ఎన్టీఆర్ చివరి చిత్రం ఇదే.. దీని కోసం ఆయన పడిన ఆరాటం.. చేసిన పోరాటం

అటువంటి మహనీయుడైన శ్రీనాథుడి పాత్రను వెండితెరపై ఆవిష్కరించాలనే కోరిక నందమూరి తారక రామారావు (ఎన్టీఆర్)కు చిరకాలంగా ఉండేది. ఇది కేవలం ఒక నటుడి ఆకాంక్ష మాత్రమే కాదు, తెలుగు సంస్కృతి, సాహిత్యాలపై ఆయనకున్న ప్రగాఢ గౌరవానికి నిదర్శనం. 1966లో జి. రామిణీడు రూపొందించిన భక్తపోతన చిత్రంలో శ్రీనాథుడి పాత్ర కోసం మొదట ఎన్టీఆర్‌ను సంప్రదించారు. రచయిత సముద్రాల రాఘవాచార్య సూచన మేరకు ఈ అవకాశం లభించింది. ఆ పాత్రకు న్యాయం చేయడానికి ఆరు నెలల సమయం కోరిన ఎన్టీఆర్, ఈ కాలంలో కవి జీవన విధానాన్ని పూర్తిగా అధ్యయనం చేసి, గుండు కొట్టించుకుని, బ్రాహ్మణత్వాన్ని ఆపాదించుకుంటానని తెలిపారు. అయితే, గ్లామర్ హీరోగా ఉన్న ఎన్టీఆర్‌కు గుండు కొట్టించడం సాహసంగా భావించిన దర్శననిర్మాతలు, విగ్గుతో నటించమని సూచించారు. దీనితో తీవ్ర అసంతృప్తికి గురైన ఎన్టీఆర్, ఆ పాత్రను తిరస్కరించారు. అయినా, అప్పటినుంచి శ్రీనాథుడి పాత్ర ఆయనను వెంటాడుతూనే ఉంది. సినీ రంగం నుంచి రాజకీయాల్లోకి ప్రవేశించి ముఖ్యమంత్రిగా పదవీబాధ్యతలు చేపట్టిన తర్వాత కూడా ఎన్టీఆర్ శ్రీనాథుడి చిత్రాన్ని నిర్మించాలనే తన కలను విడిచిపెట్టలేదు. 1983లో తన స్వంత దర్శకత్వంలోనే ఈ చిత్రాన్ని రూపొందించాలని ప్రణాళికలు రచించారు. జె.వి. రాఘవులు సంగీత దర్శకత్వంలో డాక్టర్ సి. నారాయణరెడ్డి రాసిన కొన్ని పాటలను రికార్డ్ చేయించారు కూడా.

అయితే, ముఖ్యమంత్రిగా ఉంటూ సినిమాల్లో నటించడానికి కేంద్ర ప్రభుత్వం నుంచి అనుమతి లభించకపోవడం, రాజకీయపరమైన ఒత్తిడుల కారణంగా ఆ ప్రాజెక్టు ముందుకు సాగలేదు. ఏడాది తర్వాత, 1984 డిసెంబర్‌లో ఎన్టీఆర్ కొన్ని పాటలను తిరిగి రికార్డ్ చేయించారు. పాత పాటలు నచ్చకపోవడంతో పెండ్యాల సంగీత దర్శకత్వంలో, గాయకుడు రామకృష్ణ గాత్రంలో నూతనంగా వాటిని రికార్డ్ చేయించారు. 1985లో తిరిగి ముఖ్యమంత్రిగా బాధ్యతలు చేపట్టిన ఎన్టీఆర్‌కు సినిమా గురించి ఆలోచించే తీరిక లేకుండా పోయింది. ఏడేళ్ల సుదీర్ఘ విరామం తర్వాత, 1990ల ప్రారంభంలో శ్రీనాథ కవిసార్వభౌముడు చిత్ర నిర్మాణ కార్యక్రమాలు తిరిగి ఊపందుకున్నాయి. రాజకీయాల్లో తాను తీరిక లేకుండా ఉండటం వల్ల దర్శకుడిగా ఆ చిత్రానికి న్యాయం చేయలేనని భావించి, దర్శకత్వ బాధ్యతలను ప్రముఖ దర్శకుడు బాపుకు అప్పగించారు. ఈ చిత్రం బాక్సాఫీస్ వద్ద విజయం సాధించదని, ప్రేక్షకులు ఆదరించరని బాపు, రమణలు చెప్పినా ఎన్టీఆర్ వినిపించుకోలేదు. “శ్రీనాథుడి పాత్ర పోషించడం నా జీవితాశయం. జనం చూడకపోయినా నాకు తృప్తి కలిగితే చాలు,” అని వారికి వివరించారు. అంతేకాకుండా, చిత్ర నిర్మాణంలో తాను ఎటువంటి జోక్యం చేసుకోనని, పూర్తి స్వేచ్ఛనిస్తానని, కేవలం ఒక ఆర్టిస్టుగా సెట్‌కు వచ్చి ఎలా నటించమంటే అలా నటిస్తానని ఎన్టీఆర్ మాట ఇచ్చారు. ఎన్టీఆర్ నిబద్ధతకు, ఆ పాత్ర పట్ల ఆయనకున్న మమకారానికి కదిలిపోయిన బాపు, రమణలు ఈ చిత్ర నిర్మాణాన్ని ఒక గొప్ప అవకాశంగా తీసుకుని తమ శక్తివంచన లేకుండా కృషిచేశారు. ఎన్టీఆర్ ఇచ్చిన మాట ప్రకారం చిత్ర నిర్మాణంలో జోక్యం చేసుకోకుండా, దర్శకుడు బాపు అడిగినవన్నీ సమకూర్చమని తన కుమారులకు చెప్పారు.

దాదాపు 3 కోట్ల రూపాయల బడ్జెట్‌తో నిర్మితమైన శ్రీనాథ కవిసార్వభౌముడు చిత్రం 1993 అక్టోబర్ 21న విడుదలైంది. అదే ఏడాది ఏప్రిల్ 23న ఎన్టీఆర్ చివరి సాంఘిక చిత్రం మేజర్ చంద్రకాంత్ విడుదలైన విషయం గమనార్హం. ఈ చిత్రం ఎన్టీఆర్ అభిమానులకు, బాపు-రమణల శైలిని ఆదరించే వారికి మాత్రమే నచ్చింది. మిగిలిన ప్రేక్షకులు థియేటర్ల వైపు పెద్దగా మొగ్గు చూపలేదు. ఆర్థిక నష్టం గురించి ఆలోచించకుండా ఎన్టీఆర్ ఈ చిత్రాన్ని నిర్మించారు. మొదటి కాపీ చూసినప్పుడు చిన్నపిల్లాడిలా సంబరపడిపోయి, దర్శకుడు బాపుని కౌగలించుకుని అభినందనలు తెలిపారు. జయసుధ, ఆమని, రాజేంద్రప్రసాద్, సత్యనారాయణ, గుమ్మడి, రాళ్ళపల్లి, సుదర్శన్ వంటి నటులు ఈ చిత్రంలో కీలక పాత్రలు పోషించారు. ఎన్టీఆర్ సినీ ప్రస్థానంలో శ్రీనాథ కవిసార్వభౌముడు కేవలం ఒక చిత్రంగా కాకుండా, ఆయన జీవితాశయం, కళ పట్ల నిబద్ధతకు నిదర్శనంగా నిలిచిపోయింది.