా, బాలీవుడ్ ఎవర్ గ్రీన్ స్టార్స్ అనిల్ కపూర్, జాకీ ష్రాఫ్ వంటి ప్రముఖులు సాంప్రదాయ దుస్తులు ధరించి ప్రత్యేక ఆకర్షణగా నిలిచారు. ఒకవైపు ఈ పెళ్లి వేడుక ఫోటోలు ఇంటర్నెట్‌లో వైరల్ అవుతుండగానే.. మరోవైపు ఆ వేడుకలో నిండుగా నవ్వి కనిపించిన భాగ్యరాజ్ భౌతికంగా లేరనే వార్త సినీ అభిమానుల హృదయాలను పిండేస్తోంది. భారతీయ సినిమాకు తీరని లోటుకె. భాగ్యరాజ్ తన ఐదు దశాబ్దాల సినీ ప్రస్థానంలో 75కు పైగా చిత్రాల్లో నటించి, 25కు పైగా సినిమాలకు దర్శకత్వం వహించారు. 'ముంధనై ముడిచ్చు', 'అంద 7 నాట్కల్' వంటి ఎన్నో సంచలన చిత్రాలను రచించి, డైరెక్ట్ చేసి 'వన్-మెన్ స్టూడియో'గా పేరు తెచ్చుకున్నారు. ఆయన రాసిన ఎన్నో అద్భుతమైన కథలు తెలుగు, హిందీ భాషల్లోకి రీమేక్ అయ్యాయి. ఆయన మరణంతో తమిళ చిత్రసీమ ఒక గొప్ప సృజనాత్మక శకాన్ని కోల్పోయింది. ఆయన భార్య పూర్ణిమ, కుమారుడు శాంతను, కుమార్తె శరణ్యలకు చిత్ర పరిశ్రమ మొత్తం అండగా నిలుస్తూ సంతాపం ప్రకటిస్తోంది.